Вторник, марта 19, 2024
Важное



Пиресэ сехте паро удобрениякс ловови скалонь ды саразонь навозось. Капстапрятне эйстэнзэ касыть покшсто. Улить ламо лия кедьёнкст, аволь питнейть ды шождат, саемга, бор ды сода. Илядо ёртне бананонь кедтнень, сынст эйсэ пек ламо лезэв веществат. Куловось ды аллукшось, пиянь оргатне, модамарень лукштне - сынь полавтыть хими­ческой удобрениятнень, конат колыть шумбрачинть.



Саразонь навоз
Сараз алдо навозось эли лия кудонь нармунень истя жо канды лезэ. Ансяк илядо кая свежа навоз! Эряви теемс ведь, 500 граммат навозонть човорямс 10 литрат ведь марто ды кирдемс чипай ало панжадо баксо кавто чить, сеедьстэ те веденть эряви човорямс. Те ведьсэнть валномадо мейле капстапрятне кармить виевть, кеметь ды покшт, сынь седе куроксто покшолгадыть. Be капстанть алов каямс 1 л ведь.

Водородонь перекись
Капстанть мереви валномс водородонь перекисьсэ. Сонзэ эйсэ валныть лопатнень ды ундокстнэнь. Касома шкасто те пек лезэв. Перекись марто ведесь моли ловонь соламо ведь ёнов. Кода теемс? Кавто покш пенчть перекись човорямс 2 л ведьс. Валныть эрьва недля, каямс эряви 500 мл эрьва капстанть алов.

Пищевой сода
Содасонть ули ламо натрий, эйстэнзэ покшсто касыть капста­прятне. Паро ули, бути валномс содань ведьсэнть кизэнть ушодовомсто.
Содань веденть теить истя: 10 литрат ведьс човорить 20 г сода. Те ведьсэнть валныть лопатнень ды ундокстнэнь.

Куловт
Пирень путыцятне капстань кастомсто мелявтыть, зярдо появить унжатне, капстань сэвиця ливтницятне. Сынст панемс лезды куло­вось. Эряви саемс 1 стопка куловт ды човорямс 1 л ведь марто. Кирдемс зярыя част, мейле валномс капстатнень.
Бути кизэсь пиземев, начко, капстатнень почодыть коське куловсо. Эрьва капстапрянть алов каить 1 стопка куловт. Пиземетнень марто удобрениясь пачкоди капстань ундокстнэс ды мак­сы тенст лезэ.

Борной кислота
Боронть эйсэ пургсить лопатнень. 5 литрат ведьс човорить препаратонь 1/2 вишка пенч ды пургсить лопатнень. Тень теить капстапрятнень касомсто. Бо­рось касты капстанть, прятне пурныть вийть.

Оргат
Паро лезэ максыть пиянь оргатне. Сынст эйсэ арась фосфорось, азотось, калиесь, тень лангс апак вано, сон лезэв лия касовкстнэненьгак. 100 г оргатнень човорить 500 мл лембе ведьсэ, каить 3 покш пенчть сахар. Те веденть парсте човорясызь ды кадсызь бродямо лембе таркас. Зярдо лангс лисить пузырть, те човорявксонть каямс 10 л ведьс. Мейле, валномадо икеле, пиянь органь 1 л веденть чово­рямс 5 л ведьсэ ды каямс эрьва капстанть алов 1 литра.

Марганцовка
Марганцовканть тевс нолдыть кода антисептикенть. Сонзэ тевс нолдыть ансяк капстанть видемадо икеле, валныть моданть ды видьметнень. Истя пансевить орматне. Марганецэсь лезды кенеремс капстантень, максы тензэ сахар.
Удобрениянь таркас марганцов­канть каить кизэнь куншкане. 3 г човорямс 10 л ведьс. Ламо илядо кая, ундокстнэ пултавить! Те ведьсэнть валновить капста лопатне, истя жо мереви каямс 500 мл эрьва капстанть алов.

Лия салавачить
Бути тынк арась навозонк, варчадо лия удобреният. Саемга, йод эли нашатырь, конат улить аптечкасо. Пиресэ касовкстнэнь валномс нашатыренть рамседе садоводонь лавкатнестэ, тосо сон миеви покш упаковкасо.

Нашатырень кавто покш пенчтнень човоринк 10 литрат ведьс. Эрьва капстанть алов каядо 500-1000 мл. Кемень чинь ютазь таго валнынк истямо ведьсэ. Те ведесь тандавты унжатнень ды лия зыянонь кандыця ливтницятнень.

Йодсонть ансяк пургсить. Тень эряви теемс прятнень касомадост икеле. 10 литрат ведьс каить 2 мл йод.
Теде башка, капстанть валныть тикше ведьсэ эли кшисэ. Саеви ансяк ледезь тикше, клевер эли пиципалакст, лия зыянов тикшеть, бути понгить мода марто, теде берянь а ули. Пештинк сынст покш бакс, каядо лангозост ведь, аламодо пекстынк вельтявкссо. Паро ули, путомс те баконть лембе таркас, мереви путомс теплицаскак. Зярдо ули анок? Теде карматадо содамо чинень коряс ды веденть лангс лисить пузырть. Тикше веденть парсте човоринк. Саеде тосто 1 литра ды човоринк ведра ведентень. Каядо эрьва капстанть алов вейке кече (1 литра). Омбоцеде валнынк истямо ведьсэ кемень-кеветее чинь ютазь.
Варчадо валномс мочевинасо ды лия минеральной веществасо. Ансяк сехте паро ули, бути валномс пиренть алкуксонь органикасо.

Модамарь
Модамарень лукштне - пародояк паро удобрения весе касовкстнэнь туртов. Модамарьсэнть крахмал ды лия лезэв веществат, конат кастыть эмежтнень. Лукштнень каить покш бакс ды валсызь пси ведьсэ. Колмо чинь ютазь лукшонь кашадонть кайсить пиресэ касовкстнэнь алов. Ломантне пурныть модамарень лукштнень телень перть, кие балконсо кирди, кие мацтсо. Тунда тейнить подкормканть.

Банант
Бананонь кедьсэнть ули ламо калий. Сынсткак пурныть телень перть. Керсить, костить эли керсезь путыть морозилкас. Вейке бананонь кеденть човорямс 1 литра ведьс. Ниле чинь перть сон­зэ кирдить лембе таркасо. Те ведтенть валныть 500 мл вейке прянть алов. Кой-кить почодыть бананонь керсезь лукшонть капстань озавтома модантень.

Аллукшт
Эштё вейке лезэв удобрениясь, конань анокстыть телень перть, - аллукшт. Чапамо моданть туртов сынь пек вечкевить. Аллукштнень кирдить-ванстыть коське таркасо, мереви сынст томбамс-порксамс. Капстань росаданть пирес путомсто моданть почодыть почтокс томбазь аллукшсо. Лукштне - пек паро удобре­ния ды панить пирестэнть медведкатнень.

Лопанть анокстызе Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».