Вторник, марта 19, 2024
Важное

Ули истямо содавикс валмеревкс: «Вейсэ эрямонть эрямс – аволь пакся ютамс». Видеть валтнэ: эдь ансяк од порасто маряви од мирдтненень-нитненень: вечкемась изнясынзе весе мелявкстнэнь, эрямось карми сэтьме, шожда, пельтеме-пиземевтеме. Ансяк а свал истя эрси, кода бу аволинек теде арсе. 
Мезе эно теемс, кода а ёмавтомс седеень эждиця толонть? Васняяк, эряви ванстомс вейкень-вейкень туртов мельваноманть, сестэ изнявить мелявкстнэяк, эрямонь-аштемань канстоськак седе шождалгады. Истямо лувсо эрить Отяжелень райононь Сабанцеле велестэ мирдть-нить Учеваткинтнэ: Нина Васильевна ды Дмитрий Иванович, конатне ноябрянь 23-це чистэ тешкстызь эсест сырнень свадьбаст. Нина Васильевна корты, сынь теке цела пинге эрить вейсэ, эдь эйкакшпорасто саезь содыльть вейкест-вейкест.

Эрясть ве велесэ, Сабанцелесэ, ансяк ёроков, ёжов Тишань Нина – Вирь песэ, а сэтьме, сельмс а каявиця Олешка Митя – Пумбрасо. Чуросто истя эрси, ве ёнов а молиця ломантне вейсэндявить вейс. Истя лисськак. Кадык обуцятне сынст овсе явовицят, ялатеке вейсэндясь неть од ломантнень важодемантень покш мелесь. Ды эрзянь ломантне эрзянь велесэ свал тевтеме а аштить, свал котьмить-пискить. Свадьбадо мейле сеске кармасть стявтомо од кудо, путомо тингеть-пиреть. Дмитрий Иванович уш вишкапингстэ саезь варчизе роботань танстенть: кемгавтово иесэ лиссь колхозонь стадань ваномо, мейле лездась паксясо сюронь урядамсто, якась важодеме целинав, мейле сась шка туемс армияв. Кавто иеть служась мотострелковой частьсэ ды одов велявтсь «Путь Ильича» колхозов тиринь Сабанцеле велев. Те велень хозяйстванть марто сон сюлмизеяк мейле весе эрямонзо, тонавтнесь шоферэкс, мейле роботась малав колоньгемень иеть эрьва кодамо машинасо водителекс. Зярыя иеть ульнесь «Сабанчеевское» ООО-со МТФ-нь прявтокс, седе тов – завхозокс-строителекс.

Сон нейгак, 70 иень трокс ютазь, а ашти тевтеме. Нинзэ Нина Васильевна марто кирдить кардаз потмо ракшат, эрьва мейсэ лездыть кавто тейтерест семиятнень туртов. Татьяна ды Елена эрить Тольяттисэ, кизэнь каникуласто жо сынст эйкакшост Катя, Настя, Арсений ды Максим свал покштяст-бабаст кедьсэ. Нина Васильевна бажи нуцьканзояк тонавтомс важодемантень. Сон сонсь пенсиязонзо тевтеме а аштиль: роботась тувонь фермасо прявтокс, мейле ламо иеть стыцякс промкомбинатсо. Ней нуцькатнень марто вейсэ путыть, кочкить пиреть, чувныть мода, кастыть-валныть эмежть, яксить кстыйс-пангос. Бабаст бажи сынст церьковантеньгак тонавтомс, эрьва недлячистэ яксить причастямо.

Нина Васильевна чачсь-кассь ламо эйкакшонь триця семиясо. Авазо чачтокшнось кемень эйкакшт ды сонензэ натой максозель «Ава-героиня» лемесь. Сынст кудост свал пешксель эйкакшонь гайтте, ды нейгак Нина сырькаесь пек вечки, зярдо семиязо пурнавкшны вейс. Сон кенярдыця ломань, пеедькшниця, вечки нурька морынень морсеме. А уш кодат кшить-прякат пани ды ямт-кашат пиди – келеть нильсак! Секскак Нина Васильевна калмамотнестэ ды лемень ледстнематнестэ свал покш прявт каштомо икеле.
Нина патясь мельспаросо васты весень, патянзо-ялаксонзо, сынст эйкакшост, нуцькаст, правнуцькаст. Седейлембезэ сатны эрьванень, а роднятне-раськетне вечкезь ды мелень ванозь мерить тензэ «сыре патяй» ды кода сехте содыцянтень сакшныть превс путомань кевкстнеме.

Нина Васильевнанень ды Дмитрий Ивановичнень эрямосост савсь печтямс аволь ансяк валдо чить, ульнесть пек раужо шкаткак, конатне а стувтовить меельце читнес – овсе одсто, школань прядомадо мейле чавовсь сынст цёрынест Иван. Кемень иеть Нина Васильевна яксесь ансяк раужо оршамопельсэ, эзизе кайсе прястонзо раужо пацянть, кирдсь покштояк покш ризкс ды киненьгак а содавикс сталмо. Эрямось явовсь кавтов ды куватьс…

Иетне ютыть, Учеваткинтнэ вана уш ведьгемень иеть вейсэ, кенярксчисэяк ды стакачисэяк. Весе, мезе таштасть мирдть-нить: те покш лембе кудо, конань свал панжадот кенкшензэ тейтерест, содамост, нуцькаст ды родняст-раськест туртов. Ды неть казнетне сырнеде ды цивтёрдыця кевде питнейть. Улить истят семият, конатнеде велесэнть кияк берянь вал а ёвтыть – истятнэнь ютксот Учеваткинтнэяк. Вана косо, нать, алкуксонь сюпавчись ды эрямонь смустесь.

Сырнень свадьбанть кувалма тетяст-аваст туртов Самара ёнкссто пси поздоровт кучить тейтерест семиятне: Пужаевтне ды Кукинтнэ: «Те юбилеенть кувалма, вечкевикс аванок ды тетянок, покштянок ды бабанок, арсетяно тенк певтеме вечкема, конань марто тынь истякак эрятадо ведьгемень иеть, кадык сон седеяк сыреми, кемексты ды карми минек туртов покш невтемакс. Тынь алкуксонь ломанть, конатнень пельде минь ламо тонавтнетяно-сайтяно. Эрядо куватьс, вечкевиксэнек, апак сэреде ды апак сыреде. уледе шумбрат, минь свал тынк марто!»
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».