Воскресенье, мая 26, 2024
Важное

2023 иесь – МР-нь Някань государственной театранть туртов юбилейной ие. Январень 1-це чистэ театрась тешкстынзе 85 иетнень. Весе те иенть перть ютавтовить мельстуиця вастовомат.

Эрьва оймсема читнестэ вишка ваныцятнень туртов невтевить спектаклят, лия читнестэ театрась ардтни республикань районтнэнь ды Саранскоень школатнева, эйдень кужотнева. Теде башка, театрасонть ушодовсь А. Веселовонь «Солнышко и снежные человечки» пьесанзо коряс путовксонть лангсо важодемась. Премьерась невтеви театрань од сезонстонть.

Някань театрасо поладовить «Знакомство с закулисьем» экскурсиятне.  Тонавтницятне содавтовить театранть историянзо, някатнень марто важодемань тевенть марто, сыненст ёвтневи актёронь-кукловодонь профессиядонть, седе, кода теевить някатне, декорациятне ды реквизиттнэ. Весе эйкакштне саевить сцена удалов, мереви варчамс прянть актёронь-кукольникень тевсэнть, кирдемс ды чаравтомс някатнень. Весе те пек кецявты эйкакштнень!

Мартсто МР-нь Някань государственной театрась ваныцятнень мелест коряс лиссь изницякс «Эйкакштнень туртов 2022 иень сехте паро спектакля» номинациясо. Истямо покш питне максозель Г. Сапгирэнь «Садко» спектаклянтень.

Одс вельмевтезельть гастрольтне. Сынь ютасть Московонь ды Калугань ёнкстнэсэ. Р. Киплингень «Слонёнок» ёвксонзо коряс музыкальной спектаклясь пек тусь ваныцятнень мельс. Ульнесть виев цяпамот, пейдемат ды «браво» пижнемат. Те спектаклясонть налксить МР-нь заслуженной артисткась Г. Максутова, И. Чиндяйкин ды Г. Хамова. Истямо лембе вастомась, нама, кепеди актёртнэнь мельёжост.

Апрелень 18-це чистэ ютась Б.Шергинэнь «Просто Шиш» спектаклянь онлайн-невтемась PRO.Культура РФ порталсо. Маень 8-це чинь 12:00 чассто Изнямонь чинтень невтеви «Мы все Победою сильны» музыкально-поэтической композициянь невтемась.

Майстэ театрась сырги Татарстанонь Набережные Челны ошов, тосо карми «Рабочая лошадка» някань театратнень раськеютконь фестиваль. Минек артисттнэ невтьсызь М. Садовскиень «Золотой гвоздь» путовксонть. Июньстэ Някань театранть учить Чебоксары ошсо, тосо карми молеме «Карусель сказок» някань театратнень раськеютконь фестиваль. Невтеви Л. Шаховань «Певец народной красоты» спектаклясь, конась алтави Мордовиянь народной художникенть Ф. В. Сычковонь эрямонтень ды творчествантень.

Апрелень 25-це чистэ Саранскойсэ ютавтови «Морыть драматической театрань актёртнэ» фестивалесь-пелькстамось, конань темакс яволявтозь «Рузонь романсонь оймесь». Тосо кармить пелькстамо МР-нь Някань государственной театрань актёртнэяк. Весе, кинь ули мелезэ, тердевить ваномо!

Анокстызе

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».