Четверг, октября 28, 2021
Важное

«Кизэсь пачколи пезэнзэ» – истя кортыть умарьковдонть. Сон истя улияк. Те ковстонть карми полавтовомо сонсь пертьпельксэсь: лопатне ушодыть ожолгадомо, читне кармить нурькалгадомо, ветне – кувалгадомо ды экшеньгадомо. Лембе масторов кармить пурнамо васенце карготне, мельгаст – мацейтне ды локсейтне.


Ве ёндо, те ковось маряви сехте стака ды мелявксов шкакс. Весемесь, мезе видезель тунда, ней кенерсь. Эряви пурнамс, каямс утомга. А кенерят шкастонзо прядомс весе тевтнень – ламось-мезесь ёми, наксады. Эрьва чись – сырнеде питней.

Омбоце ёндо, умарьковось – сехте мазый ды сюпав шка. Ков иля варшта – цецянь кумбот. Сынь теке сядонь сядо тюссо палыця толбандят: сельметь эйстэст а саевить. Ванат лангозост ды дивамос пракшнат: кодамо мазычи моданть лангс кучни Инешкипазось!
Седеяк ламо кенярксов ёжомарямот кандыть те ковстонть умарьчувтотне. Сась умарень кенерема шкась. Эрьва чувтонть лангсо кенерезь умартне увтязь увтить тарадтнэнь эйсэ. Те шкастонть умаринась неяви седеяк мазыекс. А стяко, нать, седикеле минек покштятне-бабатне ловсть эйсэнзэ Пазонь чувтокс ды сонзэ лемс ютавтнесть покш чить, шнасть эйсэнзэ мазый моросо.

Коесь – ютавтнемс умаринантень алтазь чить, эзь стувтово нейгак. Сон тешкстави умарьковонь 19-це чистэ. Сонзэ кенярдозь вастыть кода велетнесэ, истя оштнесэяк. Ловт, эрьва кудосо панить умарень прякат, пидить умарьстэ-мейстэ тантей симемапельть. Умартнень озномо якить Ознома таркав. Седе тов ютавтневить моронь-киштемань кужот.
Саранск ошонь Пролетарской районсо эрицятне содыть, ков молемс истямо чистэ. Сынст туртов весемеде паро оймсема таркакс умок уш теевсь Пролетарской паркось. Ломантне тей сакшныть аволь ансяк, кода мерить, ванькс коштто лексеме. Тесэ ули косо оймсемс весенень. Седе вишкинетнень учить эрьва кодат аттракционт. Ули мелеть батутсо кирнявтнемс, ули мелеть – «лишминесэ» ласте ардомс. Тесэ весень туртов муеви «тев». Покштне вечкить якамо «шумбрачинь яннэтнева», конат таргавить натой зярыя вайгельбень тарка. Теде башка, тесэ чокшне ланга, ловт, эрьва чистэ гайгить морот, ютавтневить киштемат. Эряви меремс, седе сеедьстэ сынст ютавтнить «Луч» Культурань кудосо важодицятне, конатне весемесэ бажить кандомс кеняркс эсест райононь эрицятненень.

Тедедеяк, пандемиянть лангс апак вано, икеле ладязь коесь апаколь кола. Кить ульнесть тосо чокшне ланга, кадовсть седе а ков паро ёжосо концертэнть эйстэ, конанть анокстызь «Луч» Культурань кудосо важодицятне ды алтазель умаринантень. Сон мольсь налксема ладсо, косо ветицятне Нюра уряжесь ды Наталь патясь тердсть весень налксеме, пелькстамо, киштеме.

Ваныцятнень мелест седеяк витевсть моротнень эйстэ, конатнень сынст туртов казизь «Луч» Культурань кудонь артисттнэ. Вейке омбоце мельга сценанть лангс лиснесть ськамост морыцятне: Н. Вакаева, М. Майорова, Е. Горохов, И. Беляева, А. Ферстяев. Сынст полавтсть ансамблятне: «Сударушка», «Радоница», «Варма». Лембестэ вастозельть «Ламзурь» ансамблясо морыцятнеяк. Сынь эсест моросост таго ледстизь, кода седикеле тешкстасть Умарень чинть эрзянь велетнесэ. Истямо чистэ а кода а серьгедемс «Умарина» весенень содавикс моронть. Сонзэ гайгемстэ сценанть лангс лиси сонсь Умаринась: виде рунго, сэрей ава, рунгованзо умарьсэ увтязь тарадт. Истямо оршамот оршнесь «Ламзурьсэ» морыцясь Т.И. Боброва. «Чувтонь паро умарина, чувтонь мазый умарина»… Алкукс сон паро ды алкукс сон мазый. А стяко тензэ ломантне морот ладсесть, а стяко сюконясть ды озность тензэ, аватне вешсть пельдензэ шумбрачи, мазычи, ламо эйкакшт.

Кортыть, те чинть самс а мереви ярсамс умарде. А вана зярдо сы сон, умаренть виезэ ды лезэзэ пек покшолгады: саты сускомс эйстэнзэ ды арсемс кодамояк мель-бажамо, те мелесь, секень вант, топавтови. Терявтса монгак. Мелем-арсемам вейке: модамасторонок свал улезэ истямо жо мазый ды сюпав, сонзэ лангсо зярдояк илязо валово ломань-ломань каршо тюремань верь, улест шумбрат лангсонзо эрицятне ды зярдояк иляст сэреде эйкакштне. Весе те, нама, ашти ансяк эсенек эйстэ. Кода минсь карматано ванстомо модамасторонок, истя сонгак карми пандомо тенек. Содадо ды зярдояк илядо стувтне теде, ломанть.

Раиса Щанкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».