Ковдо икеле минек газетань редакциясь яволявтокшнось «Монь вечкевикс «Эрзянь правда» республиканской пелькстамо, косо участниктне фотографиятнень вельде невтизь, кодамо покш мель сынь явить тиринь эрзянь кельсэ лисниця газетантень, ды, эряви меремс, фотороботатне лиссть алкукс творческойть ды лия ёнов а молицят.
Конкурсось ютавтовсь социальной сеттнень газетань куротнесэ. Сынст ванность минек ловныцятне ды истя жо ёвтасть эсь мелест – макссть эсь «седейненть» седе вадря, мельстуиця ды креативной фотографиянть кисэ. Самай неть «седейнетнень» ламочинть коряс ливтевстькак изницятне. Эряви меремс, пелькстамось ульнесь «пси», киньгак апак манче. Вадрятнень кочкинзе сехте виде жюрись – минек ловныцятне. Васняяк весе роботатнень ютксто кочказельть кемень, конатне мольсть икелев сынст кисэ максозь «седейнетнень» коряс. Сынь ютасть полуфиналс. Мейле жо неть кементнень ютксто кочкавсть колмо изницятне. Покш сюкпря минек ловныцятненень, сынь шканть эзть ёмавтне ды куроксто ливтизь лангс сехте вадрятнень.
Ноябрянь 22-це чистэ «Эрзянь правда» газетань редакциясо пурназель кенярксов вастовома, конань лувсо казезельть «Монь вечкевикс «Эрзянь правда» республиканской творческой пелькстамонь изницятне. Сыненст казнетнень ды дипломтнень явшинзе «Эрзянь правда» газетань прявт редакторось Марина Николаевна Девятова. Сон ёвтась покш сюкпря весе участниктненень пелькстамосонть ёрокчинь невтеманть ды минек газетантень башка мелень явоманть кисэ.
Пелькстамосонть эсь ёрокчист невтизь Саранск ошсто, республикань районтнэстэ ды Россиянь кой-кона регионтнэстэ малав сядо ведьгемень шкинемав ломанть, конатнень ютксо эйдень кужов якицят ды воспитательть, школасо тонавтницят ды тонавтыцят, культурань ды образованиянь ёнкстнэсэ важодицят, студентт...
Ёвтасынек изницятнень лемест. Васенце таркась максовсь Саранск ошонь 80-це № эйдень кужов якицятненень ды сынст воспитателентень Дарья Владимировна Каткованень. Сынст фотографиянть кисэ максозельть сехте ламо вайгельть. Омбоцекс кармасть Покш Игнатовань райононь «Районный Дом культуры» МБУК-нь важодицятне, колмоце таркасонть – Саранск ошонь 80-це № эйдень кужов якицясь Иван Зеткин ды сонзэ воспитателесь Елена Павловна Леонтьева.
Истя жо «Ансяк изнямос!» номинациясонть башка казнесэ тешкставсть «Центр развития ребёнка – детский сад № 3» МАДОУ-нь 12-це группас якицясь Тимур Барашкин воспитательтнень Екатерина Сергеевна Романова ды Надежда Львовна Евланова марто ды теке жо кужонь 5-це группас якицясь Ева Барашкина ды сонзэ воспитательтне Ульяна Юрьевна Кис ды Юлия Александровна Петрова.
«Лембе седейне» номинациясонть башка казне максовсь «Центр помощи детям, оставшимся без попечения родителей» МР-нь ГБУ-нь тонавтницянтень Людмила Анисимованень.
Истя жо башка эрявить тешкстамс пелькстамонь лия участниктненьгак. Кадык ней сынь эзть карма изницякс, ялатеке вадрясто невтизь лиятненень – сынсткак ули шкинемань ёрокчист. Васняяк истятнэнь юткс кандомат Покш Игнатовань эйдень кужонь эйкакштнень ды воспитательтнень. Пелькстамонтень сынь кучокшность зярыя роботат ды эрьвась эйстэст лия ёнов а молиця, творческой ёнкс марто. Истя, эрьва эсь роботантень сынь макссть лем. Воспитателесь Ирина Владимировна Приставкина кужов якицянть Софья Кузнецова марто эсь роботанть лемдизь «Раськень Озксось «Эрзянь правдань» лопатнесэ». Воспитателесь Елена Ивановна Яшкина ды кужов якицясь Евгений Кутуров фотографияст лемдизь «Эрзянь правданть» сы шказо». А вана «Звёздочки» группань эйкакштне (воспитателесь Галина Григорьевна Асабова) эсь фотороботатненень макссть «Ютазь шкасто сы шкав вейсэ «Эрзянь правданть» марто» ды «Хороводс «Эрзянь правданть» марто» лемть. Теке жо кужонь «Василёк» группась руководителест Ирина Николаевна Куликова марто эсь фотографияст лемдизь «Эрикс шка «Эрзянь правданть» марто!»
