Четверг, июня 13, 2024
Важное


Неень шкасто, штобу кастомс эйкакштнень мелест книгань ловномантень, эряви ветямс покш робота. Сынь касыть истямо шкасто, зярдо цифровой технологиятне саить покш тарка, зярдо эрямозонок домкасто совась Интернетэсь.

Ансяк, кода тешкстыть библиотекань важодицятне, Интернетэсь зярдояк а полавтсы книганть. Секскак эйкакштнень марто важодемантькак ветить истямо лувсо, штобу книгантькак невтема ды неень шкань технологиятнень вакскаяк а ютама. Те ёнксонть кеместэ кирдить Мордовиянь республиканской эйкакшонь библиотекань Од ломанень ловномань центрань важодицятне.

Вана уш малав 41 ие Центрасонть важоди Галина Сергеевна Баркина. Сон абонементэнь секторонь прявт.
Галина Баркина прядызе Орданьбуень Культпросветучилищанть ды распределениянь коряс кучозель Республиканской юношеской библиотекав. Сестэ библиотекась ансяк панжозель, ульнесь од, ламот сондензэ эзть содаяк.
– Роботан тесэ 1982 иестэ саезь. Профессиясь тень пек вечкеви. Ды васняяк сень коряс, свал ломань марто важодят, – корты Галина Сергеевна. – Сеске, кода сынь, ушодынь важодеме ловнома залсонть. Сестэ эдь кодаткак компьютерт ды лия техника арасель, книгатнень марто весементь теинек. Библиотекав ломантнеде сакшныльть пек ламо, лиясто озамс таркаткак арасельть, ловныцятне учильть эсь шканть. Кадык роботась ульнесь ламо, ансяк вечкевиль. Тон кандат лезэ лиятненень.
Ниленьгемень вейке иень перть вестькак эзинь янксе истямо профессиянть кочкамодо. Нама, ульнесть а шожда шкаткак. Икеле минек эрсильть командировкат велень библиотекатнес. Пондельникстэ туилинек ды пецяс ульнинек кодамояк райононь велесэ. Тосо ваннынек библиотекартнень важодемаст, тонавтынек сынст ачарькодевиксэнтень, толковилинек асодавиксэнть. Цёрынькам жо вишкинель, тень коряс стака ульнесь. Весемесэнть лиясонть жо арасть а стакачить, а мелявкст. Тевем пек вечкеви.

Эштё вейке важодицясь – од ломантнень обслуживаниянь отделэнь прявт библиотекаресь Наталья Головина – чачсь Орданьбуень Кеченьбие велесэ. Тонавтнесь школасо, конань прядызе вадрясто. Натальянь свал ульнесь мелезэ школадо мейле эсь тонавтнеманть поладомс университетсэ. Секскак содамочитнень пурнамонть поладызе Н. П. Огарёв лемсэ МГУ-нь филологиянь факультетэнь «Журналистика» отделениясонть. Студентэнь шкась ливтясь, эзь марявояк. Ды вана исень студенттнэ чалгасть эрямонь покш килангс. Эрявсь арсемс важодема таркадо, эрявсь кочкамс тев мелень коряс. Натальянень максовсь мельстуиця специальность, ульнесь мелезэ важодемс те ёнкссонть, ломань марто. Ансяк те мелесь кода-бути эзь топавтово. Зярыя шкань перть весементь арсизе ды эсь дипломонть марто мольсь библиотекав.
– Мордовиянь юношеской библиотекав сынь 2012 иестэ. Ды роботан тесэ вана уш кеменде ламо иеть. Те шкас мельсэнь ашти важодемань васенце чись. Ансяк совинь залонтень, ютынь книгань лавсятнень юткова ды ёжомгак натой паролгадсь, мария прям эсень таркасо, – ёвтни Наталья Николаевна. – Книгань ловноманть мон вечкса эйкакшпорасто саезь ды, зярдо сынь библиотекав важодеме, тевесь вечкевсь сеске.

