Весе минь ульнинек эйдекс… Мейле касынек. Ды сась шка арсезевемс кевкстеманть лангсо: кикс монень улемс? Кодамо важодемань тев кочкамс, штобу улевель мелем сонзэ топавтомс, штобу сон кандоволь кеняркс ды лезэ лиятненень? Вадря, зярдо ломанесь эйкакш пингестэ саезь соды, кодамо важодемань тев сон карми топавтомо. Истямокс лови прянзо эрзянь мазый авась ды Н. П. Огарёв лемсэ университетсэнть тонавтыцясь – Ольга Николаевна ОСЯЕВА.
Аванть чачома тарказо – Саранскоесь. Тетянзо-аванзо эрзянь вадря ломанть. Сынь кавонест чачсть-кассть Покш Березникень Госагыр (руз. Косогоры) велесэ. Студентэкс састь тонавтнеме Саранскоев ды кадовсть теске эрямо. Седе тов чачтсть кавто тейтерькат.
– Авам вишкинестэ саезь пек вечксь ловномо. Сехте мельстуиця ловномакс ульнесь А. С. Пушкинэнь «Евгений Онегин» стихсэ романось. Секскак минь покш сазоркан марто кандтнетяно те произведениянь кавто прявт героинятнень лемест – Татьяна ды Ольга, – мизолдозь ёвтни авась.
Эряви меремс, ошонь эрицякс Оля прянзо а лови, эдь аванть оймезэ велень. Лиссь истя, Ольга весе эйкакш пингензэ ютавтызе велесэ, покштянзо-бабанзо кедьсэ. Неень шкасто велесэ кадовсь ансяк чаво кудо, конань мельга Ольга сазоронзо марто вадрясто ваныть, эсест юткова лемдить сонзэ лавсекс.
– Мон а чарькодян, кода ломанесь эри велевтеме. Истятнэнь лован урозокс. Эдь самай велесэ варчасак алкуксонь эрямонь танстенть. Тесэ будильникень таркас гайги атякшонь морось, лавкань ламбамкатнень таркас сырькаесь пани тантей прякат эли валске марто путы тувор лангс вирьстэ ансяк сезезь кстыйть ды инзейть. А телень шкасто, зярдо якшамось ашо лекшень вельтявкссо тапардасы пертьпельксэнть, тон жо аштят лембе каштомо лангсо ды кунсолат сырькаенть кезэрень ёвксонзо. Вана истямо велесэ эрямонть лувозо, – корты Ольга Николаевна.
Тешкстасынек, Ольга Николаевнань вечкевикс бабазо, Евгения Николаевна, ды покштязо, Илья Фёдорович, уцяскав эйкакш пингень ютавтомадо башка, казизь тейтерьканть филологиядонть сюпав ёвтнемасо. Эдь покштянзо-бабанзо весе пингест алтазь велень школасо тонавтомантень. Секскак сынст лангс ванозь, Ольгань чачськак мелезэ улемс тонавтыцякс.
– Сырькаем ды покштям монь туртов – алкуксонь невтевкст, кода эряви ветямс прят эрямонь килангсо. Ледстяса, кода сырькаем ёвтнесь тень покштянь марто васенце вастовомадост. Тевесь ульнесь истя: бабам се шкане тонавтнесь 11-це классо, покштям жо педучилищадо мейле сась важодеме се самай школантень тонавтыцякс. Истя теевсть содавиксэкс. Ды кавонест сеске понгсть вечкемань полонс. Ансяк ушодовсь война, покштянь саизь фронтов, туемадонзо икеле сон мерсь бабанень: «Бути велявтан кудов – урьвакстан лангозот, учок!» Изнямонть покштям вастызе Берлинсэ. Велявтсь кудов ды топавтызе алтамонзо – саизе козяйкакс Женя тейтеренть. Сынь вейсэ поладызь школасо важодеманть, чачтсть эйкакшт, эрямосонть цидярдсть ламо апарот, ансяк вана стака ормадонть покштям эзь ванстово, – ёвтни Ольга Николаевна.
Ольганень ульнесть кавксо иеть, зярдо покштязо кулось. Ды сон а соды, што кавксо нуцькатнень ютксто Оля ськамонзо поладызе тонавтыцянь тевенть.
Школасо тейтересь тонавтнесь вадрясто, свал ветес, а зярдо сась шка молемс тонавтнеме седе тов, явсь мель Н. П. Огарёв лемсэ МГУ-нь филологиянь факультетэнтень.
– Университетэнь кенкштнень панжинь 17-це иесэ тейтерькакс. Тонавтнемантень алтынь сисем иеть. Аспирантурадо икеле бажинь варчамс прям лия профессиясо. А кувать цидярдынь, сынь мекев университетэв ды прядыя кадозь аспирантуранть, конадонть мейле молинь важодеме ИНКв. Истя ушодовськак монь тонавтыцянь кись, конанень вана уш алтынь 18 иеть. Неень шкасто тонавтан «История мировой культуры» предметэнть, – ёвтни тонавтыцясь.
Студенттнэнь марто важодемась Ольга Николаевнань эрямос канды кеняркс. Тонавтыцятнень важодемасо эрьва мезть эрсить. Улить студентт, конатне састь лия регионсто эли жо омбо масторсто, кой-конатне пек тошнаякшныть тиринь кудост ды малавиксэст кис, ды колазь ёжосо тонавтнемасткак моли стакасто, секскак Ольга Николаевнанень савкшны улемс психологокскак. Эдь алкуксонь тонавтыцянть сельме вакска а юты, кодамо ёжо марто сась од ломанесь занятиятнес.
– Студенттнэ монь вечксамизь. Паратне ливтязь ливтить. Лиясто сат важодема таркав васенце парас ды а марясак, кода прядови ветецесь. Свал бажан каземс эрьвантень эсень энергиям. Лиясто ванат, студентэсь занятиятнес сась судонь нолдазь, мельтеме, а вана туема малав свал тееви эрязакс, пейдицякс, – корты Ольга Николаевна.
Эряви меремс, эрьва тонавтыцянть эсензэ важодемань салавачинзэ, кодат улить минек героинянтькак. Тонавтыцякс улемс свал а шожда, ансяк те мелесь вестькак эзизе тандавтокшно Ольга Николаевнань, мекевлангт, авась бажи чиде-чис кастомс ды раштомс эсензэ профессионализманзо.
Истя жо тешкстасынек, Ольга Николаевнань кудораськезэ покш. Масторонь эрьва ёнга эрить малавиксэнзэ. Сонзэ аванзо ёндо раськесэнть ванстовсь киньгак ёнов а молиця кой. Эрьва вете иетнень ютазь, Марескинтнэнь весе раськесь пурнави Покш Березникень Ужалей велес. Те велестэнть ушодовськак сынст раськест. Зярдо весе семиятне пурнавить вейс – ушодови покш кенярксчи. Эсест юткова весе инжетне казнить а покш казнеть, ёвтнить, кода молить тевтне эрьва семиясонть, ледстнить вете иетнень перть чачозтнень ды кулозтнень. Сестэ Ужалей велесэ чинь-чоп гайги кенярксчинь шалт. Те корты седе, што Ольга Николаевнань малавиксэнзэ вейсэ – вейке покш вий, конась а изняви кодамояк стакачинень.
Алена Артемьева