«Тиринь масторось ды «Шумбратось» ушодовить минек эйстэ!» – истямо мель ёвтасть Кочкурбуень артисттнэ фестиваленть лементь-кевкстеманть лангс. Алкукскак истя. Комсьсисемге иетнень перть пелькстамосонть эсь докачист невтить минек республикань велень ды вишка оштнень артисттнэ: сыретне ды одтнэ, эйдень кужов якицятне ды школасо тонавтницятне.
Тедеде нурькине торжественной панжомадонть мейле, конанть ютавтызе МР-нь культурань министрась Светлана Баулина, васенце концертэнть невтизе Рузаевкань районось. Минсь эзинек яка, ансяк, содыцятнень валост коряс, залось тыц пешксель, ды, кода свал, Рузаевкась бажи ансяк васенце таркатнес.
«Эрзянь правдань» корреспонденттнэ жо те иестэнть арсить яксемс сеть концерттнэс, конатнесэ пряст невтить минек ловныцянок-сёрмадстыцянок сеть районтнэстэ, косо эрить ламо эрзят. Ды арсетяно редямс, кода сынь невтьсызь тиринь раськень культураст, фольклорост, койтнень-кирдатнень. Секскак ютазь оймсема читнестэ минь ванынек Ицялбуень ды Кочкурбуень концертэст. Сеске тешкстасынек, кавонест районтнэ топавтызь фестивалень вешеманть – концертэст ульнесть тиринь масторонть, ёнксонть, велетнень певтеме вечкемадо.
Ицялбуесь васняяк кенярдовтымизь репертуаронть марто печатазь программкасо, косто карминек содамо, концертэнть режиссёрось – МР-нь заслуженной артистэсь Е. Н. Пулов, директорось – тосонь Культурань центрань прявтось Н.А. Буянова, художественной руководителесь М. В. Дувалкина. А выставкасонть те шкане мастер-класст невтсть кедьчелькев викшницятне-кодыцятне, Пётр Першин чувтосто керсицясь тонавтницянзо марто. А пек однэ «пионеркась» чавсь барабансо ды тердсь сёрмадстомс прянк «комсомолкакс». Маласонзо аштесь фотостенд, косо невтевсь «Шумбратонть» историязо, седе тов весень вастсь эрзянь сёрмадеенть, тонавтыцянть, Ицялбуесэ чачозенть И.П. Кривошеевень портретэзэ. Рединек, концертэв сазтнеде ульнесть а пек ламо. Фойесэнтькак тедеде арасельть кодаткак шалт-гайтть, гармошкасо седямкат, киштемкат-морамкат. Весемесь ютась ансяк сцена лангсо.
Ицялбуеть анокстасть 21 номер. Мекс-бути васенце валонь ёвтамо лиснесь аволь райононь прявтось В. Г. Дмитриева, а Депутатонь советэнь ветицясь. Кода содатадо, Ицялбуесь – эрзянь район, ансяк вана раськень морот-киштемат ульнесть ниле. Кенярдовты, тосто сакшность пек ламо эйкакшт, ули ки марто важодемс сыця шкасто. Ицялбуесэ роботы эйкакшонь искусствань школа, ули Культурань куншкакуро, зярыя киштицянь коллективть ды морыцянь ансамблят: «Стремление», «Вармине», «Килейне», «Здравица», «Вастома» ды лият.
Недлячистэ РДК-нь сценанть лангсоль Кочкурбуесь. А содатано, кие ульнесь концертэнть режиссёрось, мекс-бути арасельть программкаст. Ялатеке артисттнэнь лемест-фамилияст ды номертнэнь лемест невтевсть удало экрансонть. Тешкставлинь бу целанек видеосюжеттнэнь, конатне мольсть моротнень-киштематнень марто вейсэ. Арсицясь-теицясь – алкуксонь профессионал! Лиясто стувтылинь ваномс морыцятнень лангскак, истя чаракавтылимим невтевиця кинось.
Панжизе мероприятиянть сонсь Кочкурбуень прявтось Светлана Герасимова, ды пек паро, эдь самодеятельной артисттнэнень те шкастонть пек эрявкшны кирдема весень ёндо, кода ваныцятнень, истя жо прявттнэнь пельдеяк. Неявсь, кода Светлана Николаевна «сэредсь» эсензэсетнень кис. Минь арсетяно, сынь визьксчамас эзть пра! Концертэсь ульнесь достойноекс ды жюриськак, арсян, истямо жо мельсэ. Те алкуксонь яволявтома васенце таркатнень кисэ. Васенцекс морась Кочкурбуесэ чачозесь Андрей Бочканов (профессиональной артистэсь, нать, мольсь аволь конкурсонть юрсо). Удалонзо жо те шкане ютась райононть сехте содавикс «брендтнэнь» невтемась: тейтерькатне киштсть чувтосто керсезь чамакс ды налкшке марто, а мейле сценанть лангс лиссь покштояк покш Тавлань лишмесь.
Кенярдовтымизь эрзянь раськень оршамопельтнеяк. Неявсь, сынь одт, ансяк стазельть. Репертуарсонтькак ульнесть пек ламо эрзянь раськень морот ды киштемат паро аранжировка марто («Кальдерькай», «Задоринка»). Кочкурбуень бабатнеяк, конатневтеме а ютни вейкеяк концертэсь, гайгстызь кезэрень морост: («Гайги вайгель», «Вастома», «Норовава»...). Мельспаро ульнесь неемс кезэрень оршамо- ды карсемапельтнень. А уш кода морась эрзякс авадо мокшонь моро Анна Брыжинская «Аккорд» ансамблянть марто – седеесь натой соракадсь. Рузонь кельсэ моротнеяк кенярдовтымизь. Мезе ансяк ашти Николай Старкин. Од цёранть вечксызь ваныцятне ды куватьс пижнесть «браво!».
Тешкстасынек, «Шумбрат, Мордовия!» фестиваленть-пелькстамонть анокстыцясь – Республикань Раськень творчествань кудось. Сыця субутасто ды недлячистэ минь мольтяно ваномо Лямбирень ды Покш Игнатовань районтнэнь.
Ваномо якась
Валентина ДЫДЫКИНА