Вторник, марта 19, 2024
Важное

Кезэрень шкасто саезь Ине посттонть икеле Мастянь кенярксчитнестэ ломантне яксесть шабрава ды раськева инжекс, вейкест-вейкест каванясть тантей пачалкседе ды прякадо. Те иестэ самай истямо шкантень савсь Орданьбуень моданть лангсо республикань журналисттнэнь православной тевень коряс пурнавомась. Тувталоськак тенень ульнесь мелень кепедицякс ды седеень витицякс.

Рузонь Православной Церьковань Орданьбуень ды Отяжбуень епархиясь вейсэ МР-нь Журналистэнь вейсэндявксонть марто яволявтокшность «Минек валось велявты» («Наше слово отзовётся») журналистэнь пелькстамо.
Ладязь чистэнть Орданьбуень ды Отяжбуень епархиянь епископонть Вениамин владыканть чанстямонзо коряс ютавтозель вастовома республикань журналисттнэнь марто, косо теезельть конкурсонь коряс цётамотне ды ульнесь седейшкавань кортамо Вениамин владыканть марто.

Сень мельс саезь, республикасонок журналисттнэнь ютксо истямо пелькстамось яволявтозель васенцеде, конкурссо изницятнень ды тов весе сыцятнень кевкстемаст ульнесть пек ламо.
Кортамось мольсь Пазнэнь кемемадо, течинь эрямодонть, православиянь темас сёрмадомадо, одтнэнь духовно-нравственной лувсо кастомадо ды истя седе тов.

Те покш чись ютавтовсь Орданьбуень ды Отяжбуень епархиянь управлениясо, ков тердезельть республикань, райононь ды электронной СМИ-тнесэ важодицятне, малав весе сеть, кить кучизь сёрмадовксост ванкшномантень. Тешкстасынек, жюрись ванкшнось 21 важодевкс.

Васняяк пурнавозтненень седейшкавань вал марто пшкадсь Вениамин владыкась. Сон ёвтась сюкпрянь валт журналисттнэнень вейсэнь важодеманть, православиянь темас сёрмадоманть кис.
– Духовной эрямось – те минек эрямонь юр, – мерсь владыкась. – Весе тынь, кить течи тезэнь пурнавиде, оймень коряс мольтядо вейке-вейкень ёнов, весе сёрмадтадо православиянь темас материалт. Эрьва ломаненть ули вечкевикс тевезэ, сехте эрявиксэсь – а ёмавтомс сонзэ. Минь тынк марто топавттано вейсэнь тев, конась канды ломантненень лезэ духовно-нравственной ёнксонть коряс. Паздонть кортамсто, минь мельсэнек-превсэнек кирдтяно вечкеманть, нравственной ёнксонь кемекстамонть. Кадык вейсэнь тевенек канды лезэ.
Седе тов Вениамин владыкась макссь грамотат ды казнеть пелькстыцятненень. Минек «Эрзянь правда» газетань отделэнь прявтось Валентина Юдина лиссь изницякс «Республиканские СМИ» номинациясонть.

Мордовиянь райгазетань журналисттнэнь ютксто васенце таркатнень эсь ютковаст явизь «Вперед» Атяшевань райгазетань прявт редакторонь полавтыцясь, социальной политикань отделэнь редакторось Галина Кажаева ды Краснослободской райононь «Красная Слобода» изданиянь экономикань отделэнь редакторось Светлана Репникова.
Республикань электронной СМИ-тнень ютксто васенце тарканть саизе ВГТРК ФГУП-нь филиалонь «Мордовия» ГТРК-нь корреспондентэсь Екатерина Евстигнеева.

Райгазетатнень ютксто омбоце таркатне максовсть «Новая жизнь» (Дубенкань район) изданиянтень, Орданьбуень «Маяк» райгазетань журналистэнтень Валентина Коновалованень.

