Вторник, марта 19, 2024
Важное

Течи кортамонок карматано ветямо сень перька, мезевтеме арась эрямо. Те – ведесь.Васня макстано теть кевкстема: «Мекс веденть ловить Моданть лангсо сехте питней сюпавчитнестэ вейкекс?». Арсян, те кевкстеманть лангс сеске муят, мезе ёвтамс. Содасак сеньгак, кодамо лезэ канды ведесь весе минек туртов.

 

Масторлангсо арась вейкеяк касовкс, вейкеяк ракша, кинь эйсэ аволь уле ведь. Ледстясынек сень, мезе касы пиресэнек. Ней кенерема лангсот чукшторовтне, умартне, куяртнэ, лия мезтне. Сезть мезеяк ды саик кургозот. Сеске марясак сускозь касовксонть танстензэ. Истямо тантей ведь ули апельсинсэнть, арбузсонть, лимонсонть ды истя седе тов. Ламо ведь ули ракшатнень эйсэяк. Онкстындерямс сонзэ сталмонзо, пеледензэ ламонть сайсы ведесь. Седеяк ламо ведь ули ломаненть эйсэ. Зяро эйстэнзэ эсеть эйсэ, ловови эстетькак. Тень туртов эряви онкстамс эсеть сталмот, явомс сонзэ 3-в, лисезенть ламокстамс 2-ксть.
Касовкстнэсэ, ракшатнесэ ды ломаненть эйсэяк ведесь а ашти апак полавто. Эрикс организмась свал ютавты сонзэ эйсэ. Тарказонзо эряви лия. Истя, ломанентень чизэнзэ эряви кавто литрадо ламо ведь. Пелензэ сон симезь симсы, пелезэ понги тензэ ярсамопеленть марто. Лия касовкстнэнь, ракшатнень, калтнэнь туртов ведесь – те сынст кудост. Веенстнэ эрить салов ведьсэ, омбонстнэ – аволь саловсо.Ванькс ведесь – сюпавчи, конань мейсэяк а полавтсакВесе содасынек: ведтеме арась эрямо. Секс весе миненек эряви ванстомс сонзэ. Ванстомс веденть – лисни, ванстомс эрямонть.Ведесь эряви аволь ансяк валномс касовкст ды симемс ракшатненень ды ломантненень. Ведтеме а кода шлямс, муськемс. Ошонь куринкатнень ванськавтомась, машинатнень шлямось истя жо вешить ведь. Пек ламо ведь ютавтыть фабрикатне ды заводтнэ. Невтемань кисэ: вейке тонна сталенть нолдамонзо туртов эряви ютавтомс 150 тоннат ведь, вейке тонна конёвонть нолдамонзо туртов эряви 250 тоннат ведь.
Лангс ваномс, Модамасторонть лангсо ведтенть сатышка – иневедтне вельтить пеледензэ ламо планетанть. Ансяк иля стувтне, иневедтнесэ ведесь салов. Ломантненень эряви аволь салов ведь. Сондензэ Моданть лангсо ков седе аламо. Ансяк ломантне сеедьстэ стувтнить теде ды овсе а бажить ванстомс сонзэ. Эрьва кода рудазкавтыть эйсэнзэ. Лейтнес, эрькетнес ёртыть рудазов, симемс а маштовикс ведь, мезенть кувалма кулыть эйсэст эриця касовкстнэ, ракшатне, пужить-коськить лей чирева касыця тикшесь, цецятне. Рудазкавтозь ведесь покш зыян канды ломаненть шумбрачинзэ туртов.
ВАНТ! Иля симне ведте лейстэ, эрькестэ, сёлтсто. Эйсэнзэ, секень вант, улить зыянов веществат ды ормань кандыця бактерият.Тердтяно тоньгак, вишка ловныця, ванстомс веденть. Тонавтнек стяко а ютавтнемс ламо ведь. Ушодт кудосо. Зярдо кармат пеень шлямо, панжадо иля кадно кранонть. Тень туртов седе паро ули каямс ведь стопкинес. Кедень-чамань шлямстояк иля вало веденть стяко, нолдык сонзэ састо. Шлямодо мейле кранонть пекстык парынестэ, илязо чуде ведь. Натой суринень эчкелмасо чудиця ведтенть чинь чоп пурнави пек ламо. Сон аволь кельге литрань покшолмасо 500 ламо банкаваяк. Иля стувтне, ванькс ведесь – сюпавчи, конань мейсэяк а полавтсак.
