Вторник, марта 19, 2024
Важное

… Селища велень скалонь фермас пачкодинек сестэ, зярдо скалтнэнь потявтомась прядовкшнось ды ракшатнень панизь луга лангов. Тесэ вастовинек скалонь фермань прявтонть В.П.Шаляева марто.

Валентина Петровна тескень. Велень хозяйствантень алтызе весе эрямонзо. Тевензэ вечксы. Рана валске, зярдо велень эрицятне ушодыть кудонь тевтнень топавтомо, В.П.Шаляева уш фермасо. Ванкшны весе-аволь ракшатне таркасост, кода анокстазь скалтнэнь потявтомань оборудованиясь. Ды истя теи уш зярыя кементь иень перть.

– Береговые Сыреси отделениясо, лововить ветесядто ламо скалт, эйстэст 208 – потявтовицят, – ёвтни фермань прявтось В.П.Шаляева. – Мельгаст якить ды сынст потявтыть кото ломанть. Неть – Татьяна Анатольевна Митронина, Ольга Викторовна Ревина, Анна Ивановна Абрамова, Татьяна Владимировна Шаляева, Галина Викторовна Закутаева, Валентина Александровна Тарейкина.

В.П.Шаляевань валонзо коряс, скалонь потявтыцятнестэ сехте ёроковось Т.А.Митронина. Сон умок уш пенсиясо. Ансяк обуцязо аволь истямо – аштемс кудосо. Сон нейгак тевензэ топавты вадрясто. Группасонзо ракшатне зярдояк а сэредить ды, нама, потявты ламо ловсо.

Вана Юлия Евгеньевна Зинкина скалонь потявтомо ушодсь аволь умок.

– Опытной скалонь потявтыцятнень эйстэ овсе а каднови, – полады фермань прявтось В.П.Шаляева. – Тевензэ топавты вадрясто. Мельганзо ваномс а эряви. Мезе тензэ а чарькодеви, а визди кевкстемс опытной скалонь потявтыцятнень. Сон куроксто мусь кель-вал фермасо важодицятнень марто.

А мезть сёпомс, скалонь потявтыцятнень тевест молить вадрясто, сынь а содыть кодаткак стакачить. Теньсэ, нама, покш таликаст сласартнень. Ютксост – В.В.Балакин, В.С.Пискайкин. Сынь свал тосот, косо куроксто эряви витнема. Течи, зярдо скалтнэ паневить луга лангов, сынь витнить кардсо транспортертнэнь, лия мезенть.

Тешкстасынек, течи Селища велень скалонь фермасто эрьва чистэ ильтяви 4 тоннат ловсо.

 – Ловсонть ней ильтятано Нижней Новгородонь областень Починкав, – ёвтни фермань прявтось В.П.Шаляева. – Икеле ильтинек яла Саранск ошонь консервань заводов, мейле Отяжелень райононь оень заводов. Течи эрьва скалсто потявтано 20 ламо килограммат ловсо. – Те а берянь цифрась. Тенень, нама, пек лезды ветеринарной врачось Татьяна Владимировна Загурдаева.

Т.В.Загурдаева ветеринарной врачонь тевенть топавты 1990 иестэ саезь. Тей сон важодеме сась Н.П.Огарев лемсэ МГУ-нь Велень хозяйствань факультетэнть прядомадо мейле.

– Сестэ велень колхозонть лемезэль «Путь коммунизму». Сонзэ прявтсоль Серафим Васильевич Крылов, – ледстни ветврачось Татьяна Владимировна. – Хозяйствасонть ракшатнеде ламольть, тринек-кастынек тувоткак. Важодемань васенце шкасто монень лездась зоотехникесь Валентина Алексеевна Сакун. Сонзэ лован эсень тонавтыцякс, бути истя можна меремс, наставникекс.

Течи ветврачось Т.В.Загурдаева тевензэ содасы пек парсте. Сон эште велесэ топавты осеменаторонь тевентькак.

– Минек, Береговые Сыресинь отделенияс совить Папулева, Селища велетне, – ёвтни те отделениянь управляющеесь М.С.Девяткин. –  Азоронок – «МПО «Элеком» ОАО-сь, кона Ромодановань районсо.  Видькстан, те агропромышленной предприятиясь,  покш мель яви Б.Сыресинь отделениянть виегавтомантень.   Велесэнек ули сэнь уштомапель, средней школа. Мельганок кемекстазь 900 гектарт мода. Лангсонзо касттано силосокс кукуруза, тикше ды сюро. Сюротнень алов явинек 300 гектарт мода. Тедеде сюронть видсть трактористтнэ Александр Иванович Макаров, Юрий Васильевич Зинкин, Владимир Анатольевич Пискайкин, Василий Петрович Лукьянов, Николай Николаевич Буянкин. Сынь важодсть ды важодить вадрясто. Тракторост а яжавкшныть. Пиземетнень лангс апак вано, видеманть прядынек шкастонзо. Велесэ тевтне зярдояк а маштыть.

– 2019 иестэ важодинек а беряньстэ, – ёвтни управляющеесь М.С.Девяткин. – Истя, эрьва скалсто потявтынек 4,5 тёжат килограммат ловсо. Государствантень  весемезэ миинек 1100 тоннат. Ловсо ды сывель миинек 20 миллионт целковоень питнес. Арсян, тедедеяк те цифрась а полавтови, бути ансяк кастови.

Михаил Степанович варма мельга валт а ёртни. Мезе арси теемс, сень топавтсы. Истя важодеме тонавтызе эрямось. Сон эсь шкасто Вечкусы велесэ важодсь агрономокс, мейле топавтсь велень хозяйствань предприятиянь прявтонь тевть. Ды ней 18 иеть топавты управляющеень тевенть.

М.С.Девяткинэнь валонзо коряс, хозяйствасонть важодить 45 ломанть. Сынь ковозонзо получить 25-30 тёжат целковойть. Зарплатась максневи шкастонзо. Весементь мельга пек ваны экономистэсь О.В.Пискайкина.

…Минь кардсонть, косо андовить-кирдевить вишка вазтнэ. Тесэ эйстэст 180. Мельгаст якить Лидия Петровна Киселева, скотникесь В.Н.Шаляев ды слесаресь Н.В.Гаврилов.

– Мон вечкса эсь тевем, – видькстась вазонь андыцясь Л.П.Киселева. –  Вазтнэнь мельга якан теке эйкакш мельга. Покш мельспаросо аштян зярдо сынь шумбрасто касыть.

Селищасо улемстэ эзинек юта тракторонь парконть вакска. Тесэ вастовинек механикенть А.Н.Девяткин марто.

– Яровойтнень видеманть прядсынек, ней техниканть анокстатано касовкстнэнь валномантень ды ракшатненень коромонь анокстамонтень, – ёвтни Анатолий Николаевич. – Чинь ютазь листяно коромонь анокстамо. Техникась уш анок.

Пётр Зиновьев

Фототне Э.Ретунскоень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».