Четверг, октября 28, 2021
Важное

А.И. Полежаев лемсэ музеесь зярдояк а эрси чаво. Августонь 25-це чистэ тезэнь сакшность ламо инжеть. Те чистэнть тесэ тешкстасть Мордовиянь народной сёрмадеенть А.Д. Куторкинэнь чачома чистэнзэ саезь 115 иетнень топодеманть. 

«Народной сёрмадей» – истя лемдезель фотографиянь, книгань, документэнь выставкась, конась ёвтни сёрмадеенть эрямо кидензэ, сонзэ книгадонзо: «Раужо палмань» историко-революционной романдонть, «Ламзурь» героической поэмадонть, «Покш ки лангсо умарина» стихсэ романдонзо, «Лажныця Сура» роман-трилогиядонть. Неть ды лия сёрмадовкстнэнь кисэ сонензэ максозь «Мордовиянь народной писатель», «Мордовиянь заслуженной писатель» лемтне, Мордовиянь Государственной премиясь. Сехте жо покш казнесь – ловныцятнень вечкемась.
Кода уш ёвтынек, выставканть анокстызе А.И. Полежаев лемсэ музеесь, А.Д. Куторкинэнь лемсэ литературной конкурсонть жо – «Рузаевская газета» редакциянть прявт редакторось Людмила Резяпкина вейсэ сёрмадеенть трямс саезь цёранзо Михаил Дёма ды музеень прявтонть Валентина Шведкова марто. Пелькстамонть информационной ялгакс кармась «Эрзянь правда» газетась. Литературной конкурсонть спонсорокс истя жо кармасть А.Д. Куторкинэнь роднянзо-раськензэ.

Весемезэ конкурсонтень кучозельть кемготово материалт: ёвтнемат, стихотвореният, газетасто, журналсто статьят. Сынст ваннозь, жюрись сайсь мельс явомс кемгавтово кучовкстнэнь. Эйстэст нилетне лововсть изницякс, кавксотненень истя жо максозельть казнеть.

Мордовиянь содавикс журналистэсь, А.Д. Куторкинэнь роднясь-раськесь Людмила Резяпкина ёвтынзе сёрмадеенть лемсэ Литературной пелькстамосо изницятнень, те – Алексей Музалев (поэтической сёрмадовкст рузонь кельсэ), Александр Бушуев (прозасо сёрмадовкст рузонь кельсэ), Марина Девятова (журналистской важодема, конась алтазь Мордовиянь сёрмадейтнень ледстнеманть ванстомга), Геннадий Гребенцов (эрзянь кельсэ сёрмадыця прозаик). Тешкстазельть эштё: Раиса Щанкинань, Татьяна Швецовань, Борис Ерюшевень, Александр Шилинэнь ды Анжелика Горбуновань, Ольга Кузнецовань, Юлия Никишанинань ды Юрий Резяповонь важодемаст.
Пурныцятненень пшкалинь монгак. Ледстнинь, кода 1986 иестэ якинек Чувашияв, А.Д. Куторкинэнь тиринь велев кинонь снимамо. Лембе кортамот, вастовомат… Весе те а стувтови, весемесь совась кинос.
Музейсэ выставкась поладови. Секскак тердтяно весень лажныця Сура чирень сёрмадеенть марто вастовомо.

Геннадий Гребенцов

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».