Вторник, марта 19, 2024
Важное
Течи минек инженек – Отяжелень райононь Сабанцеле велень Василий ды Анастасия Сидоровтнень од семиясь. Од ломантне содавикст эсь ёнкссонть ансяк паро тевсэст. Аламо ней вастат семият, конатне урьвакстомадо-мирденень лисемадо мейле кадовить эсь тиринь велес, ды аволь ансяк бажить эрямс эсь лезэс, теить весементь вакссост эрямонть паролгавтоманзо туртов. 
Василий Петрович – тосонь велень прявт, Анастасия Гавриловна – «Атяшевский дом народного творчества» МБУ-нь тонавтыця, викшнемань, кодамонь, стамонь кружоконь ветиця. Вейкесь – кемексты эрзянь раськень кезэрень шкинемань тевтнень, омбоцесь – мазылгавты, кепеди тиринь велензэ. Сынь чачсть-кассть ве велесэ, вейсэ чийнесть-налксесть эйкакшпорасто, яксесть школав. Вечкемась ютксост чачсь Н.П. Огарёв лемсэ университетсэ тонавтнемстэ, Настя прядызе Национальной культурань институтонть, Василий – Механикань ды энергетикань. Тейтересь учизе армиясто, вейсэ сынь туекшнесть Московов важодеме, ансяк тиринь ёнксось тердсь мекев ды, велявтозь, 2014 иестэ Сидоровтне налксизь свадьбаст.

«Монень эзь вечкеве покш ошось, марявсь пек стакакс, ежонь колыцякс. Минь – велень эрицят, тенек эрявсь ванькс кошт, ледстневсть паксятне, виртне, певтеме пертьпельксэсь, – ёвтни Анастасия. – Вася маринзе-неинзе монь мелявтоман ды минь велявтынек. Монень уш алтакшность важодема тарка Отяжелесэ, секскак сеске ушодынь эсь вечкевикс тевем – карминь эйкакштнень викшнеме тонавтыцякс. Василий те шкане лездась тетянстэнь, важодсь «Сабанчеевское» ООО-сонть, шкань ютазь промкссо сонзэ кочкизь велень прявтокс. Икелень прявтось В.В. Сайгушкин тусь пенсияв ды эрявкшнось од, эряза, тевде а пелиця ломань. Василий зярс-бути кавтолдсь, ялатеке марясь ламонь пельде васень шкастонть лездамодо валт ды согласясь».

Василий Петрович полады нинзэ валтнэнь ды тешксты тиринь веленть касомасо-кепетемасо «Сабанчеевское» ОАО-нь прявтонть Д.Н. Игушкинэнь покш таликанзо. «Минек велесь пек уцяскав. Дмитрий Николаевич весе виензэ, ярмаконзо бажи максомс Сабанцеленть мазылгавтомантень-паролгавтомантень. Вейкеяк энялдомам а кадсы мельтеме. Пек паро, зярдо велесэнть ули кеме, сюпав хозяйства ды прявтось аволь ансяк эсь прядонзо арси»

Василий Петрович а ашти таркасонзо, свал арсемасо, мелявтомасо. Эдь весе сень кисэ, мезе минь тешкстынек, эрявсь сермадомс ламо яволявтомат, анокстамс вайгельпешка коневт, чавомс ламо кабинетт. Кода корты эрзянь валмеревксэсь, кинть ютасы молицясь. Ды те алкукскак истя! Велень азоронть мельсэ-превсэ эште вейке арсема – кода бу стявтомс куншкакуронтень вишка эйкакштнень туртов налксемань площадка. Арси таго варчамс тень теемс нацпроекттнэнь вельде. Вешицятнеде пек ламо, васняяк эсензэ кавто тейтерьканзо. Полинанень ней кото иеть, Янанень – курок ие ды пель карми. Сынст туртов истямо курынесь кармаволь паро оймсема таркакс. Эйкакштне Сабанцелесэ улить, кизна седеяк ламолгадыть, сыть покштяст-бабаст туртов ошонсетне ды велень инфраструктуранть паролгавтомась кенярдовты эрицятнень. Содатадо, кодат тесэ кизэнь каникуласто турнирт эрсить! Мельспаро. Ансяк, вана, кезовось ней ютавтомс а максы.

