Вторник, марта 19, 2024
Важное

Аволь умок Мордовия Республикань Прявтонь тевтнень топавтыцясь Артём Здунов ёвтась «Моя Мордовия» республикань кадровой проектэнть тевс нолдамодо. Сонзэ вельде арсеви пурнамс од прявтт Мордовиянь властень органтнэс. Проектэсь тевс нолдави «Россия – страна возможностей» АНО-нть лезксэнзэ вельде.



«Моя Мордовия» проектэнтень тердевить сеть, кить бажить неемс эсь республиканть виевекс, неень шкань вешематнень коряс ды вадрякс. Кить а пелить стака тевде ды анокт саемс эсь лангс сынст решамодо мелявкстнэнь. Минек прявт тевенек – теемс эрямонь вадря условият эрьва ломаненть туртов. Тесэ вадря зарплата марто важодема таркатнеяк, социальной инфраструктураськак. Тень туртов миненек эряви ладямс тевтнень ветямонь лувонь ёнкссонть, шумбралгавтомс финансонь системанть.

Те проектсэнть минь анокт неемс Россиянь весе эрицятнень, седе пек республикань эрицятнень ды Мордовиясо чачозтнень, конат ловить сонзэ тиринь ёнксокс. Течи тынь эрявтадо тесэ. Тынь вийсэнк теемс, кодамокс карми республикась, эсь кедьсэ ладямс тесэ вадря эрямонть. Весементь туртов эрявить ансяк тынк содамочитне, ёрокчись ды тынк явовтыця ёнкстнэ. Каядо яволявтомат, примадо участия, изнядо ды касодо-виевгадодо вейсэ тиринь республиканть марто!» – пшкадсь Мордовиянь Прявтонь тевтнень топавтыцясь республикань ды весе Россиянь эрицятненень.

Проектэнь участникекс мереви улемс Россиянь весе эрицятненень 25 иестэ саезь 55 иес, улезэ высшей образования ды прявтось – важодемань шкась кавто иеде аволь седе аламо. Участниктнень туртов арсезь дистанционной ды очной тестированият, те лезды кочкамс сехте виевтнень. Изницятне совавтовить Мордовия Республикань управленческой кадратнень резервас. Яволявтоматнень мереви каямс моя-мордовия.рф интернет-сайтсэнть.

Ды уш васенце кемень частнэнь перть, кода ёвтазель проектэнть ушодовомазо, тешкстазельть тёжа анкетат. Неть читнес жо яволявтозельть 3 тёжадо ламо пелькстыцят. Яволявтома каясь «Рузаевские новости» информационно-аналитической редакциянь прявт редакторось Людмила Николаевна Резяпкинаяк. Эрзянь тейтерь-авась пек бажи невтемс эсь содамочитнень ды ёрокчитнень. Сонзэ ундоксонзо ютыть покштянзо тетянзо – эрзянь содавикс поэтэнть, прозаикенть, народной ды заслуженной писателенть Андрей Дмитриевич Куторкинэнь ёндо, кона чачсь-кассь Чувашия ёнксонь Порецкой буень Аловелесэ. Ламонень содавикс «Покш ки лангсо умарина», «Лажныця Сура», «Раужо палмань», «Ламзурь» произведениятнень коряс. Теке жо велесэнть чачсь Людмила Николаевнань тетязояк. Авазо чачсь Саратовасо. Л.Н. Резяпкина зярдояк а стувтни ундоксонзо ды свал ашти покш каштанчисэ эрзянь раськенть коряс.

Неть читнестэ минь вастовинек Людмила Николаевна марто, ды сон ёвтнесь «Моя Мордовия» проектсэнть эсь участиядонзо.
«Проектэнтень мель явсть ламо ёроков ды превей ломанть аволь ансяк Мордовиясто, васолдо сонзэ томбальдеяк. Весе сынь анокт нолдамс эсь содамочист ды ёрокчист минек региононть вадрялгавтомантень, – корты Людмила Резяпкина. – Зярдо кевкстимизь, карман-арась те кадровой пелькстамонь участникекс, конань изницятненень максовить таркат республикань госвластень органтнэсэ, мон сеске меринь – карман.

Касомс, улемс панжадокс одонтень, молемс икелев ды топавтомс эсь мельтнень-бажамотнень – те монь девизэм!
Проектэнть тевс нолдамонь чистэнть саезь ды чадыковонь 16-це чис ютавтови васенце этапось – участниктнень регистрациясь. Сынь тешкстыть яволявтомат ды онлайн-анкетат. Эйзюрковонь 23-це чистэ саезь чадыковонь 23-це чис сынь сёрмадыть эссе – проектэнь прявт кармавтомась, конасонть тешкставить региононь мелявкстнэ ды сынст решамонь китне-янтнэ. Те тевентень уш кундынь!
Пшкадян весенень, примадо участия, невтинк эсь содамочинк ды ёрокчинк. Эрямось тыненк макссь истямо шанс. Невтинк прянк! Илядо пеле!»

Эсенек пельде арсетяно Людмила Николаевнанень топавтомс эсь мельтнень-бажамотнень ды лисемс изницякс. Кемтяно, эрзянь раськень ёроков тейтерь-аванть весемесь топавтови.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».