Вторник, марта 19, 2024
Важное



Мон уш ламонь пельде марсинь те мокшонь цёрадонть, келя, ули истямо сюпав ды превей ломань, кона пек ламо теи тиринь велензэ вельмевтеманть коряс. Од койть вельмевти, седикеленсетнень бажи ванстомс. Пурны перьканзо морыцятнень-киштицятнень, лезды тенст. Пек бажинь седе ламо содамс те ломанденть, эдь, мезть кортамс, аламо ней истятнэде, кить зепестэст путыть вейсэнь тевс.


Минь вастовинек те мокшонь алянть марто кавто ковдо теде икеле, раськенек покш промкссо. Ды вана уш ялгатано, содан те ломаненть тевдензэ, бажан ловныцятнень туртовгак ёвтнемс сондензэ. Дивавты, кенярдовты сон!

Эно уледе содавикст: ПИКСИН НИКОЛАЙ НИКОЛАЕВИЧ – адвокат.


Сехте паро коесь – вечкемс ды ванстомс-кепедемс малавикстнэнь. Вечксыть малавикстнэнь – вечксак тиринь ёнксот, вечксак масторот! Пиксинтнэ пингеде-пингес а колсить те коенть, цёрасто цёрас кастови-кемекстави сон кудораськень поладыцятнесэ. Кудораськесь виев, кеме, содавикс. Николай Николаевичень покштязо, Пиксин Михаил Фёдорович, Васенце мировой войнасонть ульнесь кавалеристэкс. Оцёр ульнесь, сонсь инязорось, Николай II, казизе II степенень Георгиень крёстсо. Гражданской войнасо Буденноень Васенце конной армиясоль.
Тетянзо туртов, Николай Михайловичнень, неть читнестэ топодсть 90 иеть. Чачсь сон коллективизациядонть икеле Пензань областень Даньшина велесэ. 1935 иестэ теезель тосо колхоз, ансяк эрямось эзь сыргавтово паро ёнов. Ды савсь Пиксинтнэнень кадомс сестэ тиринь веленть, сыргасть паро эрямонь вешнеме лияв, Вишнёвое велев. Тосояк ульнесь колхоз – тосо тевтне мольсть седе парсте. Эрязь-аштезь, Пиксинтнэ мекев састь тиринь велев – Даньшинав.

Николай Михайлович пингензэ перть алкукс важодсь! Ульнесь механизаторокс, мейле механизатортнэнь бригадирэкс. Тердсть эйсэнзэ колхозонь прявтокскак – эзь моле, келя, тонадынь мода лангсо важодеме. Низэ, Екатерина Николаевна, пингензэ перть дояркаль, ловсонь лейть чудевтсь, андсь кедьвийсэнзэ мастор.
Николай Михайлович ды Екатерина Николаевна кепедсть-трясть сисем эйкакшт: колмо тейтерть ды ниле цёрат. Вана те пизэстэнть монь ялгаськак, Николай Пиксин. Сон тетянзо кондямо ёлганя, эрексиянь кондямо: течи тесэ, ванды тосо. Пеке эзь касто – а кода: пек ламо тевензэ. Тевтнеяк весе покшт, эрявикст. Истя сындест арси сонсь Пиксин, покш мель яви тенст. Покш мель, покш вийть, покш ярмакт. Паро – ярмаконзо улить! Седеяк паро – мелензэ-арсеманзо валдот!
…Даньшинась – мокшонь веле, васень ломантне те таркантень лоткасть эрямо XVII пингестэнть. Седикеле велесь покшоль, виевель. Меельце шкатнестэ овсе кармакшнось чамомо, одтнэ туить, чачтнемс а кинень, велесь ёмамо лангсо. Ды вана Пиксинтнэнь трявксось-касовксось – сисемтнестэ меельцесь, веженсесь, очко нардавкскесь, сась арсемас – вельмевтемс тиринь веленть!

