Вторник, марта 19, 2024
Важное


Ноябрянь 30-це чистэ Саранскоень И.М.Яушев лемсэ Оперань ды балетэнь театрасо ютавтозель торжественной промкс, кона алтазель «Сыродельный комбинат «Ичалковский» предприятиянть 90 иетненень. 

Эйзэнзэ сакшность МР-нь Госсобраниянь Председателесь В.В.Чибиркин, МР-нь Правительствань Председателесь В.Ф.Сушков, МР-нь Правительствань Председателень васенце полавтыцясь – Велень хозяйствань ды продовольствиянь министрась В.Н.Сидоров, Ицялонь райононь Администрациянь прявтось В.Г.Дмитриева, предприятиянть партнёртнэ Даниясто, Польшасто, Франциясто, США-сто, сырьянь поставщиктне, перерабатывающей промышленностень предприятиянь прявттнэ, производствань ветерантнэ, комбинатонь важодицятне.
Пурнавозтненень поздоровт ды лембе валт ёвтась МР-нь Правительствань Председателесь В.Ф.Сушков. Сон тешкстызе, «Сыродельный комбинат «Ичалковский» предприятиясь пищевой промышленностень предприятиятнень ютксо сехте виев аволь ансяк республикасо, Россиясояк. Ицялонь сыранть мельспаросо рамить Московонь, Санкт-Петербургонь, Екатеринбургонь, Пензань, Ульяновскоень, Нижней Новгородонь областень, нурькинестэ меремс, Калининградсто саезь Дальней Востоконть видьс, эрицятне. Бути икеле, теемань васенце иетнестэ, предприятиясь чизэнзэ нолдась 100 килограммат сыра, ней жо – 300 тоннадо ламо.

Течи Ицялонь сырань теиця комбинатось нолды 70 лемень продукция. Ды сон пек паро. Тесэ важодицятне бажить аволь ансяк седе ламо продукция нолдамс – кода седе ламо продукция миемс.
В.Ф.Сушковонь валонзо коряс, «Сыродельный комбинат «Ичалковский» предприятиясь республикасо пищевой предприятиятнень эйстэ вейкесь, кона сюпалгавты республикань ярмаконь паргонть. Эрьва иестэ пандыть 360 миллионт целковойть налог.

Ицялонь сырань теицятне кеме сюлмот кирдить «Магнит», «Пятёрочка», «Лента», «Перекресток» ды лия торговой фирматнень марто. 2019 иень кемень ковс Ицялонь комбинатось нолдась 8 тёжат 400 тоннат сыра. Миезь 3,2 миллионт целковоень питнес. Тешкстасынек, предприятиясонть покш мель явови аволь ансяк продукциянь нолдамонтень, истя жо цехтнесэ важодемань условиятнень вадрялгавтомантень. Истя, домкасто витнезь компрессорноесь, котельноесь. Тедеде истя жо строязь скалоень кельмевтемка. Течи виевстэ моли лабораториянь строямось.

«Сыродельный комбинат «Ичалковский» предприятиясонть важодить 338 ломанть. Средней зарплатась 36 тёжат целковойть. Покш мель явови важодицятнень ёрокчист кастомантень. Тесэнь специалисттнэ эсь ёрокчист кастыть омбо масторсо – Даниясо, Голландиясо, лиясо.
Торжественной промкссонть предприятиянь важодицятнестэ ламотненень максозельть покш казнеть. Истя, сыранть мельга ваномань коряс цехень мастерэсь Ольга Александровна Солодовникова казезь Славань III степенень орденсэ. Ольга Александровна – комбинатсонть эсь ломань, важоди уш колоньгемень иеть ды трудовой книжкасонзо ансяк вейке сёрмадовкс. МР-нь Прявтонь Благодарностть, МР-нь Госсобраниянь, МР-нь Правительствань Почетонь грамотат максозь лия важодицятнененьгак.

МР-нь Госсобраниянть ды весе депутатонь корпусонть пельде поздоровт ёвтась республикань парламентэнь Председателесь В.В.Чибиркин. Сон тешкстызе: «Кеман, предприятиясь седе товгак карми нолдамо пек паро продукция ды эштё аволь весть саи васенце тарка раськеютконь ды весероссиянь выставкатнесэ. Текенень, ансяк тедеде «Сыродельный комбинат «Ичалковский» предприятиясь сайсь покш выставкатнесэ колмо Гран-Прить ды сырнень кавксо медальть».

Пётр ЗИНОВЬЕВ
Фототне: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».