Вторник, марта 19, 2024
Важное
 
Ламот юткстонок школанть прядомадо мейле а содыть, кодамо важодемань ки сынст учи. Лиясто кавтолдтано, ков молемс тонавтнеме, кодамо сы шкань профессия кочкама. Ней сеедьстэ эрси истя, од ломанесь тонавтни вейке специальностенть коряс, важодеме жо карми овсе лия тевсэ.
Малав истя лиссь МР-ва Россиянь МВД-нь Саранск ошонь округонь управлениянь дежурной частень операторонь лездыцянть, эрзянь аванть Елена Ивановна Наумкинань эрямосо.

Сон чачсь-кассь Дубёнкань буень Кочкур велесэ, ламо эйкакшонь триця семиясо. Тетязо, Иван Иванович Наумкин, пингень перть важодсь правань ванстыця органонь сотрудникекс, авазо, Татьяна Васильевна – тиринь велень хозяйствань предприятиясо.

Елена Наумкина вишка пингстэ содасынзе кудоютконь тевтнень, ков виензэ сатотсть, свал лездась тетянзо-аванзо туртов, кить чинь перть ульнесть важодема таркасо. Кизэнь перть эмежпиресэ пандят кочкась, кардазсост уликс ракшатнень мельга якась. Нурькинестэ, кудоютконь эрьва тевенть маштсь тееме шкастонзо ды парсте, мезесь пек лезды тензэ а шожда профессиянзо топавтомо ды кудопотмонзо свал ваньксстэ кирдеме.

Школанть прядомадо мейле сайсь мель тонавтнемс Н. П. Огарёв лемсэ госуниверситетэнь экономикань факультетсэ «Экономика и управление» специальностенть коряс. Виде, сестэ сон эштё тунь эзь арсе, вузонь прядомадо мейле, тетянзо ладсо карми важодеме правань ванстыця органтнэнь тевсэнть. Сергей Наумкин мирдезэ профессиянь коряс юрист. Тешкстасынек, сынь вейке велестэ, тонавтнесть вейке школасо ды мик вейке классо. Шкань ютазь тонавтнемасткак одтнэ поладызь вейсэ Саранскойсэ.

2006 иестэ Елена Ивановна ушодсь важодеме специальностень коряс МР-ва Россиянь МВД-нь автохозяйствасо кассирэкс. Вете иень ютазь сон ютась аттестация ды кармась важодеме участковоень лездыцякс, седе тов ламо лия тевть топавтсь правань ванстыця органтнэнь системасонть.
2019 иестэ саезь сонзэ тердизь дежурной частев операторонь лездыцякс. Вана уш колмоце ие Елена Ивановна топавты те а шожда тевенть.

– Виде, аволь сеске тонадынь ломантнень марто кортамо истя, кода веши минек профессиясь – ледстни Елена Наумкина. – Эрьванть марто бажинь ветямс кортамонть сэтьместэ, вайгелень апак кепсе, ансяк трубканть тона ёно аволь свал тень чарькодить. Вейке тев, зярдо тейтерь-ава талнозь пшкади миненек лезкс мельга ды теке шкасто марявить ве ёно авардиця эйкакшт. Сестэ седееть соракады, весе виеть путат седе курок лезксэнь максомс, весень кармат капшавтомо ёвтазь адресэнть коряс ардомо. Овсе лия тев, зярдо гайневти иредезь аксун цёра ды карми теть эрьва кодамо визькс валонь ёвтамо ды лангозот пижнеме, лиясто мик а чарькодеви, кодамо тувталонь коряс сон тонеть гайневти…

Нама, кодамо ёжомарямозо ломаненть бу аволь уле, минек васень тевесь – шкань апак таргсе сонензэ кучомс лезкс.
Елена Ивановнань валонзо коряс, аволь сеске весе тонавтневсь, эдь ломань марто кортамосонть, куш кодамо профессиясо улить башка ёнкст, видестэ сынст тевс нолдамось маштови весенень.
Васень шкасто покш лезксэнь максоманть кисэ течи сон ёвты сюкпрянь валт тонавтыцянзо – правань ванстыця органтнэнь истят сотрудниктнень лемс, кода Юрий Михайлович Зинкин ды Андрей Николаевич Друговейко. Самай сынь ульнесть превс путыцянзо, зярдо сонзэ ульнесть кевкстеманзо те эли тона кажос понгозь ломанентень седе курок лездамсто.

Семиясо, кодамо паро мирдесь аволь уле, ков седе вадря, зярдо нись чокшне кудосо, ансяк эрямосо аволь свал истя лисни. Чинек-венек важодеманть лангс апак вано, Наумкинтнэ эрить вейке-вейкень чарькодезь ды лездазь.

Эйкакштне чарькодить, кодамо эрявикс тев топавтыть тетяст-аваст. Покш цёраст, Владислав, парсте тонавтнесь республикань Ёроков эйкакштнень туртов лицейсэ, конань те иестэ вадрясто прядомадо мейле сонзэ саизь тонавтнеме Санкт-Петербургонь «Высшая школа экономики» Национальной исследовательской университетс, омбоце эйкакшост – Мария тейтерькась – зярс эштё тонавтни школасо, колмоце классо.

Паро, зярдо семиясо вечкема, сэтьмечи ды ладямо, сестэ куш кодат стакачитне изнявить ды эрьва тевесь канды уцяска ды кенярксчи.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».