Кода вельмить ломаньсэнть истят паро ды валдо мельтне-тевтне?
Мон сокария весе Интернетэнть, ловнынь-ванынь, мезе сёрмадозь-невтезь сонзэ тевтнеде. – Дивань тевть! Ярмакто башка зяро смелчи, оляксчи, превть ды покш седей эрявить те арсеманть топавтомантень!
…Школав Коля сыргась вете иесэ, рудазга, тетянзо кемсэ. Саизь. Тонавтнемантень вечкемась ды бажамось те шкас сонзэ а кадыть – ней Николай Николаевичнень 51 ие.

Покш кудораськесэ эрьвась соды тевензэ. Вана Коляяк вишкинестэ саезь ульнесь тетянстэнь-аванстэнь паро нежекс-лездыцякс. Ветеце классо уш потявтыль скал. Пиреть-ракшат… – мезеськак ваксканзо эзь юта.

Школасо цёрынесь ве чияк стяко эзь ёмавто, тонавтнесь алкукс, содамочитнес бажазь. Пек вечкилизе немецень келенть – пароль тонавтыцязо. Вейксэце классонть прядомадо мейле эсь мельсэ сыргась суворовской училищав. Куроксто чарькодсь – те аволь сонзэ эрямо кись. Прядызе школанть – мольсь тонавтнеме Московов, МГУ-в, юристэкс. Ансяк васенце иестэнть эзь понго тов. Велявтсь Даньшинав ды тонавтсь велень эйкакшт – лездась тензэ немецень келесь. Омбоце иестэнть тагояк мольсь МГУ-нь юрфаков – ды сонзэ примизь. Эсь прянзо андсь-оршась сонсь, якась вагононь чамдомо, важодсь почтасо, явшесь сёрмат-газетат. Чокшне лангс якась седе домкасто тонавтнеме немецень келенть.

Васенце курсонть прядомадо мейле саизь армияв. Служась Германиясо, Берлин маласо. Ульнесь переводчикекс. Стяко шканть эзь ёмавтне – бажась седе парсте содамс масторонть, тонавтнесь келенть. Арсесь – армиядо мейле поладсы тонавтнеманть Германиясо. Мерезь – теезь: сонзэ валось тевтнень эйстэ а сезневи. 1992 иестэ Московсто студентэнь делегациясь ульнесь Баден-Вюртемберг федеральной таркань парламентсэ. Сеть вастовоматнесэ Николайнень савсь ламо кортамс немецекс – келенть сон содылизе уш пек парсте, невтизе ёрокчинзэ юристэнь тевсэяк. Ды вана парламентэнь прявтось тердизе Николаень ютамс сынст кедьсэ дипломдо икелень практиканть. Седе тов Николай поладызе тонавтнеманть Тюбинген ошонь юридической факультетэнь магистратурасо. Мейле ульнесь практика Баден-Вюртемберг тарканть правительствасо, Бундестагсо, Европань советсэ. 1995-це иестэ прядызе университетсэ тонавтнеманть, кемень иеть важодсь немецень юридической фирмасо. Ардтнесь масторонь келес, лездась предпринимательтненень алкукс, весе виень ды превень путозь. Весе тевтне чизэнзэ а кельгстявить, салыль вень шканть. Ловнось, кастсь содамочитнень, эрьва тевенть теезь, тонавтнесь. Сон оймамонь а содыця важодиця, эрьва тевенть теи педе-пес сонсь – истя тонавтызе прянзо. Самолётсо ливтямсто ловнось, сёрмадсь, арсесь, оймсесь. Ды истя чистэ чис, иестэ иес. Таркасто таркас, масторонть ве пестэ омбоце пев. Апак лотксе, кемень иеде кувать.

