Вторник, марта 19, 2024
Важное

Мордовия Республикась – аграрной регион. Велень хозяйстванть кепетемась-виевгавтомась тесэ ашти васенце таркасо, секскак сонензэ явови башка мель. Мода лангсо важодемантень вечкеманть снартнить максомс эйкакш порасто саезь. Те иестэ школатнесэ кармасть панжомо агрокласст. Истямо меленть ёвтызе Мордовиянть пельде Госдумань депутатось Юлия Оглоблина. Теке марто меельце зярыя иетнень перть покш мель явови аграрной техникумтнень эрявиксчист кепедемантень.

Эдь велень хозяйстванть туртов седе ламот специалисттнэ анокставить самай неть техникумтнесэ. Течинь чине тонавтнемань истят заведеният важодить республикань зярыя районтнэсэ. Аволь умок минь содавтынек Отяжелень аграрной техникумонть, конантень тедеде топодсть 45 иеть.

Техникумонть историясто

1977 иень сентябрянь 1-це чистэ Мордовиясо эсь кенкшензэ панжинзе Козловкань 13-це СПТУ-сь, косо анокстасть механизаторт, автомобилень ветницят, велень хозяйствань машинатнень витнемань коряс слесарть.

Зярыя шкань ютазь, 1986 иестэ, училищась ютась Отяжелев. Тесэ уш сонзэ туртов анокстазель цела комплекс, косо ульнесть тонавтнемань туртов корпусось, бытовой ОБК-сь, кавто общежитият ды мастерскойть.
Седе тов лиссть зярыя полавтомат ды 2011 иестэ тонавтнемань заведениясь кармась Отяжелень аграрной техникумокс. А 2016 иестэ теезель реорганизация ды «Атяшевский аграрный техникум» Мордовия Республикань ГБПОУ-нть юрс совавтовсь Дубёнкань аграрной техникумоськак.

Неень шкасто Отяжелень аграрной техникумось – те тонавтнемань покш заведения, косо ветяви робочей специалисттнэнь анокстамось велень хозяйствань, пищевой промышленностень ды услугатнень максомань сфератнень туртов.

9-11-це класстнэнь прядыцятнень тонавтомась тесэ ветяви зярыя специальностень коряс (тонавтнемась очна): «Велень хозяйствань техниканть ды оборудованиянть тевс нолдамось ды витнемась»; «Пидиця-паниця»; «Велень хозяйствань производствань мастер»; «Сварщик»; «Автомобилень двигательтнень, систематнень ды агрегаттнэнь технической ванкшномась ды витнемась».
Теке марто тесэ анокставить (тонавтнемась чокшне ланга): «В, С категориятнень автомобилень водительть»; «B, C, D, E, F категориятнень трактористт-машинистт»; «Сварщикть».

Эсь тевсэнть – алкуксонь профессионалт

Техникумсонть важодить покш квалификация марто, эсь тевень содыця вадря тонавтыцят ды производственной тонавтомань мастерт. Тонавтомань лувсонть келейстэ тевс нолдавить неень шкань технологиятне ды ёнкстнэ. Течинь чине Отяжелень аграрной техникумсонть важодить 44 преподавательть, эштё 32 – Дубёнкань филиалсонть. Эрьвась эйстэст – алкуксонь профессионал. Тонавтницятнеде жо весемезэ лововить малав колмосядт студентт (210 – Отяжелесэ).

«Отяжелень аграрной техникум» МР-нь ГБПОУ-нть прявтсо кеветее иеде ламо шканть перть ашти Андрей Иванович Петрушкин. Велесэ чачозь-касозь, сон эрямонзояк алты велень хозяйствань специалисттнэнь анокстамонтень. Ды, эряви меремс, те весе юты семиясто. Андрей Ивановичень тетязо, Иван Васильевич Петрушкин, ульнеськак районсонть техникумонь теицякс-пурныцякс. 1977 иестэ, зярдо панжозель Козловкань 13-це ПТУ-сь, Иван Васильевич ушодокшнось прявтонь полавтыцякс, зярыя иень ютазь аравтозель прявтокс. Ды тенень алтызе весе эрямонзо. Ней тевензэ полады цёразо. Полады оймень путозь, вандынь чиде мелявтозь.

