Суббота, сентября 18, 2021
Важное

Репортаж «Восток» МАПО-нь паксятнестэ

Ожолдыця певтеме паксят, кенерезь сюронь прят, мельга-мельцек иневенчекс молиця комбайнат… Маряви, псись моли аволь ансяк менельстэ – мода потстояк, сювань пуль, важодиця мотортнэнь гайть, товзюронь прятне сюконязь-сюконить нуемкатнень алов. Республикань велень весе хозяйстватнесэ моли нуемань-пивсэмань шка, «тюрема» од норовонть кисэ. Июлень 13-це чистэ ушодызь те покш тевенть Отяжелень райононь «Восток» МАПО-сонтькак, козонь минь пачколинек ютазь недлясто.

Нуемась предприятиясонть моли рана валскестэ саезь позда чокшнес, ней ушось маней ды кундамс неть пси читнень – покш уцяска. Секскак малав 9 чассто минь уш киньгак эзинек муе конторасто, велень хозяйствань прявтось Александр Трошин, сонзэ полавтыцязо – прявт агрономось Николай Слугин ды лия агрономтне, механиктне, комбайнертнэ умок уш паксясольть. МАПО-сонть эрьва чистэ паксятнес лиснить 20 комбайнат, ды сынь сралевсть аволь ансяк Отяжбуень – Ламбаськень, Трокскужонь, Низовкань, Целпановань, истя жо Ицялбуень – Берговые Сыресинь, Пардалень паксятнева. Тов минь сыргинекак паксянь геройтнень вешнеме ды аволь чавонь кедть, ускинек тенст ютко шкасто, обедстэ, ловномс «Эрзянь правда».

Шужонь паксянть чиресэ вастынек од агрономонть Иван Сапуновонь. Сон нилеце ие роботы предприятиясонть, прядызе минек Агроинститутонть ды сась важодеме велев. Эрзянь церась – Таразбуень, эрьва чистэ сон ардтни роботамо Ламбаськев, паро, макссть тензэ служебной машина ды мелявкст тей самс арасть. Иван Николаевич сюкпря евты прявт агрономонтень Николай Иванович Слугиннэнь, конась васенце чистэ од специалистэнть саизе эсь вановтонзо алов ды свал лезды превс путомасо. Тонавтнемась университетсэ эдь максы ансяк теориянь содамочить, весе «танстесь» варчави ансяк важодема шкасто. Николай Иванович эсь церанзояк Андреень ильтизе тонавтнеме Агроинститутов. Ней уш од Слугинэсь прядызе магистратуранзо, тонавтнесь сон целевой программанть вельде ды уш кавто иеть церась важоди агрономокс «Востоксо». Лангсонзо Трокскужонь, Целпановань, Низовкань паксятне.

Те лувонть вельде тонавтнесь Пардалестэ од механикесь Максим Никоновгак, конась васняяк сась комбайнерокс, мейле кучозель Механикань ды энергетикань институтов содамочинзэ кепедеме. Пурнамс од вийть-превть, максомс тенст роботамонь паро лувт, покш зарплата, сыретнень ды докатнень пельде васенце шкастонть превс путомат, васолдо ардыцятненень транспорт – те предприятиянь прявтонть Александр Владимирович Трошинэнь политиказо. Секскак тей сыця од ломантнеде меельце иетнестэ пек ламо. Комбайнертнэяк тесэ, ловт, весе од церат. Улить истяткак, кить тусть тетяст киява ды поладыть велень тружениктнень династиятнень.

Шужонь паксясонть вастынек АКРОС 530 ниле комбайнат. Сынь сиведезь лия ендо вейсэ комбайнертнэнь марто ансяк нуемань-пивсэмань шкантень. Рулест экшсэ од виев церат: Отяжелестэ – Василий Абрамов, Вячеслав Третьяков, Владислав Гераськин ды «Сараст» совхозсто – Олег Станкин. Сынь тесэ уш омбоце сезон, бригадаст пурнавсь кеме, вейке-вейке кисэ аштиця. Весень улить эсест тевест, ансяк кизна цератне мирем сыть важодеме паксяв. Весе содыть, нуемань-пивсэмань шкасто комбайнертнэнень пандовить паро ярмакт ды цёратнень ютксо моли алкуксонь пелькстамо: кие седе ламо нуи – се седе ламо получияк. Сынст куватьс эзинек кирде, кода кортыть: шкась – ярмакт. Ды аволь ансяк: келя, сехте эряза комбайнеронтень А.В. Трошин алтась рамамс паро казне. Мезе те карми – зярс кияк а соды, ансяк пелькстамось весе комбайнертнэнь ютксо седеяк виевгадсь.

Комбайнатнень эйстэ а васоло аштить «КАМАЗ»-тнэ, конатне сюронть ускить велень хозяйствань ток лангс коськеме эли Саранскоень ды Ромодановань элеватортнэс. Эрьва паксясонть, косо нуить комбайнатне, вакссост аштить ведь боцька марто тракторт. Шужонь паксясонть те чистэнть дежурясь Иван Михайлович Кильдюшкин, конась пштистэ ваны, костояк илязо лисе толгель. Пси чистэ эдь вишка сяткинеськак вети покш толбандяс.