2004-це иестэ сон тейсь адвокатонь эсензэ контора. Мартонзо важодить тевенть домкасто содыця ломанть, конат вейкест-вейкест а ваявтыть, а манчить, кемить вейке вейке лангс. Неть койтнень кис ашти ды вансты сынст сонсь Пиксин. Кияк сынст а колси. Секс ломантне сыть Пиксиннэнь – сонзэ прявтсо адвокатской бюрось топавты кода минек, истя омбо масторонь пек покш предприятиятнень юридической тевест. Ютксост истят содавикс фирматне, кода «Альстом», Knauf, «Коммерц-банк», «Берлин-Хими», «Газпромбанк» ды лият. Течи сонзэ адвокатской бюрось ванкшны тевть, конат сюлмавозь налогонь пурныця органтнэнь, кредитэнь максыця организациятнень марто, истят тевтнень марто, зярдо савк-шны ловомс сынст аволь видекс ды вийтемекс. Пиксин ды мартонзо важодиця юристтнэ идить манчезтнень, ванкшныть сёвномань-пелькстамонь покш тевть ды кеместэ аштить видечинть кис. Лиясто ярмакткак а саить теезь тевенть кис – аволь весемесь онкстави ярмаксо. Вана кунсолан сонзэ – ды кеман: те ломаненть кедьсэ-превсэ Пазось кемексты видечинть моданть лангсо. Ламо-аламо ютксонок Пазонь истят лездыцятнеде?

Ней велявтан сенень, мейстэ ушодынь. Кеменьшка иеде теде икеле Николай Николаевич Пиксин ормалгадсь тиринь веледенть мелявкссо. Се шкастонть саезь, весе неть иетнень перть, савсь важодемс оймамонь апак сода: ванськавтсть, урядасть, пултасть каладозенть, тейсть кить-кудот, ламо лия мезе. Васняяк Пиксин кепедсь-стявтсь кудот-чить эсензэ кудораськенть туртов – лемдизе весе одкстомтозенть поместиякс. Стявтсь покш паро кудо покштянзо кудоюртс. Мейле одкстомтызе тетянзо-аванзо кудонть – сынь течияк эрить те кудосонть. 2010-2015 иетнень перть эсензэ ярмак лангс стявтсь комсешка эрьва кодат строявкст: лия эрямо кудот, спортонь ды киштемань залт, раськень оршамопелень музей, сёлт, кона веть пек мазыйстэ валдомтови эрьва кодамо тюссо, куншкасонзо фонтан. Даньшинасо ули церьковаяк. Ули баня, бильярдсо налксемань кудо. Весе строявкстнэ чувтонь – эдь весе минь касынек чувтонь кудосо, эйсэнзэ коштось шумбра-паро, оймеськак кувакасто таргави. Одс теезь электричествань, газонь ды ведень максомась, Лугав ульцяванть таргавсь парсте вельтязь ки – ней тува кияк мейсэяк а ардтни, якить ансяк ялго. Поместиясь цеця потсо, тия касыть эрьва кодат чувтот, ули покш садпире. Кудотнень стявтозь, мокшонь алясь снартсь вельмевтемс тиринь веленть, велявтомс тов ломантнень, койтнень-кирдатнень. Даньшинасо ней эрить 150 ломанть.
Даньшинань пертьпелькстнэ сыргостизь мелензэ ушодомс трямо-кастомо тесэ эрьва кодат дивань ракшат ды нармунть. Кадык, келя, олясо яксить. Ды ней алкукс тува олява яксить зубрат, верблюдт, страуст, павлинт, кабант, дикобразт, фламингот, пеликант, оленть, лость, косулят, ламат, якт, альпакат ды ламо лия мезе – весемезэ ведьгеменьшка эрьва кодамо видэнь ракшат ды нармунть. Кадык велень ломантне, сыренек-однэк, сакшныть поместияв ды неить весе тень. Оймсема читнестэ тонавтницятнень туртов тува ютавтневить экскурсият. «Паряк, зярдо касыть, сыньгак путсызь виест тиринь веленть ванстомантень», – те арсемасонть эжди оймензэ Пиксин.
Можна меремс, одкстомтозь Даньшинась ней теевсь туристтнэнь туртов якамо таркакс. Тей сакшность уш инжеть США-сто, Германиясто, Австриясто, Швейцариясто, Московсто, Сочистэ, Саратовасто, Екатеринбургсто, Самарасто, Пензасто, Саранскойстэ ды ламо лия таркатнестэ. А вана сынсь велень эрицятне Пиксинэнь поместиянть лемдизь «Раекс». Троицянь чистэ Даньшинасо пурнавкшны ламо раськень покш вейсэндявкс – ды весе малавикст, оят-ялгат. Эрьва иестэ яла седе ламо ломанть бажить пачкодеме тов ды неемс, кода эряви эрямс ды кенярдомс те эрямонтень.

