Вторник, марта 19, 2024
Важное



ТЕ ЗЫЯНОВ ТЕВЕНТЬ ЛИСЕМА ЧИСТЭНТЬ САЕЗЬ ЮТАСТЬ КЕМГОЛМОВО ИЕТЬ... 2006 ИЕНЬ СУНДЕРЬКОВОНЬ 5-ЦЕ ЧИСТЭ ЧЕЧНЯНЬ РЕСПУБЛИКАСО СЛУЖЕБНОЙ КОМАНДИРОВКАСО УЛЕМСТЭ ЧАВОВСЬ МОРДОВИЯ РЕСПУБЛИКАВА МВД-нь ОМОН-нь МИЛИЦИОНЕРЭСЬ-БОЕЦЭСЬ ИЛЬЯ ПЕТРОВИЧ ЧЕКАЙКИН. ТЕВС НОЛДАЗЕЛЬ КЕДЬСЭ ТЕЕВТЬ СЕЗЕВЕМАНЬ УСТРОЙСТВАСЬ. УРОЗОКС КАДОВСЬ ВЕЧКЕВИКС СЕМИЯЗО: АЛЕКСАНДРА НИЗЭ ДЫ КАВТО ВИШКА ЭЙКАКШОНЗО: КЕМГАВТОВО ИЕСЭ МАКСИМ ДЫ КОЛМО ИЕСЭ МАШЕНЬКА.


КЕМГОЛМОВО КИЗЭТЬ ДЫ КЕМГОЛМОВО ТЕЛЕТЬ ЧЕКАЙКИНТНЭНЬ СЕМИЯСЬ УЧИ – ПАНЖОВИ КВАРТИРАНЬ КЕНКШЕСЬ ДЫ КУДОВ СОВИ ВЕЧКЕВИКС ТЕТЯСТ ДЫ МИРДЕСТ, КУТМОРДАСЫНЗЕ ЭЙКАКШТНЕНЬ, НИНЗЭ ДЫ МИЗОЛКС МАРТО КУНДЫ КУДОЮТКОНЬ ТЕВТНЕС… АНСЯК ТЕ УШ ЗЯРДОЯК А ТОПАВТОВИЦЯ МЕЛЬТЬ-АРСЕМАТ…
СЕХТЕ ЗЫЯНОВ ЧИСЬ

– Весемесь лиссь теке исяк. Маша сестэ овсе вишкине ульнесь. Чинь колмо чассто мадстилинь эйсэнзэ, – ледстни зыянонть пачтямодонзо Чекайкинэнь довазо Александра Андреевна. – Тесэ кие-бути гайгстась кенкшс. Квартирантень совасть колмо ломанть ды пачтясть а кемевиця куля: келя, Илья чавовсь. Мон кодаяк эзинь чарькоде, мезе сынь бажасть ёвтамс, эзинь кеме марязентень. Ды, видькстан, течинь чис а кеман… Максим кортавтсь-оймавтсь эйсэнь: «Авай, те аволь алкукс. Тетям жив. Вана весементь ванносызь, мусызь видечинть ды весе ули вадря. Тетям велявты кудов». Ансяк ковгак а туят, эрявсь пурнамс весе вийтнень ды эрямс седе тов, эрямс эйкакштнень кисэ…

ВЕЙСЭНЬ УЦЯСКАВ ЭРЯМОДОНТЬ

Илья ды Александра Чекайкинтнэ вейсэ эрясть кемнилее иеть. Авась покш кеняркс ды мизолкс марто ледстни неть уцяскав иетнень. Видькстась, мирдезэ ульнесь алкуксонь цёра, кемевикс, весементь тейсь вечкевикс семиянзо туртов.

Сынь кавонест чачсть Кочкурбуень Вирь ало Тавласо. Куш велесь аволь покшкак, ансяк од ломантне теевсть содавиксэкс уш университетэнь прядомадо мейле. Тувталось сеньсэ: Илья вишка шкасто саезь вечксь морамо ды седямо музыкальной инструментсэ. Секскак велесэ колмоце классонть прядомадо мейле тусь тонавтнеме Саранскоень музыкальной школав-интернатов. Тиринь велев сакшнось чуросто, ансяк каникулань читнестэ. Мейле прядызе музыкальной училищанть.

Александра жо школань прядомадо мейле тонавтнесь Н.П.Огарёв лемсэ МГУ-нь филологиянь факультетсэ. Се шкане эштё направленият явшесть, ды од тейтеренть кучизь важодеме Кочкурбуень Сурвелень школав, тосо сон тонавтсь эрзянь кель ды литература ды рузонь кель. Од ломантне вастовсть, ютксост кирвазсь вечкема. Сурвелесэ тейтересь кенерсь важодеме вейке ие, лиссь мирденень. Ды Чекайкинтнэнь од семиясь тусь эрямо Саранскоев. Кудазорось, Илья, кармась важодеме милициясо, Александра – эйдень кужосо воспитателекс.

