Вторник, марта 19, 2024
Важное
Отяжелень райононь прявтонть Константин Николаевич Николаевень марто те минек колмоце вастовома. Кавтотне ульнесть, зярдо сон эштё топавтыль прявтонь тевтнень ды ансяк теевиль содавиксэкс те а шожда тарканть марто. Колмоцеде вастовозь, сеске неявсь, сон целанек чопавтсь те эрзянь ёнксонть тевтнес-мелявкстнэс, кода кеме азор, вастымизь администрациянть вакссо, косо ванкшнось районганть веледе велес ардтниця маршрутканть.

Толковизе, Отяжелень райононь эрицятнень туртов арсеви панжомс социальной карта. Уш молить кортамот банктнень марто. Эштё вейке арсемась, штобу ЖКХ-нь пандоматнень пенсионертнэнь туртов банктнесэ саевельть проценттэме. Тень коряскак ушодозь тевтне вейке содавикс финансовой учреждениянть марто, конась истя жо явсь мель лездамс тесэнь эрицятненень вишка процент марто кредитэнь максомасо, конась маштови кудоюткова ремонтонь теемс. Ды ламо лия мельть-арсемат, проектт прявтонть превсэ, конатнеде минь карминек содамо мартонзо кортамсто. Сон ломанесь аволь журналисттэ кекшниця ды, кода тенек мерсть тосонь эрицятне, зярс весе сыцятненьгак-пшкадицятненьгак васты апак музгорде ды
бажи весень кунсоломс, кевкстематнень, бути сынь топавтовикст, максы вал теемс ды а стувтни теде. Ломантне тесэ кемить властенть лангс, эдь районсонть молить редявикс полавтовомат ды сынь поладовить седе товгак.
- Константин Николаевич, кодат проектт, программат топавтовить 2023-2024 иестэ Отяжелень районсонть эрицятнень эрямост-аштемаст шождалгавтомга, мелест топавтомга?
– Отяжелень районсонть ламо мезе тееви «Комплексное развитие сельских территорий» госпрограмманть коряс ды аволь ансяк
прявт посёлкасонть. Покш ды вишкине велетнесэяк. Вана, невтемга, сайсынек Тетюши веленть, конась Отяжеленть вакссо. Тосо
строявить колмо башка кудот социальной сферасо важодицятнень
туртов, конатне кадовсть эрямо тиринь ёнкссо эли састь тей лия
таркасто. Кудотне малав уш анокт, арсетяно, уш июньстэ азортнэ совить эйзэст эрямо. Тоско жо карми витневеме 1941-1945 иетнень Ине
Отечественной войнань участниктненень памятникесь, кода Отяжеле велесэяк, косо кеврунготне уш пек таштомсть.
Ушодынек Аловелень куншкакуронть одкстомтомо, васняяк тейтяно площадка, мейле тозоньстявттано оймсемань зона. Омбоце этапось – паролгавтомс маласонзо аштиця войнасо чавовозь воинтнэнень памятникенть, конанть карматано тееме сыця иетнестэ.
Эйкакштненень ды тетятненень-аватненень налксемань-оймсемань
площадка тееви Таразбуень прявт куросонтькак.
Весе уш содыть, молить витнемат Ламбаське велень Культурань
кудосонть, сон уш анок 50 процентс, арсетяно, июльстэ несынек кудонть весе мазычинзэ. Те покш тевесь топавтови «Культура» нацпроектэнть лувсо. «Комплексное развитие сельских территорий» госпрограмманть вельде одкстомтови маласо аштиця ульцяськак, тосояк кармить оймсема-озамо таркат, налксема площадка.

 