Иван Николаевич Сапунов агрономонть марто сыргинек лия енов, тосояк нуить шуж. Сон моли видьмексэкс, кода корты од агрономось, тедеде урожаезэ – 20-25 центнерт гектарсто. Сюрось пек эзь касо, ульнесть псить ды сон сеске ливтсь прят. Тосто вастынек агрономонть Валерий Григорьевич Баляйкинэнь. Ломанесь сон содыця, уш зярыя иеть важоди те тевсэнть, ансяк «Востоков» сась Од иеде мейле лия велень хозяйствасто. Келя, вечкевсь тесэнь прявттнэнь важодицятнень ломанькс путомась. Неявить хозяйствасонть вадря енов полавтоматне, икелев молемась, виевгадомась.

Омбоце паксясонть нусть истя жо АКРОС 530 ды 580 комбайнатне, сынь весе эсест, одт, роботамось эйсэст, нама, явови таштотнень эйстэ. Комбайнертнэ тосояк од церат, вана Дмитрий Гущин ансяк сась армиясто, лиятне, кода, Сергей Беляев, Николай Девяткин, Дмитрий Трофимов уш аволь васенце ие важодить предприятиясонть. Свал анок тенст лездамс сварщикесь Алексей Леушкин.

Чипаесь уш кузсь тёкшос, ансяк «Эрзянь правдань» корреспонденттнэ эзть капша туемс паксятнестэ. Минек экскурсоводокс ней кармась сонсь прявт агрономось Николай Иванович Слугин. Ломанесь, конанть вийсэ, содамочисэ кастовитькак тесэнь паксятнесэ весе агрокультуратне. Николай Иванович малав 40 иеть роботы агрономокс, зняро вайгельбеть сон ардсь паксятнева те шкастонть! Ловомс, некак, масторлангонть нучк-пачк ютызе ды, паряк, а весть. Чизэнзэ 350 вайгельбеть юты чаро лангсо. Трокскужонь паксятнес ардомсто Николай Иванович ёвтнесь тенек, мейсэ кенярдовты ды ацирьгавты тедедень норовось (урожаесь).

«Минек хозяйствасонть основной культуратне – озимой ды яровой товзюрось ды шужось. Видтяно эйстэст ламо, вана, озимойтнеде – 4400 гектарт, яровойденть – 3552, шуждонть – 3560 гектарт. Теде башка, карминек виднеме ликша, лияназ, рапс, кукуруза ды сахаронь якстерькай. Товзюродонть касттано колмо сортт, сынь лововить элитноекс, неть: «Скипетр», «Лиговская» ды «Московская-39». Сындест учотано паро урожай. Зярс саеви 30 центнерт гектарсто, паро таркатнесэ 42 ды 57 эрси. Нама, эрсесть седе паро иетькак, тедеде пертьпельксэсь аламодо ацирьгавтымизь, ялатеке путсынек весе виенек, штобу топавтомс учоманок. «Кшинть кисэ ламо ливезь эряви валомс» – те валмеревксэнть весе содасынек эйкакшпорасто», – тешксты Николай Иванович.

Слугин мельспаросо ашти од рамавкстнэнь кувалмаяк. Аволь умок хозяйствантень састь кавто комбайнат: «CLASS Tubar 580» ды «ACROS 595». Сынст максызь сехте содыця ды дока комбайнертнэнень, конатне 18 иестэ саезь руль экшсэть ды лововить МАПО-сонть алкуксонь мастерэкс. Васенцесэнть пивсы Целпановасто Александр Михайлович Киринкин. Сон уш эйкакшпингестэ ульнесь паксясо лездыцякс, 18 иесэ кармась комбайнерокс ды ней уш 36 иеть важоди ве таркасо. Кавто недляс Киринкин нусь 607 гектарт ды пивсэсь 17 тежат центнерт. Вейке чис сон юты 60 гектардо ламо. «Пек питней кадрась», – тешкстызе прявт агрономось Н.И. Слугин.

Трокскужосто Владимир Яковлевич Ютяев истя жо весе паксянь тевтнес содыця, тельня сон тракторист, кизна – комбайнер. Секскак сонензэ явозельгак омбоце од комбайнась. Неть ломантне оймсемань а содыцят, алкуксонь профессионалт, тонавтомскак эзть саво – сеске редизь од техниканть важодема лувонзо.

«Восток» МАПО-сто туемстэ эште куватьс пилесэнек гайнесь «паксянь иневенчтнень» увтось, прясонть жо чарасть-велясть истят мельтне: вана истямо ломаньсэ, алкуксонь тружениксэ виевгак минек Россиясь. Велень церат, сынь кирдить эсест хозяйстват, кастыть эйдеть, а пелить кодамояк роботадо, бути эряви, стить тиринь масторонь идемеяк. Сынст седейтнесэ ды сантнэсэ эри вечкемась тиринь модантень, конась свал ульнесь ды кармияк сехте покш сюпавчикс.

 

Марина Девятова

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».