Вторник, марта 19, 2024
Важное

Отяжеле велень средней школась, лангс ваномс, мейсэяк а явови минек масторонь тёжат лия школатнень эйстэ. Ансяк те аволь истя. Тесэ уш кевейкее иень перть роботы «Отечество» отрядось, конась сови минек республикань патриотической вейсэндявксонтень. Те отрядонть ушодыцясь – Отяжелень школань англань келень тонавтыцясь, воспитаниянь коряс директоронь советникесь, волонтёрось, тиринь ёнксонь ды масторонь вечкицясь Людмила Анатольевна ФЕДОТОВА. 


Те мазый эрзянь аванть чачома ёнксозо – теке райононь Сабанцеле велесь, ды, видьстэ меремс, тосто ушодовияк Отяжелень райононь Ине Отечественной войнань участниктнень вешнемань движениясь. Ведьгеменьшка иеде теде икеле Сабанцелесэ панжозель «Гренада» поисковой отрядось, конань ушодыцязоль школань директорось, содавикс тонавтыцясь, алкуксонь педагогось Мария Ивановна Данилова. Колоньгемень иеть Данилова ульнесь школань прявтокс ды прянзо невтизе аволь ансяк кода покш буквасто Тонавтыця – икелев ветиця! Сонзэ вечкилизь покштнеяк-вишкинетнеяк. Вечкильть ды пек пелильть Мария Ивановнань мельдензэ. Арасель ве ломаньгак велесэнть, кона бу молевель те виев эрзянь аванть каршо. Школасонть ульнесь дисциплина, тонавтнемас бажамо, ды вейкеяк эйкакш урокто мейле эзь чийне ушова тевтеме. Панжозельть секцият, кружокт, ветявиль виев внеклассной робота патриотической воспитаниянть коряс. Самай се шкастонть школасонть панжовсть историко-краеведческой музеесь ды «Гренада» вешницянь отрядось. Вейсэ тонавтницятнень марто школань прявтось лангс ливтинзе стувтозь солдаттнэнь лемест, пельксэнь-пелькс пурнась войнасо тюрематнеде историятнень, фотографиятнень, ледстнематнень…

Мария Ивановна Данилова уш зярыя иеть арась ютксонок, лепамсь Сабанцелень вешницянь отрядоськак. Ансяк эзизь стувто те тевенть ды те ушодксонть тонавтницянзо. Вейкесь эйстэст ульнеськак Люда Федотова (тейтерькс Обмайкина), кона поладызе Мария Ивановнань тевензэ ды ульнесь «Гренадань» прявтокс 2006 иестэ саезь 2011 иенть самс. Мейле Федотовтне тусть эрямо Отяжеле велев, ды Людмила Анатольевна ушодызе важодеманзо тосонь средней школасо. Вешнемань отрядось панжовсь а сеске, васняяк те лувонть ланга Людмила Анатольевна кортазевсь эйкакштнень марто, ютавтнесь патриотической урокт, вешсь сёрмадомс покштядост-бабадост ледстнемат. Вете иень ютазь, содамочитнень пурназь, виензазь, Людмила Анатольевна сайсь мель лемдемс отрядонть – «Отечество» ды седе эрязасто ушодомс вешнеме материалт Ине Отечественной войнань ды тылэнь участниктнеде, войнань эйкакштнеде. Шкась налксесь сынст каршо. Кармасть куломо покштятне-бабатне, конатне ульнесть те войнасонть, сынст нист, конатне печтясть стакачить кудосо… Сестэ самай панжозельть Россиянь Миноборонань сайттнэ, кода «Подвиг народа» ды «Мемориал», косо весень туртов невтезель ламо иень перть кекшезь информациясь чавовозь, пленс понгозь, кулявтомо ёмазь воинтнэде. Тонавтницятне ней уш сынсь кармасть лездамо пачтямс од кулятнень тиринь ломантнеде сыре дедатнень ды бабатнень, роднятнень-раськетнень туртов.