А стувтсынек Отяжеле посёлкантькак, ламо квартирас кудотнень перька стявттано налксемань зонат, витнесынек-петнесынек кой-кона кудо икелькстнэнь. Июльстэ «МАПО-ТРАНС» ООО-сь, конась изнясь пелькстамосонть, ушодсынзе витнемань тевтнень Отяжелень
автомобильной китнень лангсо ды посёлкаванть теи автопарковкат, конатнеде тесэ пек аламо. Китнень капремонтось уш ушодовсь «Сараст» нармунень совхозсонть, тосо жо вельтяви асфальтсо Культурань кудонь икельксэськак, тееви паро парковка.
– Ламо мелявкст яла эрсить тетявтомо-ававтомо эйкакштненень
эрямо таркань рамамонть коряс. Кода тень кувалма аштить тевтне
Отяжелень районсо?
– Тевтне молить. Вана улкоть минь вейсэ райононь прокуроронть марто
мельспаросо ванкшнынек истят эйкакштнень туртов кавто квартиратнень, конатнень администрациясь раминзе Отяжеле посёлкасо. Квартиратне вадрят, од ремонт марто, валдот, сантехникась од, совак ды эряк!
– Кодамо лезкс максови СВО-нь участниктнень семиятненень?
– Весе пшкадематне, конатнень марто сакшныть спецоперациянь участниктнень тетяст-аваст, нист, эйкакшост – весе монь пшти вановт ало. Вейкеяк энялдомась а кадови лезкстэме, бути те минек вийсэ. Бути кармавтан теемс кодамояк тев, шкань ютазь монсь молян ваномо, кода топавтозь.
Вана, саемга, аволь умок, ардтнинь Аловелев. Тосонь эрицянть, Светлана Васильевнань, цёразо уш пельие тюри неонацисттнэнь каршо. Сонсь авась мирдензэ марто рамасть кудонь уштомань система ды пшкадсь сонзэ путомга. Теньсэ лездась «Сабанчеевское» ООО-нь
прявтось Д.Н. Игушкин, явсь ярмакт, ды тевесь прядозель. Те велень хозяйствась истя жо лездась путомс Дюрькинань семиянтень ведень насос ды уштомань котёл.
Тетюши велень воинэнь авантень лездынек теемс од пирявкс.
Таштось уш пракшнось. А. И. Никитин ИП-сь рамась тензэ профлист,
кучсь бригада ды Покш Манадыши велень поселениянь прявтонть А.И.
Гурьяновонь марто вейсэ пирявксось стявтозель. Каменкасо В. М. Николинань КФХ-сь лездась ютавтомс
СВО-нь участникень семиянтень од электропроводка. Неть читнестэ сась энялдома Ушаковкасто, косо мобилизованноень авась вешсь лезкс кудопотмонть витнемс-петнемс. Ёвтась, строицянь бригадась, конань сон муизе, веши ламо ярмакт. Минь лездынек тензэ теемс
од смета ды кучтано лия строицят. Велетнесэ СВО-нь участниктнень семиятне свал сюлмавозь поселениянь прявттнэнь марто.
Бути эряви ускомс врачнень, путомс сэредицянть больницяв, кучомс тиринь ломанест туртов кудосто казнеть, весемесь топавтови куроксто ды шкастонзо. Лездатано сынсест мобилизованнойтнененьгак. Райсоветэнь депутаттнэ чокшне ланга роботамодо мейле Культурань центрасонть кодыть маскировкань алтымат (сетть), кода Дюрькина велень аватнеяк. Пурнатано ды кучтано гуманитарной лезкс, оршамо- ды ярсамопельть, школасо тонавтницятне, эйдень кужов якицятне
сёрмадыть-артыть цёратнень туртов сёрмат. Кияк апак стувто, эсенектнень а кадсынек! Минь мартост вейсэ!

Тешкстама: Отяжелень муниципальной районось теезель 1928 иень
июлень 16-це чистэ, тедеде тензэ топодить 95 иеть. Сонзэ эйс совить 6
велень поселеният ды вейке – ошонь.
Весемезэ эйсэст 55 велеть ды посёлкат. Райононть покшолмазо 1095,8
кавонзазь вайгельбеть. Эрицятнеде – 15,6 тёжадо ламо ломанть.

Тешкстама: Константин Николаев чачсь 1987 иестэ Саранск ошсо, ансяк ундоксонзо молить Дубенкань ды Атюрьевань районтнэстэ, косто тетязо ды авазо. Прядызе Н. П. Огарёв лемсэ МГУ-нть «Статистика» специальностенть коряс, ули магистрань квалификациязо «Прикладная статистика и эконометрика» программанть коряс. Экономикань наукань кандидат. Ульнесь МР-нь Минфинэнь
отделэнь консультантокс, роботась «ТГК-6» ОАО-нь филиалонь инспекторокс. Мейле ульнесь МР-нь Премьер-министрань лездыцякс,
седе тов – прявт лездыцякс, правительствань аппаратонь прявтокс, премьер-министрань прявтокс. 2023 иестэ аравтозель Отяжелень
икелень прявтонть полавтыцякс. Седе тов топавтсь прявтонь тевтнень. Апрелень 19-це чистэ кочказель муниципалитетэнть прявтокс. Ули МР-нь Финансонь министрань Благодарностезэ, казезь «За вклад в проведение Чемпионата мира по футболу» медальсэ.
Урьвакстозь, ули цёрынезэ.

Марина ДЕВЯТОВА

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».