Кода содатано, библиотекань системась – те вишкине мастор, косо васенце таркасо аштить творчествась, культурась, содамочитне ды вастовоматне-кортнематне.
– Минек библиотекась – седе пек эйкакштнень ды од ломантнень туртов, секскак тевтеме майсемс шканок а эрси, свал эряви анокстамс од мероприятият, арсемс сценарийть. Тесэ сеедьстэ ютавтневить тематической чокшнеть, интерактивной выставкат, эрсить театрализованной кенярксчить. Минь свал образсотано. Эдь эрьва вастововастовоманок мезнень-бути алтави. Бути те кодамояк сёрмадыцянь чачома чи, ваннотано-тонавтнетяно сонзэ творчестванть, бути ковкерькссэнть ули кенярксчи – мероприятиянть алтатано тенень. Секскак библиотекаресь течи сценаристкак, артисткак, режиссёргак. Эсь тевенть вадрясто топавтомга эряви содамс ды чарькодемс ламот профессиятнень, – тешксты Наталья Головина.

Лиясто цёрынетне ды тейтернетне сынськак а содыть, мезе тенст эряви. Библиотекартне лездыть. Эрьванть марто бажить муемс кель-вал, кортамс, мизолдомс. Кевкстнить, мезе ловность теде икеле, мезесь тусь мельс, кодамо жанра вечкеви. Истя стамбарнэ муевияк эрявикс книгась. Ды кода тешкстыть библиотекань важодицятне, покштояк покш мельспаро неемс свалшкань ловныцятнень. Сынь теевсть паро ялгакс ды тей сакшномаст корты седе – библиотекатне кармить эрямо.
– Зярдояк эзинь янксе библиотекав важодеме самонть коряс. Монь кенярдовты се, мезе теян, покш мельспаросан, зярдо весемесь моли вадрясто, зярдо тевем лезды лиятненень. Ды те весемесь кармавты седеяк ламо важодеме, панжомо одонть, бажамс вадрянтень. Мон вечкса эсь тевем! – кемекстызе Наталья Головина.

Библиотекартнень важодемасо кода икеле, истя нейгак кадови краеведениясь. Эдь эсь ундокстнэнь ды историянть стувтозь, а содави вандынь шкась, кодаяк а чарькодеви ды а путови питне течинь чинтень.
Краеведениянь важодемасонть покш мель явови минек ёнкссо чачозтненень ды касозтненень, поэттнэнь ды прозаиктнень эрямонь ды шкинемань кист тонавтнемантень. Тесэ минек Мордовиянь автортнэнь книгаст, тесэ нолдавиця журналтнэ ды газетатне. Пачтяви, кодамо писателенть юбилеезэ.

Теке марто башка таркасо ашти од ломантнень духовно-нравственной ды патриотической воспитаниясь. Неть ёнкстнэнень явови покш мель ды ютавтовить эрьва кодат мероприятият. Кода тешкстыть библиотекань важодицятне, од ломантне – минек вандынь чинек. Секскак сынст эйстэ эряви кастомс эсь масторонь алкуксонь патриотт.
Важодить Од ломанень ловнома центрасонть мелень коряс клубткак, косо толковавить од ломантнень талновтыця кевкстематне те эли тона теманть коряс. Истя, ули «Собеседник» од ломанень дискуссионной клубось, косо ловныцятне содавтовить од книгатнень марто, ёвтнить, мезе ловность, мезесь седе тусь мелезэст. Эштё вейке вейсэндявксось – «Театр книги. Нескучная классика». Тесэ весень туртов панжови алкуксонь театра, косо библиотекартне налксить содавикс классиктнень произведениятнестэ саевкстнэнь. Православной вастовоматнень туртов важоди «Духовное слово» клубось, эсь тиринь раськень келенть тонавтнемга-содамга – «Эрий вал» краеведениянь клубось, косо ловныцятне теевить содавиксэкс эрзянь ды мокшонь од автортнэнь шкинемаст марто.

Од ломанень ловномань центрась – те тарка, косо эрямось лаказь лаки. Вейс пурнавкшныть эрьва кодамо иесэ од ломанть, сынст туртов, книгань ловномадо башка, ютавтневить лезэнь кандыця, мельстуиця вастовомат. Тесэнь важодицятне теить весементь, кадык эйкакштне седеяк ламо ловныть ды книгантень вечкемась карми мартост эрямост перть!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».