– Бути саемс икелень шкатнень, минек республикань эрьва районсо ульнесь профессиональной училища. Ды специалисттнэнь анокстамонть сон ветясь се ёнкссонть, кодамо производства ульнесь те районсонть. Васняяк, штобу кирдемс те производстванть ды топавтомс сонзэ эрявикс кадрасо. Теке марто те вадрясто важодсь демографиянть кастомгаяк, – ёвтни Андрей Петрушкин. – Мейле тевтне аламодо полавтовсть, лиякс ладявсь училищатнень марто важодемаськак. Веенстнэ пекставсть, лиятне теезельть техникумокс, ансяк вана минек пельде течияк учить вейкенть – велень хозяйстватнень туртов эрявикс важодицят. Секскак ней производстватне, конатне улить районсонть, одс кемекстыть сюлмот техникумтнень марто. Сыненст эрявить эсь тевень содыця специалистт. Минек марто кеместэ важодить райононь прявт предприятиясь – «Талина» ГК-сь ды велень хозяйствань организациятне. «Талинанть» марто кемекстазь вейсэнь важодемадо соглашенияяк. Ды нейгак те предприятиянть важодицятнень лезксэст вельде минек техникумсо ютавтови профориентационной мероприятия школасо тонавтницятнень туртов.

Роботась техникумсонть ветяви эрявикс ды покш. Эрьва ие кеместэ важодить райононь, ды аволь ансяк, школатнень марто, ёвтнить сынст учреждениясо максовиця специальносттнень эрявиксчиденть. Ансяк, кода корты Андрей Петрушкин, мезть уш сёпомс, течинь эйкакштне овсе аволь истят, кодат ульнесть икеле. Робочей специальносттне сынст туртов марявить аволь престижноекс, мода лангсо важодеме пек а бажить. Ды те ёнкссонть эряви эштё важодемс ды важодемс. Арсеви, школасо тонавтницятнень марто вастовоматне теньсэ пек лездыть.
Зярдо ульнинек инжекс Отяжелень аграрной техникумсо, тесэ ютавтовсь профориентационной мероприятия Отяжелень 1-це № средней школань 9 «А» ды 9 «Б» класстнэнь тонавтницятнень туртов. Лиякс меремс, техникумсонть ульнесь «Панжадо кенкшень чи». Мероприятиясь пурназель робочей профессиятнень эрявиксчинть невтемга ды од ломантненень техникумсо тонавтнемань ёнкстнэде ёвтнемга.

Агротехникумонь прявттнэ, тонавтыцятне ды производственной тонавтомань мастертнэ эйкакштнень туртов анокстасть станцият-лабораторият, конатнень юрсо ульнесть мастер-класст.
Истя, «Кулинария» лабораториясонть невтевсь студенттнэнь пидемань-панемань ёрокчист. Кода ёвтнесь производственной тонавтомань мастерэсь Елена Депутатова, сынст тонавтницятне пек ёроковт, пидеманть-панеманть вечксызь. Ды кода а вечкемс, бути тень туртов тесэ улить вадря условият. 2021 иестэ техникумось изнясь грантонь проектсэ ды неть ярмактнень лангс рамазель неень шкань вадря оборудования, тескень студенттнэнь вийсэ теезель паро мебель. Тонавтнек весементень паро мельсэ.

А вана «Сварочные технологии» станциясонть инжетнень вастсь Александр Борискин мастерэсь. Александр Владимирович невтизе сварочной мастерскойтнесэ оборудованиянть, ёвтнесь сварщикень профессиядонть ды анокстась школьниктнень туртов заданият. Теде мейле эйкакштне варчизь эсь виест сваркань агрегатонть экшсэ ды весе вейсэ тейсть мотыга, конань саизь эстест ледстнемань казнекс.
Лия станциятнесэяк од ломантне варчизь эсь ёрокчитнень ды нурька шкас теевкшнесть агрономокс, электрикекс, автослесарекс, картингень «шумахерэкс», «Лада-Гранта» ды «Нива-Шевроле» автомобильтнень, «МТЗ-1221» ды «Кировец-525Пр» трактортнэнь ды натой «Акрос-580» сюронь урядыця комбайнань водителекс. Эряви меремс, тейтерькатне цёрынькатнеде аволь седе беряньстэ невтсть эсь маштомачитнень «кшнинь айгортнэнь» ветнемасо.

Те мероприятиясь эйкакштнень туртов кармась покш казнекс. Ламот лия сельмесэ варштасть техникумсо тонавтнеманть лангс. Кемеви, сынст ютксо муевить истят, кить кочкасызь тесэ тонавтнеманть ды сюлмасызь эрямост велень хозяйстванть марто.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».