Вторник, марта 19, 2024
Важное

«Эрзянь правда» газетань умоконь ловныцясь, минек пек малавикс ды вечкевикс ялганок Раиса Максимовна Пронькина (тейтерькс Аношкина) февральстэ тешксты юбилеензэ. Кодамоль чись, зярдо сон чачсь, видестэ кияк а ёвтасы. Васса Фёдоровна авазояк пингензэ перть кавтолдсь тень коряс, кортыль яла истя: «Тон, тейтерем, чачить февралень васенце читнестэ». Аванзо чумонзо тень кувалма стака муемс. Шкатне сестэ пек а шождальть.

Мольсь фашисттнэнь каршо ине тюремась. Цёратнень вейке-омбоце мельга сайсть фронтов. Сась тердема Аношкинтнэнь кудоскак. Авазо се шкастонть пешксесэль Раясо. Мирдензэ ильтямсто ризнэмадонть-лажномадонть эйдесь чачсь шкадо икеле. Сонзэ чачомадо вельсоветэв пачтязель зярыя таргонь ютазь. Метрикас тейтерензэ чачома чикс авазо мерсь тешкстамс февралень 23-це чинть. Келя, седе а стувтови. Истя туськак: малавиксэнзэ, ялганзо-оянзо поздоровт Раиса Максимовнанень ёвтыть секе чистэнть. Тедеде васенцеде Раиса Максимовна сайсь мель тешкстамс чачома чинзэ, кода мерсь авазо. «Ушодсынек ковонть ушодомсто. Мейле, кода лиси», – пейдезь мерсь сон ды топавтызе валонзо. Васенце вастовомас пурнынзе сехте малавикс ялганзо, кинь марто вана уш кода малав 30 иеть морси «Ламзурь» ансамблясо.

Вастовомась лиссь пек лембекс. А. С. Пушкин лемсэ Национальной ды краеведческой отделсэ важодицятнень вийсэ анокстазель видеопрезентация, косо невтезель Р. М. Пронькинань эрямозо. Весе пуромозтне юбиляронть лемс ёвтасть седейстэ молиця лембе валт, ледстнесть вейсэнь тевдест, морасть мазый морот, ульнесть тантей каванявксткак, ламбамо копша (торт) марто чай. Р. М. Пронькинань юбилеензэ тешкстамось карми молеме ковонть прядовомс. Учотано поздоровонь валт весень пельде, кить содасызь те пародояк паро аванть, кинь эрямонзо лади лемдемс чипаень кондямокс, конань эйстэ моли ансяк валдо ды лембе.

Кадови свал одокс ды мазыекс

Улить ломанть, кинь шкась, мерят, овсе а полавты. Кодат ульнесть од порасто, истямокс кадовить свал. Тевсэ палыцят, эрямонтень кенярдыцят, свал ков-бути капшицят, ломань юткс бажицят. Сынст юткс лади совавтомс Раиса Максимовна Пронькинаньгак (тейтерькс Аношкина). Чачома велесэнзэ (те – Кочкурбуень Сурвелесь) вишка пингстэ пшкалесть тензэ Васён Рая. Раиса Максимовнакс теевсь, зярдо М. Е. Евсевьев лемсэ пединститутонть прядомадо мейле сась тонавтомо эсь велень школав. Истя лиссь, кото иень ютазь савсь туемс ошов. Комськотово иеть важодсь Саранскоень 13 № эйкакшонь кужосо.

Ули эрзянь кезэрень лемезэяк – Вастаня. Максызе тензэ «Ламзурь» морокуронть теицязо Маризь Кемаль. Лемесь седе а ков ладясь те авантень. Эрзянь кельсэ ули пек паро вал – «васта, вастай». Сон ней таго-мекс стувтозь. Сонзэ кондят валтнэ – «полай», «ни», «козяйка». Раиса Максимовнадо паро ни ды пола ялга стака муемс. А стяко мирдезэ Дмитрий Тимофеевич киньгак лиянь седеензэ потс эзь нолда ды зярдояк а нолды. Секс кавонест, ловт, пингень перть вейсэть. Тонавтнемстэ ве парта экшсэ аштесть. Вейсэ чийнесть ульцява. Вейсэ пуромкшность чокшнень куринкас. Мейле налксесть свадьба. Ды те шкас, теке мерят, вейке лексемасо лексить. Тевтнень-мелявкстнэнь теить вейке-вейкенень лездазь, ризкстнэнь-апаротнень явить кавтов. Мезе лия эряви алкуксонь уцяскантень?

«Вастай» валось сеедьстэ вастневи эрзянь кезэрень моротнесэ. Ули сон «Маштыть, авакай» моросонтькак, конань пек вечксы Раиса Максимовна. Те мородонть башка сон эйстэст соды сядодо ламо. Моронь вечкемась – верьсэнзэ. Кшиде иляк андо, макст морамс. Те вечкемась ветизе «Ламзурь» ансамблявгак. Те ульнесь малав 30 иеде икеле. Се шкастонть саезь Р. М. Пронькина, кода сонсь корты, «Ламзуренть» марто сюлмавозь аволь ансяк седейга-оймева, сюлмавозь весе прянек-пильгенек.

