Вторник, марта 19, 2024
Важное

Саранск ошонь 5-це номер школасо эрзянь келень тонавтыцядонть Любовь Дмитриевна Осяевадо минь сёрмалинек ды аволь вестькак. Течи таго ули тувтал ёвтамс шнамонь валт те пародояк паро эрзянь авадонть. Васня ледстясынек, зярдо ды кода Л. Д. Осяева теевсь тонавтыцякс.


Любовь Дмитриевнань весе эрямозо, ловт, сюлмавозь школанть марто. Те тевентень вечкемань сяткине седейсэнзэ кирвазсь уш сестэ, зярдо сонсь тонавтнесь школасо. Мелесь улемс тонавтыцякс ветизе васня Зубова-Полянань педагогической училищав. Сонзэ прядомадо мейле (1980 иестэ) поладызе тонавтнеманзо М. Е. Евсевьев лемсэ МГПИ-сэ. Тонавтомань тевензэ ушодызе 1986 иестэ Покш Березникень Госагыр чачома велесэнзэ. Ды 17 иеть эсензэ эрямосто макссь те школантень, сынст ютксто кемень иеть топавтсь директоронь тевтнень.

Седе тов уцясказо пачтизе Саранскоев. Тесэяк сон эзизе полавто вечкевикс тевензэ лия лангс, кармась ветямо эрзянь келень урокт васня Саранск ошонь 40-це № школасо, мейле сась 5-це № школав. Ды вана уш кеменде ламо иеть Любовь Дмитриевна Осяева тонавты эйкакшт эрзянь келенть содамо 2-це классто саезь 7-це классос.
Улемс тонавтыцякс – те аволь ансяк верьга кандомс тонавтыцянь лементь. Те тевесь веши пек ламо вийть, кармавты свал улемс анококс цидярдомс эрьва кодат стакачитнень, конат стякшныть сонзэ кинть лангсо, терди а кадновомс эрямонть эйстэ ды апак лотксе тонавтнемс эстензэяк. Весемеде питнеекс эсензэ важодемасо Любовь Дмитриевна лови сень, кода муемс виде кинть эйкакштнень седейтнес, кода кирвазтемс сяткине сынст оймесэ. Истямо ладсо вана уш кода 40 иеть лади эсь тевензэ Любовь Дмитриевна Осяеваяк.

Сень, кода сон вети уроконзо, кода машты толковамо эйкакштненень а чарькодевикс кевкстематнень, монень савкшнось неемс аволь весть. Теде башка, Любовь Дмитриевна ютавтни эрьва кодат вастовомат, чокшнеть, панжадо урокт, ков тердтни ламо инжеть. Аволь умок таго пачколинек Саранск ошонь 5-це № школав ды таго савсь улемс сонзэ уроксо. Те разнэ аволь эсензэ Любовь Дмитриевнань тердеманзо коряс. Минсь прянок вешинек самс сонензэ инжекс. Тувталось: Мордовиянь авань вейсэндявксонь прявтонть О.В. Игнатовань энялдоманзо коряс эрявсь максомс Россиянь авань вейсэндявксонть пельде Л.Д. Осяевань лемс кучозь медаленть ды казненть. Сынь максозь тензэ тиринь келенть тонавтома тевсэнть покш путовксонзо кисэ. Теде башка, те шкас апакольть максо Шнамонь конёвось ды казнесь Рав чирень финнэнь-угрань культурань куронть пельде «Равось – ояксчинь лей» экспедициясо улемстэ ламо вастовоматнень анокстамосо лездамонть кисэ. Эряви тесэ ледстямс, Л. Д. Осяеванень пракшнось уцяска понгомс сеть ломантнень юткс, кить тедеде таго якасть Рав лейга экспедицияв. Меринь, «пракшнось уцяска» – те аволь виде. Экспедицияв Любовь Дмитриевнань сайнизь аволь стяконь кисэ. Сон лиссь изницякс Саранск ошонь школатнесэ тиринь келень кабинеттнэнь ютксо пелькстамосо. Тень кисэ сонензэ максозель сертификат. Те, меремс, таго корты седе, кодамо покш мель сон яви эсь тевентень, зяро вий ды шумбрачи максы эйкакштнень тонавтомантень.

Школав тондавинек се шкастонть, зярдо Любовь Дмитриевна ветясь эрзянь келень урок 6-це классонть марто. Сиземанзо лангс апак вано (се чистэнть теде икеле сон кенерсь ютавтомс таго вете урокт), Любовь Дмитриевна, кода свал, уроконть ветясь апак машнете, вайгелень апак кепсе, сень лангс апак вано, аволь весе эйкакштне анокольть уроконтень. Тень пингстэяк тонавтыцясь эзь талакадо, мусь тев весенень. Веенстнэнь тердинзе доскас, омбонстнэнь кармавтынзе сёрмадомо тетрадтнес. Чарькодеви, эйкакштне аволь весе содасызь тиринь келенть. Секс сынст икеле свал ашти книга, косо валтнэ сёрмадозь кавто кельсэ: рузокс ды эрзякс.

Ловномадонть ды сёрмадомадонть мейле эйкакштненень мерезель стямс, ды тонавтыцясь весень кармавтынзе ловомс эрзякс, тень пингстэ эрьва валонть ёвтамсто невтнесть эсест рунгонь пелькстнэнь пильгестэ саезь пря касмос. Истямо ладсо налксематне, кода мерсь Любовь Дмитриевна, лездыть ютавтомс уроконь перть таштазь сиземанть, озадо аштемадонть ливчакавтсызь эйкакштнень рунгост.
Тень лангс урокось эзь прядово. Эйкакштне кирдевсть ды мельспаросо цяпасть, зярдо Любовь Дмитриевнанень максозельть покш казнетне. Сынст максомсто Рав чирень финнэнь-угрань культурань центрань отделэнь прявтось Татьяна Тимофеевна Чекушова тешкстызе, кодамо покш ды чевте седей кандтнить мештесэст сеть, кить кочкизь тонавтыцянь тевенть.

Истя улияк. Любовь Дмитриевна сеть ломантнень ютксто, кить эрямост перть лаказь лакить тевсэ, кемить ансяк эсест виест лангс. Сон эри истямо коень коряс: саик лангозот канстонть, иля мере – стака ды а кандови. Кодамо стака илязо уле, а вечки пеняцямо мезе лангскак. Кодамо илязо уле эйкакшось, Любовь Дмитриевна соды, кода мартонзо кортнемс, кодат валт ёвтамс. «Кежсэ мезеяк а теят. Эйкакштне вечкить, зярдо мартост чевтестэ ды валанясто», – корты сон.

Истямо сон, Любовь Дмитриевна Осяева. Мерят, те аванть тунь арасть кежензэ. Оймень коряскак сон седеймариця, ломанень вечкиця, паронь арсиця ды чевте седей. Казямо седеесь а карми истя кецнеме казнетненень, кода Любовь Дмитриевна. Сон, теке вишка эйкакш, эзь лотксе ёвтамо сюкпрят. Неть казнетнень, келя, сонсь Пазось тень кучинзе ды Монь чистэ!

Чись алкукс ульнесь Сонзэ. Таштамковонь 30-це чись лововсь сеть аватнень чикс, кинь лемест Вера, Надежда ды Любовь.
Любовь Дмитриевна Осяеванень ды весе тонавтыцятненень ёвтатано седейстэ молиця лембе валт Тонавтыцянь чинть кувалма. Арсетяно сэрей тёкшт важодемасонк, валдо уцяска, кеме шумбрачи ды седе ламо кеняркст эрямосонк!

Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».