Поместиянь азоронть – Пиксинэнь – седеесь свал тосо. Сон икелевгак бажи путомс виензэ Даньшинанть вельмевтемантень.
– 2010–2015 иетнестэ минь одс теинек велень се пенть, кона уш кулокшнось, – ёвтни Николай Николаевич. – Зярдо ванан седикелень фотографиятнень ды сень, мезе теинек, седеем талномадонть, некак, чавомодояк лоткси. Эстеньгак стака кемемс – мезть теинек!
2015-це иестэ Пиксин пурнась Даньшинасо «Танцуй и пой, моя деревня!» покш чи. Сон вишка пингестэ саезь вечки киштеме-морсеме, машты седямо гармониясо, лия седямопельсэ. Ды вана ней топавтынзеяк весе эйкакшпингень бажамонзо, Даньшинав сакшныть эрьва ёндо содавикс морыцят, покш коллективть – ды те пек касты Пиксинэнь мелензэ. Икелень покш чись кассь регионъютконь фестивальс, а ней вана уш колмоцеде тосо ютавтови «ДаншиноFest» Весе Россиянь историко-культурной фестиваль! Сехте парось – весе те тееви весень кис, кие эри тоско, Даньшинасо, Белинской районсо, Пензенской областьсэ. Зярдо эрьва ёндо сыть тов инжеть, Пиксинэнь туртов те покштояк покш кеняркс. Сон парсте соды, мейсэ эрямонть смустезэ. Аволь зепенть пештямосо. Сон соды, ков ютавтомс ярмаконзо. Вейсэнь лезэс! Теньсэ эрямонть смустесь. Вана фестивальтнень питнесткак покшт, ансяк мартост сыця парочись кодамояк ярмаксо а онкстави.

– Кодамо те паро – каземс ломантненень кеняркс, – корты Николай Николаевич. – Мон адвокат, аволь бизнесмен, монь арасть ярмакон офшортнэсэ, арасть кудон масторонь томбале. Весе, мезем ули, путан ансяк тиринь ёнксонть одкстомтомас.

Пиксин ваны седе тов. Сонзэ лездамонзо вельде Пензань областесь сюлмавсь Германиянь зярыя оштнень марто, молить-ютавтовить вастовомат, вейсэнь важодема. Сон бажи теемс седе виевекс аволь ансяк тиринь веленть – весе тиринь ёнксонзо. Лездась одкстомтомс Белинскойсэ райононь поликлиниканть, сонзэ вийсэ ютавтневить спортонь пелькстамот, покш читнеде икеле велень ломантненень тейни казнеть, ютавтни вейсэнь вастовомат. 2012 иестэ Н.П.Огарёв лемсэ госуниверситетсэ кемекстазель Николай Пиксинэнь стипендия, кона максови юридической ды филологической факультетэнь колмоце курсонь зярыя студенттнэнень тонавтнемань прядовомас. Юридическоесь саезь сень кис – сонсь Пиксин юрист. А вана филологической факультетэсь – те тиринь кельтнень сы шкаст.
Пиксинэнь цёрынензэ, Дима ды Гена, эрить Даньшинасо, тосо тетяст ладсо пек бажазь тонавтнить, тосо ютавтнить юткошкаст, киштить, чийнить, налксить. Сынь вишкинестэ уш педязь педявтозь те ёнксонтень.
Кода те паро – улить истят ломанть! Кодамо те кеняркс!

Тамара Баргова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».