Велявттано эно велень тевтнестэ Сидоровтнень семиянтень. Василий ды Анастасия ломантне неень шкань, кавонест ардтнить машинасо, важодить, кастыть эйдеть (Полина якси эйдень кужов, Янань яла сырькайтненень ильтясызь), кирдить пире ды овсе а янксить, што кадовсть велес.

«Минь мейсэяк а явовтано ошонь семиятнень эйстэ ды а правтано тов, – корты Анастасия. – Лован, велесэ коштонок седе паро ды минь ярсатано эсенек кедьсэ кастозь эмежтнеде, касттано шумбра эйкакшт. Эрятано ялгаксчисэ, одкстомтынек сырькаень кудонть, парсте витнинек, озавтынек сад-пире, кизна чоп аштетяно вальмало, яксетяно а васоло виртнес кстый, мастумарь, панго мельга. Пароль бу, эйдень кужосо, школасо, велень клубсо эште панжомс эрьва кодат кружокт, аволь ансяк эйкакштнень, од ломантнень, семиятнень туртовгак – седеяк бу покш лезэ улевель. Минек велесэ эште улить од семият, конатнень марто вастневтяно, вейсэ ютавтнетяно оймсемань ды кенярксчитнень. Арсян, кие а пели важодемадо, мусы сонзэ велесэяк. Сабанцелесэ ули велень хозяйства, лия ёнов роботамо эрьва валске учить эрицятнень предприятиятнестэ автобустнэ. Велесэнть улить зярыя лавкат, недлязонзо весть-кавксть сакшныть курмонь-кармонь, оршамопелень микшницят, стявтнить вере пес палаткат, базаров а эряви ардомс, ардтнить автолавкат эрявикс продукта мартояк…»

Сидоровтне тиринь велест ловить сехте мазый таркакс, тесэ чачсь сынст вечкемаст, семияст ды сонзэ марто сынь бажить сюлмамс весе эрямост. Василий ды Анастасия а явить кудонь тевтнень, сынь весементь теить вейсэ ды арсить, вечкемась – те вейке-вейкень покш мельванома. Вандынь семиянь, вечкемань, кемемань кенярксчинть сынь тешкстасызь мельспаросо: столь лангсо кармить сехте тантей эрзянь каванямкатне ды, нама, Одай вирень цецятне-пейделькатне.

Вейсэнь важодемась канды паро видьмекст. Нама, лездыть теньсэ нацпроекттнэяк, конатнень вельде Сабанцелесэ аволь умок стявтозель футболсо, волейболсо налксемань площадка, тренажерт, витнезель хоккейсэ налксемань кортось. Тедедень кизна ацазь асфальтсо Пумбрань ве ульцянь килангось. Веленть куншкакуросо одкстомтозь Ине Отечественной войнасо чавовозь солдаттнэнень кеврунгось, лангозонзо сермадозь весе ветерантнэнь лемест, стявтозь локальной войнатнень участниктненень памятник-бронетранспортер. Куншкакурось колмошка иеть кода мазылгавтозь цецясо, тозонь озавтозельть килейнеть, пичеть, путозельть озамо таркат ды чокшне валдомтома фонарть. Велесэнть шукшонь пурнамонть туртов эрьва ульцяванть путнезь сатышка контейнерт. А стяко Мордовиянь Прявтонь тевтнень топавтыцясь местной самоуправлениянь чинть тешкстамсто казизе велень азоронть Сюкпрянь коневсо. Сабанцеле велень поселениясь а весть лиснесь райононь ды республикань трудонь соперничествань пелькстамотнесэ, кенярксчитнень конкурстнэсэ изницякс.

Василий Сидоров жо арси Теньгушбуень Шокша велень одкстомтоматнеде. Весе, арсетяно, марсиде, зяро тозонь састь од эрицят лия ёнкссто, рамсесть кудот, панжсть эсест вишка производстват ды велесь одс чачсь. Сабанцелесэяк кадозь кудотнеде ламо, важодема таркатнеяк муевить тесэнь хозяйствасонть. Секскак велень азорось терди ошонь эрицятнень васняяк самс инжекс, кортнемс-теемс ды цюртамс эрямо тарка. Мазычись Корен пандо ало веленть а ёвтавишка! А мезть кортамс, садо, ванынк эсь сельмсэнк!

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».