Вторник, марта 19, 2024
Важное

Исяк, ноябрянь 8-це чистэ, минек республикасо тешкставсь Велень хозяйствань ды перерабатывающей промышленностень важодицятнень чись. Кенярксчинь промксось ютавтовсь И. М. Яушев лемсэ Оперань ды балетэнь театрасо. Мордовиянь Прявтось Артём Здунов лембе поздоров марто пшкадсь пурнавозтненень, сынст вельде – региононь АПК-нь весе важодицятненень. 

 

«Минек республикань агропромышленной комплексэнь мельвановикс важодицят! Течи пек покш кенярксчи. Арсян, кшинть ды моданть марто важодицятнень кенярксчись – те обществанть юрозо. Можна сёрмадомс программа, можна важодемс производствань аравтлувтнень коряс, ансяк эрьва чистэ минь стятано ды арсетяно, мезде андомс семиятнень, мезде андомс весе ломантнень, – тешкстызе Артём Алексеевич. – Сюкпря Пазонтень, улить ломанть, кить аволь ансяк сынсь важодить те тевсэнть, истя жо кастыть покш династият, сынь кадовить отраслясонть, ковгак а туить, важодить моданть лангсо, виевгавтыть эсь бизнесэнть. Минек туртов те – Пазонь лезкс, Мордовиясо теезь истямо лув».

А. А. Здунов тешкстызе, те иесь велень хозяйстванть туртов ульнесь а берянь, республикасонть пурназь пек паро урожай – 1,7 миллионт тоннат сюро. Истя жо пурназь пиже кснавонь рекордной урожай. Свалшкань касома невти ракшань трямонь-кастомань отраслясь. «Мордовиясь масторонь келес саи васенце таркатнень алонь производстванть коряс. Вадрят невтевкстнэ ловсонь производстванть коряс. Редяви касома органической продукциянть нолдамонзо коряс. Эряви ёвтамс, те кевкстемась ашти РФ-нь Правительстванть вановтонзо ало, – мерсь республикань Прявтось. – АПК-нь ёнкссонть эрямос совавтовить зярыя од проектт. Те ламосо ливти отраслянть икелев. Ды теньсэ весемесэ покштояк покш путовксось тынк – велень хозяйствань ды перерабатывающей промышленностень важодицятнень».

Кенярксчинь вастовоманть лувсо отраслянь важодицятненень явшевсть государственной казнеть.

«За заслуги перед Отечеством» II-це степенень орденэнь медальсэ казезь Александр Иванович Атласов – «Ромодановосахар» ООО-нь прявтось.

«Россиянь велень хозяйствань заслуженной роботник» лемесь максозь «Сабанчеевское» ООО-нь потявтыцянтень Марина Дмитриевна Тикшайкинанень.

Российской Федерациянь Президентэнь Благодарность ёвтазь «Мясоперерабатывающий комплекс «Атяшевский» ООО-нь прявтонтень Владислав Валентинович Бирюковнень.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».