Кода ванстасть веденть седикеле
Кезэрень пингень эрицятне веденть ловсть Пазонть пельде сехте питней казнетнестэ вейкекс. Содызь сонзэ лезэнзэ. Секс ванстасть веденть, кода эсь эрямонть. Рудазов ведест зярдояк эзть ёртне лейс эли сёлтс. Муськемань ёрвалемстэ, экшелямсто пельсть бутраявтомс веденть. Покштнеяк, вишкинетнеяк амазый ды апаро тевекс ловсть сельгемс ведьс, теемс лия кодамояк зыянов тев. Содасть, тень мельга ваны веденть лангсо азоравась – Ведявась. Сон мезеяк а менсти сельмензэ икельде. Косо мезе аволь истя, Ведявась зярдо а зярдо пандсы апаро тевень теицянтень кежензэ. Секс ломантне пельсть эйстэнзэ, кирдсть коронзо, вансть мелензэ. Ведяванть лемс сеедьстэ ютавтнесть озкст, косо эрьва кода снартнесть витемс веденть лангсо Азораванть мелензэ. Ломантне пурнавкшность лисьмапря эли лей чирес, мартост кандтнесть эсест кедьсэ пидезь-панезь кашат, пачалксеть ды сюкорот. Сынст эйсэ «каванясть» Ведяванть. Шнасть эйсэнзэ, ёвтасть сонзэ лемс ансяк лембе валт. Вешсть пельдензэ лездамс тенст эрьва тевсэ. Пшкалесть сонензэ вана истямо ладсо:
Ведявине, валдо оймине,Ведявине, сиянь рунгине,Мода алдо тон ней лисят,Мастор ланга тон ней чудят.Сиякс перть пельга тон срадат,Сырнень покольнекс кеверят,Эрьва мезе шлят ды симдят,Эрьва козонь тон эряват.Минь течи весе теть сынек,Кеденек ведьсэть минь шлинек,Ашо пацясо нардынек,Казненек теть минь кандынекСуронь кашанок пидинек.Валонок кунсолыть-марить,Энялдоманок мельс саитьМезть вештяно – тенек максык,Мезде пельтяно – ванстомизь.Апаронок шлить тон, нардыть,Шумбрачинек максык-ванстык.
Валдонть ды Чоподанть ютксо тюрема
Седикеле весе ломантне кемсть: кизэсь истямо шка, зярдо Модамасторонть сы шкань уцясканзо кис моли виев тюрема Валдонть ды Чоподанть ютксо. Карми-арась Моданть лангсо валдо эли сон вельтяви чоподасо? Эрьва иестэ изницякс лисни Валдось. Ансяк те изнявксось сакшны аволь стяко. Сонзэ кис эрявсь пек виевстэ тюремс. Медьковсто (июльстэ) зярыя чить Чипаесь чары менельганть мекев-васов, учи, зярдо Пурьгинепазось мусы ды невтьсы, кодамо киява сыргамс седе тов. Се шкастонть сонензэ лездамо сы мазый тейтересь валскень Зорювась. Сон сайсы Пурьгинепазонть кедте ды тердьсы молемс мельганзо видьстэ, лия ёнов апак тукшно ды апак пурдтне. Истя моли свал. Весементень максозь эсензэ шка: кизэнтень, сёксентень, телентень, тундонтень. Истямо Эрямонть коезэ.А стяко кизэнь чинть, зярдо Чипаесь кузи сехте вере тёкшос (те эрси медьковонь 7 чистэ), ламо мастортнэсэ тешкстасть, кода пек покш кенярксчинть. Ламо таркава кирвазтнильть толпандят. Сынь лововсть «Чипаень сельмекс». Неть толпандятнень валдост эйстэ теке мерят зеркалань пачк весе Модась неявсь тештев Менелекс, Менелесь – Модакс.