– Мирдем пек вадряль. Мартонзо эзинь сода кодаткак стакачить, ансяк эйкакшт ды важодема тарка. Весе стака тевтне Ильянь лавтовонзо лангсольть, мон свал ульнинь сонзэ кемевикс кутьмерензэ экшсэ, – ледстни авась. – А тесэ весемесь каявсь монь лангс ды весементь савсь теемс эстень. Содатадо, весе човорявсть: зыян, покш талнома, мелявкст – пек стакаль. Эрявсь чарькодемс: кастомат-кепедемат эйкакштнень, ледстнемскак тень коряс арась мелем… Сюкпря Пазонтень, эрятано седе тов.

Александра Андреевна видькстась, ютасть кемголмово иеть, ансяк сэредьксэсь течинь чис эзь стувтово, эзь туе. Течинь чис талны-палы седеесь, течинь чис эри апарось…
– Вейсэ эринек пек парсте. Весементь теинек вейсэ: кудоютконь тевтнень зярдояк эзинек явше. Бути важодема таркасто сон сакшныль седе икеле: пидесь ярсамопель, шлясь пенчтнень-вакантнэнь, – ледстни авась. – Свал прясонзо ульнесть ламо мельть-арсемат: кода бу аволь ансяк кенярдовтомс-весёлгавтомс эйкакштнень, истя жо тонавтомс сынст важодемеяк. Максим марто кемекстасть алкуксонь график: вейке чистэнть Илья шлясь пенчтнень-вакантнэнь, омбоце чистэнть – Максим. Цёрантень, нама, эзь вечкеве те тевесь: «Авай, те мезекс, монь арась мелем». Ансяк бути тетясь мерсь: сестэ эряви теемс. Илья эйкакштнень туртов ульнесь алкуксонь примерэкс.
Сон вечксь оймсеме эйкакштнень марто лей чиресэ, вирень кужинесэ, сеедьстэ ульнесть эрьва кодат общественной мероприятиятнесэ, парксо. Ильянь ульнесь покш бажамозо: мезеяк од невтемс эйдетненень, терявтнесь дивавтомс сынст. Ледстнян, весть сась кудов покш кеняркс марто: рамась видеокамера. Ды те чистэнть саезь семиянь весе кенярксчитнень кармась снимамо, тейнесь пек ламо фотографият. Эйкакштнень туртов свал анокстась-тейсь пек мельстуиця чачома чинь тешкстамот, алкуксонь кенярксчить. Бажась ванстомс мельсэ эрьва кенярксов тевенть. Илья свал мизолдыцяль, эрямонь вечкицяль. Семиясь тензэ свал васенце таркасоль ды малавикстнэнь туртов сон свал бажась кандомс ансяк мельспаро.

МЕЕЛЬЦЕ КОМАНДИРОВКА

Илья Петрович Чекайкинэнь туртов те ульнесь уш котоце командировка. Котоце ды меельце… Александра Андреевна видькстась, васоло командировкав свал ильтясь мирдензэ покш талнома ды мелявкс марто: эдь савкшнось явовомс кувака кото ковс. Ризнэсь седеесь меельце командировканть каршояк, ансяк бажась кемемс паронтень. Учось мирдензэ пельде телефононь гайневтематнень, ёвтнесь эйкакштнень кеняркстост. Ды учось: кото ковтне ливтязь ливтить ды Илья велявты кудов…
– Сундерьковонь 5-це чистэ топодсть кемголмово иеть, кода Илья арась мартонок. Коень коряс якинек калмонзо лангс, сон калмазь чачома велесэ – Вирь ало Тавласо. Теке мерят, исяк весе лиссь. Сэредьксэсь овсе эзь лепамо, – корты Александра Андреевна.

ЭРЯМОСЬ ПОЛАДОВИ ЭЙКАКШТНЕСЭ

Нама, кияк ды мезеяк а полавтсы эйкакштненень тетяст, нинтень – мирденть. Ансяк Александра Андреевна течинь чис ёвты сюкпря весенень, кить ульнесть маласо стака шкастонть. Зыянонть лисемадонзо мейле А.А.Чекайкинань саизь важодеме МР-ва Внутренней тевень министерствас, правовой отделс.



Эйкакштнень туртов тетяст – алкуксонь герой. Сынь пек вечкить, зярдо аваст ёвтни сонзэ ланга. Ней уш эйкакштне покшт. Цёрась эри ве ёно, Маша – аванзо вакссо, тонавтни школасо. Дневниксэнзэ ансяк «вететь», содамочинзэ невти школань ды республикань олимпиадатнесэ. Ансяк маласо шкастонть моли сисем олимпиадас.

– Эрьва ломанесь кенярды эйкакшонзо изнявкстнэнь кисэ, зярдо весемесь сынст вадря, зярдо весемесь удалы. Лиясто озан ды арсян: а кода бу улевель, бути Илья улевель жив, вакссонок, кода бу сон кенярдоволь, кода бу вейсэ аштевлинек каштанчисэ эйкакштнень изнявксост кувалма. Теке шкане оймавтан эсь прянть: тоначисэ сынь весементь неить, марить ды истя жо кенярдыть…

Татьяна ИКОННИКОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».