Вторник, марта 19, 2024
Важное

 

Июненть куншкасто Пензань ёнксонь Белинской райононь Даньшино мазый ды мельстуиця велесэнть «Даньшино – Райское поместье» культурань центрасонть киштезь-моразь ютась «ДаншиноFest» весероссиянь историко-культурной V-це фестивалесь.


Пиже лугав кужонтень пурнавкшность эрьва ёндонь делегациятне, участниктне ды кенярксчинь инжетне.

«Миненек сакшность Россиянь кеветее регионсто! Те – Москов, Санкт-Петербург, Пенза, Мордовия, Белгород, Самара, Саратов, Ульяновск, Тамбов, Рязань, Нижний Новгород, Тула, Калуга, Дагестан, Кабардино-Балкария ды ламо лия», – ёвтни Николай Пиксин, Раень поместиянть азорось, эрьва иень фестиваленть ушодыцясь ды ютавтыцясь.
Мероприятиянть панжомсто шумбракстнемань валт ёвтасть МР-нь Культурань, национальной политикань ды архивень тевень министрань васенце полавтыцясь Александр Карьгин, Пенза ёнксонь коллегазо Ильдар Мавлюдов, Белгород ёнксонь туризмань управлениянь прявтось Ия Подзолкова, Russian Event Awards туризмань национальной премиянь арсицясь Геннадий Шаталов, МР-нь Экономикань, торговлянь ды предпринимательствань министрань полавтыцясь Марина Жулина, Пензасто Региононь виевгавтомань институтонь прявтось Геннадий Белорыбкин, сонзэ коллегазо, научной роботань коряс проректорось Владимир Первушкин ды ламо лия инжеть.

Организатортнэ анокстасть раськень культурань алкуксонь покш чи. Раськень морот, киштемат, мазый викшневкс марто оршамопельть, тантей ярсамопельть – весе истя, кода ульнесь ламо пингень перть Троицянь кенярксчитнестэ.
«Пензенская мордва III-XX веков. Археология и этнография» – истямо лем ало панжозель Даньшинасо Пензань государственной краеведениянь музеень выставкась, конанть ускизе Артём Павлихин. Археологиянь муевкстнэнь ды этнографиянь таштавкстнэнь вельде невтезель, кода эрясть Пенза ёнксонь эрзятне-мокшотне кезэрень пингетнестэ саезь XX-це пингентень. Экспонаттнэнь ютксо суркст-эрьгеть, оршамот-карсемат, леднемапельть, кудоютконь курмот-кармот. Эйкакштнень туртов невтезель «Про наряды и обряды» программа, ваныцятне жо мельспаросо снимсесть эрзянь ды мокшонь оршамопельтнесэ. Тесэ панжозель содавикс фотографонть ды журналистэнть Борис Тишулинэнь «Даньшино – территория возрождения и развития» выставказо. Сон зярдо-бути тей инжекс сазь, пек вечкевсь тензэ Раень таркась, секс ней фотографось тосо свалшкань эриця.

Инжетне варчнизь аволь ансяк эрзянь-мокшонь ярсамопельтнень, истя жо сеть раськетнень, конатне эрить Сурань ёнкссо, ды кунсолость-вансть морот-киштемат Мордовиянь Г. И. Сураев-Королев лемсэ «Келу» ансамблянть, Саратовасто «Россы» казаконь моронь театранть ды «DagDance» кавказонь киштемань ансамблянть. Сакшность ламо лия раськень коллективть. Ёрокчист невтизь Мордовиясто Рузаевкань райононь артисттнэяк, М. Е. Евсевьев лемсэ МГПУ-нь студенттнэяк. Тесэнь площадкатнень лангсо васенцеде невтезель Мордовиянь С. Д. Эрьзя лемсэ изобразительной искусствань музеесь (прявтось Людмила Нарбекова). Фестивальсэнть истя жо ютавтозельть Тамбовонь ды Пензань командатнень ютксо мокшнасо тюремат. Ламонень вечкевсь мастер-класстнэсэ теемс някинеть, сёвоньстэ вешкемкат, кодамс паргинеть… Весе инжетне мукшность эстест мельстуиця тевть.
Программасонть ульнесь башка ёнкскак: «ДаншиноFest» историко-культурной фестиваленть шкасто Россиянь Банконь Волго-Вятской ГУ-нь Пензань отделениянть ды Башмаковской ды Наровчатской районтнэнь ютксо сёрмадстозель «дорожной карта», конась ней лезды туристтнэнень седе шождасто пандомс услугатнень.

Неень шкасто Даньшино мокшонь кезэрень велесь Пенза ёнкссо кармась аволь ансяк культурань центракс, косо вастневить ламо раськень коллективть, истя жо деловой вастовомань таркакс, косо ламо мезе тееви региононь туризманть виевгавтоманзо туртов. Мордовиянь Экономикань, торговлянь ды предпринимательствань министранть пельдеяк туризмань брендэнть кепедеманзо кисэ Николай Пиксиннэнь казезель Сюкпрянь конев.

Russian Event Awards туризмань национальной премиянь максыцясь Геннадий Шаталов эсь кортамосонзо тешкстызе: «Те фестиваленть покш питнезэ. Зярс улить истят ломанть, кодамо Николай Пиксин – Россиясь а изняви киненьгак! Тесэ морыть морот эрьва кодамо кельсэ ды сынь минек вечкевикс масторонть вийдензэ. Тесэ неян ламо од ломанть, те корты седе, содамочитне кармить максовомо сыненст поколениясто поколенияс. Течинь кенярксчинть вейке мелезэ: Россиясь эрясь, эри ды карми эрямо!»

Фототне Н. Н. Пиксинэнь личной архивстэ.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».