Кизэсь – экшелямо шка
Неть читнестэ а уды Ведяваськак. Кизэсь – экшелямо шка. Ды Ведявась, кода зярдояк, топавты эсензэ вечкевикс тевензэ – апак лотксе экшели. Весемеде пек вечки экшелямо чопода веть, зярдо лейтнень-эрьктнень чиресэ кияк арась. Кувать экшелямодо мейле Ведявась пелеветь лиси лей чирес, карми судрямо кувака черензэ. Мейле оймси-теи аламос ды пиже валскеть таго кекши эсензэ таркас ды карми ваномо, мезе моли ведь лангсо. Сонсь Ведявась чить а невтни прянзо. Сон кекшни тусто куракш удало ды салава ваны ломантнень мельга, кода сынь ветить пряст ведь лангсо, маштыть-арась укшномо, ведьс чопавтнеме. Се шкастонть Паз илязо мере савтомс сонзэ кежензэ. Пек покш питне сави пандомс се ломанентень, кие беряньстэ вети прянзо ведь лангсо, бутраявты ды рудазкавты веденть. Се ломаненть лангс Ведявась, секень вант, кучи кодамояк зыян: ваявтсы эли лепиявтсы, педявты кодамояк апаро орма. Те орманть эйстэ, паряк, меневат, бути пшкадят Ведявантень паро валсо, вешат пельдензэ велявтомс шумбрачинть. Пшкалесть сонензэ лия энялдома мартояк. Мирде экшсэ аватне, кинь арасельть эйкакшост, энялдсть икелензэ максомс эйдине. Коське шкасто, зярдо кувать арасть пиземеть, вешсть пельдензэ лембе пиземне: касост пиресэ эмежтне, паксясо – сюрось.Се чистэнть ломантнененьгак эряви ламос кенеремс: кирнявтомс толпандя велькска, экшелямс ванькс ведьсэ, пурнамс-кочкамс тикшеть, конатне самай сеть читнестэ пурнасызь сехте лезэв виест.Тейтертне тикшестэ-таташкасто кодыть каштазт, чокшне ланга нолдылизь ведь мельга, вансть, кода ды кона ёнов сынь уить. Бути каштазось ваи, лисни, се тейтеренть алужозо лоткась вечкемензэ ды сонзэ экшс мирденень а лисеви.
Ведявантень алтазь чистэнть кирвазтнесть толпандят. Сынст перька киштсть, вельскаст кирнявтнесть, кить седе верьга кирнявтыльть, сетнень учи таго-мезе паро. Толпандятнесэ аватне пултасть сэредиця эйкакшост лангсто каязь панарнэтнень, кемсть, неть панарнэтнень марто палыть орматнеяк. Од ломантне ды эйкакштне толпандя велькска кирнявтнемадо мейле налксесть «сасамкасо», «кундамкасо».Пек лезэвекс се чистэнть лововсь валскень росась. Пиже валскеть тейтертне лисильть луга лангов «росань амолямо». Сайнесть ванькс коцт ды кече или очкине. Коцтонть ацылизь начко луганаронть лангс, усксилизь мекев-васов, истямо ладсо пурнасть роса. Начко коцтонть мейле пурдылизь кеченть эли очкиненть велькссэ. Пурназь росасонть шлилизь чамаст, кедест. Истямо ладсо «пансть» эсест эйстэ орматнень.Те коесь, арсян, аволь берянь. Секс паро улевель сонзэ одов вельмевтемс ды ютавтнемс эрьва велесэ.
ВАНТ! Экшелямсто ветяк прят кода эряви. Иля укшно пек васоло ды домка таркава. Кунсолок покштнень кармавтомаст.
Превпаргинес содамочинь байгинеть
1. Зяро лейть улить Мордовиясо? Лейтнеде Мордовиясо лововить 114.2. Кодат сехте покш лейтне Мордовиясо? Сехте покш леекс лововить Сурась, Мокшась, Раторось, Инсарось.3. Ков прыть Сура ды Мокша лейтне? Сурась ды Мокшась прыть Рав лейс (рузокс Волгав).4. Зяро эрькеть улить Мордовиясо? Мордовиясо эрьктнеде малав 500.5. Кодамо лей чиресэ чачсь эрзянь ине скульпторось Степан Эрьзя? Степан Эрьзя чачсь Ратор (Алатырь) леенть чиресэ.6. Кинь ловить ведень азорокс римлянтнэ?Нептунонь.7. Кинь ловить ведень кирдиекс гректне? Посейдононь.8. Кинь ловить ведень азоравакс эрзятне? Ведяванть.

Валмеревкст ведтенть
1. Ведесь – весементь лангсо прявт2. Аволь весе ведесь маштови симемс3. Веденть апак сода, иля эце сонзэ потс4. Ведесь кев чови5. Толсо а палы, ведьсэ а ваи6. Аштиця кев алга ведь а чуди7. Човарсо ведь томбамс8. Иля сельгене ведьс, маштови симемс
Лопанть анокстызе Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».