«Тонавтнетяно ловномо эрзякс» лементь ало фотороботанть миненек кучизь Лямбирень райононь Александровка велень «Ягодка» эйдень кужонь воспитательтне Ирина Ивановна Видякина, Татьяна Дмитриевна Корякова ды средней группань эйкакштне. Саранск ошонь 79-це № эйдень кужонь 9-це группань эйкакштне Яна Цыганова ды Саша Гаврилов Ольга Михайловна Трофимова воспитателест марто арсесть вана истямо мерема: «Эрзянь правданть» арась сыредема шказо, ловныть сонзэ эйсэ вишкинек-покшнек».
А вана истямо сёрма минек пелькстамос кучокшность Саратовань областень Советской райононь Советской велестэ:
«Кучтано тенк поздоровт Саратовань моданть лангсто. Вана сынек мельс невтемс эсь ёрокчинек «Монь вечкевикс «Эрзянь правда» тынк фотоконкурссонть. Посёлкась минек ламо раськень, ояксчисэ эрить 30 ламо раськеть. СДК-нть юрсо жо важоди Раськень культуратнень центра, косо улить раськетнень кото кужинеть (рузонь, немецень, армянонь, кореецэнь, казахонь ды эрзянь-мокшонь). Минек диаспоратне ванстыть ды виевгавтыть эсь койтнень-кирдатнень ды эсь кельтнень, вейсэ тешкстатано раськень кенярксчитнень ды якатано вейке-вейкенень инжекс. Ды вана тынк пелькстамодонть марязь, арсинек теемс фотографият «Эрзянь правда» газетанть марто, конань минек велень эрицятне пек вечксызь ды ловныть покш мельсэ. Самай сонзэ вельде ламот кармасть седе вадрясто ловномо эсь тиринь кельсэ. Покш сюкпря тенк важодеманть кисэ!»
Истя жо минек пелькстамосонть эсь ёрокчист невтизь Саранск ошонь 7-це, 2-це, 5-це, 112-це, 119-це, 14-це, 79-це №№ эйдень кужотнень эйкакштне ды воспитательтне, Саранск ошонь 30-це школань, Дубёнкань райононь Орданьбуень средней школань, Ицялонь райононь Оброченской средней школань тонавтницятне, Орданьбуень райононь Низовка велень «Цёковне» народной фольклорной ансамблясь, Покш Березникень райононь Парынзэлень «Парынза», Чаунзабуень Мокшалей велень «Тундонь чи» ансамблятне ды ламот лиятне. Весенень покш сюкпря! Сехте вечкевикс фототнень минь эштё печатасынек газетасо сыця номертнэсэ.
Кода тешкстась Марина Девятова, «Монь вечкевикс «Эрзянь правда» пелькстамось тагояк невтизе, кодамо покш тарка минек эрямосонть саи ояксчись, малавикстнэнь, ялгатнень ды целанек весе Мордовиянть ды сонзэ томбале эриця эрзятнень-мокшотнень кирдемась ды лезксэсь. Ды те конкурсось невтизе, тынь ловнотадо минек газетанть, конась, эсь 102 иетнень лангс апак вано, бажи седе вадрялгадомс ды улемс мельстуицякс.
Огромную благодарность выражаем нашим спонсорам: АО «Консервный завод «Саранский», ООО «ЛВЗ «Саранский», ОАО «Птицефабрика «Атемарская», ООО «Аграрная производственная фирма «Норов», МП г. о. Саранск «Детская пищевая станция», депутату Государственного Собрания РМ М. Н. Подмареву, Мордовской филармонии, Государственному кукольному театру и РДНТ, которые поддержали нашу идею и помогли воплотить её в жизнь, предоставив победителям и призёрам великолепные подарки в виде своей продукции.
Юлия Еремина