Вторник, марта 19, 2024
Важное

 

Ютазь недлячистэ алкуксонь питней казне тейсть Мордовиянь эрицятненень, Республикань Культурань кудов «Шумбрат, Мордовия!» раськень творчествань фестивалентень сыцятненень Чаунзабуень ды Покш Березникень артисттнэ.
Тешкстасынек, кавонест районтнэ анокстасть сюпав выставкат, косо кеместэ сюлмавсь кезэрень ды неень шкась.


Кедьчелькев ломантне ускизь мартост теевксэст, конат витизь меленек декоративно-прикладной ёрокчинь паро выставкасо. Тоско жо сынь невтсть мастер-класст, тонавтсть сёвоньстэ чакшонь-мезень тееме, викшнеме-кодамо. Кавонест районтнэ анокстасть снимамонь таркат, ков натой таргавсь кувака очередь.
Омбоце этажс куземстэ ваныцятнень сельмест кенярдовтсть Покш Березникень искусствань эйкакшонь школань истят тонавтницятнень, кода Владислав Ховатовонь, Елена Ларькинань, Дмитрий Стенниковонь ды ламо лиятнень артовксост. Сехте неявикс таркасо – Ине Отечественной войнань участникенть, Дягилевка велень эрицянть Николай Григорьевич Никитинэнь карензэ.
Васенце этажонь фойесэнть кавонест районтнэстэ сыцятне вейкесь омбоце мельга киштсть-морасть гармония мельга. Концерттнэнь ушодовомадост икеле пурнавозтненень пшкадсть Чаунзань муниципальной райононь Администрациянь прявтось В.Г.Цыбаков ды Покш Березникень муниципальной райононь Администрациянь прявтонь тевень топавтыцясь А.В.Бояркин.
Эрьва районось анокстась эсензэ, лиятнень ёнов а молиця номерт. Истя, Покш Березникень концертэсь ушодовсь театрализованной представлениясто – ярмункасто, косо ёрокчист сеске невтизь ламо ломанть. Зярс сценанть лангсо мольсь микшнемась-рамамось, «Раздолье» хоронь коллективесь серьгедизе «Ах, вы, сени, мои сени» рузонь моронть.
Те чистэнть РДК-нь сценанть лангсо гайгсть ламо морот. Морыцяст истят коллективтне: Эрзянь Наймансто – «Найманочкась», Шугуровасто – «Эрзяночкась», Парынзэлестэ – «Парынзась» ды частушкань морыцятне Зинаида Яськина, Тамара Каряйкина.
Симкина велесэ эрицясь Тамара Вельмакина районсонть содавикс кода стихотворениянь ёроков сёрмадыця ды парсте ловныця. А стяко те чистэнть ламот макссть тензэ цецяпусмот тиринь веледе стихотворениянть ловноманзо кисэ.
Чаунзабуень концертэнь программасонть башка таркасоль «Раздолье» народной ансамблясь, конань прявтсо Наталья Герасимова. Сынь вейсэ «Цементник» Культурань кудонть марто анокстасть мельстуиця невтема, кона алтавсь Театрань иентень. Эштё аволь весть неть артисттнэ лиснесть сцена лангс ды свал вастозельть «пси» цяпамосо.
«Тиринь мастором» эрзянь моронть морызе «Комолявка» народной фольклорной ансамблясь, конань прявтсо Анастасия Ерошкина.
Весень мельс истя жо пек тусь «Тейтерень мазый киштема» киштемась. Сонзэ невтизе «Фантазия» эйкакшонь образцовой коллективесь.

Валентина ЮДИНА
Фотось: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».