Молить иетне, полавтыть вейкест-вейкест тонавтницятне. Ламо мезе теезель, ламо эштё сави теемс. «Отечество» школань отрядось келемтинзе сёлмонзо, кармась содавикс Мордовиянть келес, совась «Поиск» региононь патриотической вейсэндявксонтень, конань командирэсь Н. А. Кручинкин. Отяжелень средней школасонть 2011 иестэ панжозель кадетэнь васенце классось, мелят уш нолдазель колмоце составось. Тедеде Людмила Анатольевна Федотова, кода классной руководитель, омбоцеде сайсь кадетэнь класс, козонь совась кевейкее тонавтниця, конатне истя жо совасть патриотической отрядонтень. Вейкеяк мероприятия районсонть а юты Отяжелень школань боецтнэвтеме. Эдь те аволь ансяк вешнемань вейсэндявкс, васняяк, те тевтеме а аштиця, тиринь ёнксонь ды масторонь вечкиця од ломанень куро, конанть туртов ветявить мастер-класст, ютавтовить поисково-краеведческой экспедицият, сынь артыть рисункат, снимсить видеороликть пелькстамотнес, ветить эсест куро «ВКонтакте» соцсетьсэнть… Суртнэ а сатыть ловомс, зяро мероприятиясо сынь невтизь пряст тедеде. Тешкстасынек ансяк сехте сельмес каявицятнень. Сынь васенцеть патриотической акциятнесэ, вастовоматнесэ, форумтнесэ, поисковой отрядтнэнь слёттнэсэ, невтемакс, «Кияк апак стувто» меельцесь ютась августонть прядовомсто Рузаевкань районсо. Тов якасть Елена Русяева ды Виктория Раздолькина.

Поладовить Ине Отечественной войнань чавовозь солдаттнэнь вешнематнеяк. Тедедень тунда Отяжелень тейтерькатне ды цёрынетне ульнесть Калужской областень Харики велесэ, конань модатнестэ таргасть кавксоньгемень чавовозь солдатонь пелькст. Августсто боецтнэ якасть сынст калмамо. Зярдояк а стувтови Покш Березникень районсо ютавтозь «Сурский рубеж» проектэсь, косо эйкакштне ансяк вейке чис, теке «шкань машинанть» вельде, велявтсть 1941 иень телень цят якшамо читнес ды ташто телогрейкасо чувсть рубеженть таркасо кекшнемань окопт ды траншеят. Аволь умок, октябрясто, ютась Весероссиянь школань поисковой отрядтнэнь слёт Краснодарской краень «Орленок» лагерьсэ, ков истя жо пачколесть «Отечествань» боецтнэ Мария Вечканова, Ирина Потапова, Виктория Раздолькина. Ды свал мартост, эрьва косо, эрьва тевсэ, сынст прявтост – Людмила Анатольевна Федотова. Сон эдь аволь ансяк тонавты од ломантнень, сонськак ламодояк ламо пельксты, тонавтни ды ардтни. Октябрясто тонавтыцясь якась Классной руководителень форумов, ноябрясто вейсэ тонавтницянзо марто «Орленоков» – педагогонь квалификациянь кастомань проектэв. Аволь умок Людмила Анатольевна изнясь «Нам доверена память!» раськеютконь конкурссо – сайсь васенце тарка «Поисковое движение в XXI веке» творческой роботанть кисэ!

Тонавтницязо Анастасия Пивцаева сайсь омбоце тарка «Геройтне минек ютксо» фильманть кисэ. Ды нейгак, неть строчкатнень сёрмадомсто, Людмила Анатольевна пачтясь куля: сон Московсо «Судьба солдата» раськеютконь конференциясо, конань анокстыцясь РФ-нь Общественной палатась. Ды таго покш изнявкс – I-це степенень диплом! Оймамонь а содыця седеесь терди, эдь истят вастовоматне максыть од содамочить, конатнень, тосто велявтозь, сон пачтясынзе эйкакшонзо туртов. Кастомс алкуксонь патриотт, невтемс од ломантненень виде киланго – истямо Федотовань эрямо лувозо масторонть лангсо. Истямокс сонзэ тризь-кастызь тетязо-авазо, тонавтыцянзо. Секскак сон, кода ава, кода тиринь масторонь певтеме вечкиця ды кисэнзэ аштиця, бажи тенень тонавтомс эсь кавто цёранзояк ды тонавтницянзояк.

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».