Раиса Максимовнань мелявксонзо, кода эрьва аванть, – пря велькска. Сон эрьва тевсэ кол: кшить пани, ярсат – а пешкедят. Пряканзо – седееть витеви. Брагазо – весть корштамсто иредят. Машты стамояк, кодамояк. Истят ковтат, свитрат коды – лавкансетнень ваксс а путсыть, сядоксть седе парт.

Эсензэ туртов викшнесь зярыя эрзянь панарт ды руцят. «Вечкан, – корты Раиса Максимовна – эрзянь оршамот. Ютык масторонть трокс ды келес – минектне сехте мазыйть!» Цёранзо свадьбасояк киштсь эрзянь панарсо. «Весемеде мазыелинь», – пейдезь ледстни сон.
Теке марто сонзэ стака кирдемс кудосо. Вечки якамо, куваяк, кода сонсь корты, «лыстамо». Берянь, врачтне кардызь бассейнасо ды анксемасо укшномадонть. Кавтошка иеде икеле, ансяк сы телесь, сеске чии прянзо сёрмадстомо экшелицятнень юткс. Ды цят якшамонть лангс апак вано лия «морж»-ялганзо марто апак пеле чопавтнесь лов лангсто эев анксемантень.

«Эх, мекс уш истя капшазь моли шкась?» – янкси Раиса Максимовна. Ды ушоды оймензэ панжомо, мезе теевель, ков молевель. «Велявтомс вишка пингенть, тонавтневлинь эй ланга кирякстнеме», – весть видькстась сон. Ды арасть кавтолдомат: истя улевельгак. Истят ломанть, сехте пек аватнень ютксто, конат зняро мель ды бажамо явовольть спортонтень, аволь эрьва косто муят. Раиса Максимовна, маряви, весень судост нардынзе. А стяко вечки ваномо передачат, косо невтневи спортонть марто сюлмавозь пелькстамот. Зярдо молить эй ланга кирякстнемань, футболонь, биатлононь коряс пелькстамот, те шкастонть иляк токше, пелькстыцятнень кисэ весе седейсэ «сэреди». Удоманзояк кадсы, коморо таблеткат сими, ялатеке а туи, зярс а прядови пелькстамось.

Велесэ чачозь, Раиса Максимовна косо илязо эря, ков илязо моле, оймезэ свал тосо, косо ютась эйкакшпоразо, косо кепе пильгеть чийнесь чевте луганаронть ланга. Эйкакшпингезэ аволь шождаль. Войнань шкасто чачозь, сонензэ савкшнось варчнемс марчонь кшинть танстензэяк, урозчинь стакачитненьгак. Фашисттнэнь каршо тюреме тетязо Максим Петрович тусь 1942 иестэ. Авазо Васса Фёдоровна кадовсь колмо эйкакш марто, нилецесь (Рая) пексэнзэль. Тетязо эзь велявто кудов, чавовсь секе иестэнть. Истя сон чачськак, касськак тетявтомо.

Весе теде Раиса Максимовна ледстни сельведь марто. Сонзэ покш мелезэль куш вейке сельминесэ варштамс тетянзо лангс. Ансяк а кода ды а косто. Вейкеяк фото эзь кадово, вейкеяк сёрмине арасель пельдензэ. Кувать эзть сода, козонь чавовсь ды козонь калмазь. Шкань ютазь ансяк архивстэ муизь: Пронькин Максим Петрович маштовсь ятонть каршо тюремстэ 1942 иень августонь 23-це чистэ, калмазь Новгородонь мода лангсо Болотина велесэ.
…Раиса Максимовна пек вечки инжень вастомо. Велесэ кудынесэнзэ кить ансяк эзть ульне. Сон машты эрьва ломаненть седейшкава вастомо, каванямо. Кить сакшныть кедезэнзэ, весе кадовить паро ёжосо ды покш мельспаросо. Весемеде пек сонсь Раиса Максимовна. Сон лови, ков седе ламо паро теят ломантненень, тов седе вадря карми эстетькак.

Раиса Щанкина

Вечкевикс Раиса Максимовна!
«Литова» эрзянь авань вейсэндявксонть ды эсень пельде ёвтан Теть седейшкавань поздоровт 80-иетнень топодеманть кувалма.
Арсетяно кеме шумбрачи, эрямонь кувака ды шожда ки. Оймесэть, кода кудосоткак, кадык свал карми улеме лембе ды валдо, перькат свал улест паро ды кеме оят-ялгат.
Ульть свал истямокс: ломанень вечкицякс, лезэнь кандыцякс, кемемань максыцякс, валонь кирдицякс.

«Литова» эрзянь авань Вейсэндявксонь прявтось Р. Б. ЩАНКИНА

«Ламзурь» ансамблянь морыцятне ёвтыть седейстэ молиця лембе валт эсест сехте малавикс ды вечкевикс ялгантень Раиса Максимовна Пронькинанень. Арсить седе товгак ветямс эсь мельга од ломантнень, тонавтомс сынст паронь тееме, эрямосо мазыенть редямо. Валдо уцяска, кувака эрямо, кеме шумбрачи ды валдо васолкст теть, вечкевикс Раиса Максимовна!
«Ламзурь» ансамблянь морыцятне

«Эрзянь правдань» редакциясь ёвты седейшкавань лембе валт чачома чинь кувалма. Арсетяно кемедеяк кеме шумбрачи, уцяскав ды паро эрямо!

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».