Од иеденть икеле Сбербанкось тейсь кенярксов казнеть эсь клиенттнэнень. Истя, ацамковонь 24-це чистэнть саезь 31-це чис Сбербанконь офиссэнть, кона ашти Саранск ошонь Октябрянь 70 иетнень лемсэ проспектэнь 86-це кудосонть, ютавтови акция «Тёплый Новый год». Эрьва сыцянтень мереви улемс те акциянь участникекс. Тень туртов кочкинк мелезэнк туиця Од иень авторской открытканть, тешкстынк адресэнть ды кучинк малавиксэнк эли ялганк туртов теске жо Сбербанконь отделениясо почтав апак яка. «Открыткатнень мазылгавтоманть арсизь минек подшефной эйкакшонь кудонь эрицятне, – ёвтни Сбербанк ПАО-нь 8589 Мордовиянь отделениянь Управляющеень тевтнень топавтыцясь Анна Салеева. – Ламо артовкстнэнь эйстэ кочкинек кавто, конат кандовстькак открыткатнень лангс. Неть – Дарья Кувшиновань Орданьбуень эйкакшонь кудосто-школасто ды Виктория Вергазовань Ельникень социальной-реабилитационной центрасто роботаст. Сбербанконь важодицятне уш содавтызь эйкакшонь весе кудотнень ды казсть вадря казнеть».Теске жо Сбербанксо вишка инжетненень мереви гайневтемс Якшаматянтень ды ёвтамс эсь мельтнень-бажамотнень, а эштё теемс Од иень сувенир.
Юлия Еремина