Колмоце таркатне электронной СМИ-тнень ютксо максовсть истя: НТМ-стэ – Юлия Мамаеванень, «ТелеСеть Мордовии» (10 канал) – Людмила Кусерованень, районной СМИ-тнестэ – «Присурские вести» газетасто Валентина Лузинанень, Покш Игнатовань райононь «Восход» прявт редакторонтень Марина Моисееванень, Кочкуровань райононь «Заря» газетасто Иван Потапкиннэнь, республикань СМИ-стэ – «Известия Мордовии» газетань журналистэнтень Александр Ефремовнень.
Те пелькстамосонть ёрокчист невтеманть кисэ Благодарностьсэ казевсть истят райгазетатнень редакциятнестэ сёрмадыцятне, кода «Ельниковская трибуна» – Елена Носова, Зубова-Полянань «Время и жизнь» – Людмила Цыплякова, Ицялонь «Земля и люди» – Наталья Смирнова, «Рузаевские новости» – Надежда Подлипалина, «Голос Примокшанья» – Людмила Шестопалова, «Торбеевские новости» газетань коллективесь, «ТелеСеть Мордовии» (10 канал) – Павел Степаненко.

СЁРМАДОВКСОСТ
ЖУРНАЛИСТТНЭ НОЛДЫТЬ СЕДЕЕСТ ПАЧК

Теке жо чистэнть Орданьбуень ды Отяжбуень епархиясо ютавтовсь «кругловой столь». Сонзэ истя жо панжизе ды ветясь Вениамин владыкась. Кортамось ульнесь православной кемемадонть ды массовой информациянь средстватнень вейсэнь важодемадост. Те темась неень шкане пек эрявикс ды талновтыця.

– Сеть валтнэ, конат ловныцятненень ды ваныцятненень пачтявить электронной ды печатной СМИ-тнень вельде, невтить эрямо лувонть, лездыть духовно-нравственной ёнкстнэнь кочкамонтень, – мерсь МР-нь Журналистэнь вейсэндявксонь прявтось Людмила Резяпкина. – Республикань, райононь прессась, Мордовиянь телеканалтнэ эрьва ёндо панжить православиянь теманть. Журналисттнэ чарькодить, кодамо шкасто минь эрятано. Ней ловови пек эрявикс тевекс – вейсэндявомс алкуксонь питнейчитнень перька.
Орданьбуень ды Отяжбуень епархиянь религиозной образованиянь ды катехизациянь отделэнь прявтонь полавтыцясь, медицинской наукань докторось, профессорось Надежда Плотникова совась важодевкстнэнь ванкшномань жюринтень. Сынст марто содавиксэкс теевемадо мейле сон пачтясь неть публикациятнень эрявиксчидест. Надежда Алексеевнань валонзо коряс, весе материалтнэ сёрмадозь тевень содазь.

– Весемева неявсь, малав эрьва публикациянть, сюжетэнть журналисттнэ нолдызь седеест пачк. Тень ловозь, саинек мель изницятнень кочкамс колмо лувонь коряс. Истя, минек улить изницянок кода райгазетань, республикань изданиятнень, истя жо электронной СМИ-тнень эйсэ, – мерсь Надежда Плотникова.
«Кругловой стольсэнть» кортамось ульнесь седейшкавань. Кода мерсь Орданьбуень ды Отяжбуень епископось Вениамин, эрьва священнослужителентень эрямонзо перть сави кунсоломс ламо ломанень уцяскадо пачтямот. Сонензэ весе вийтне максомат эсензэ приходонть духовно-нравственной ёнкстнэнь кемекстамга, обществанть ванстомга. Секс сёрмадыцятненень эряви ёвтнемс священниктнень ланга, кемемантень самонь кидест ды одтнэнь паро ломанекс кастомсто сынст путовкстост.

Тень коряс важодемадонть пурнавозтненень ламо ёвтнесь печатень ветеранось, «Присурские вести» газетань собкорось Людмила Кувелева. Людмила Николаевна ламо иеть важодсь райгазетасо, нейгак полады сёрмадоманть православиянь темас.
Те пелькстамонть эрявиксчидензэ ды седе тов сонзэ поладомадонть пачтясь Покш Игнатовань райононь «Восход» газетань прявт редакторось Марина Моисеева.

Вастовомас сыцятне прасть вейке мельс – седе сеедьстэ вастневемс, вейсэ якамс паломникекс ды содавтнемс республикань храмтнень.
Истят вастовоматне эждить седей, кепедить мель икелепелевгак седе парсте сёрмадомс.

Валентина ЮДИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».