Вторник, марта 19, 2024
Важное

Те иень тунда Ромодановань ёнкссо улемстэ, райцентрань куншкакурованть ютамсто сельмем икелев каявсь эмеж-пиресэ касовкстнэнь ды кедьёнксонь микшнемань лавкась. Се чистэнть марявсь весе ломантне, конат ульнесть сонзэ маласо, капшасть совамо тов, тень минь рединек потмозонзо совамстояк.


Алкукскак, лавкась ульнесь прок мекшень пизэ, кавто микшницятне ливезень панезь бажасть аволь ансяк кассанть вельде седе курок нолдамс очередьсэ аштицятнень, эштё весе тенст пшкадицятненень лездасть муемс мезе косо путозь лавкань кувака стеллажтнень лангсо. Эдь эрьванень эряви эстензэ ловномс те эли тона упаковканть лангсо сёрмадовсонть.

А мезть сёпомс, неень шкане ярмаконь а сатомань ды ламодояк ламо микшнема таркатнень мельс саезь, чуросто истямо тев редятано…
Видькстан, тосто монгак муинь рамамс сень, мезенть кувать вешнинь Саранскоень аволь вейке лавкасто. Тосо питнетнеяк кенярдовтыть аволь покшолмасост. Мезесь сехте паро, тов эрьва совицясь мусы эстензэ весе эрявиксэнть. Весемева неявсь, тов сыцятнень ютксто сехте ламотне ульнесть те ёнксонь велетнестэ сыцят. Самай сынст туртов панжозель микшнемань те таркась.

Маласон аштиця вейке ломаненть марто кортазевемстэ, кевкстия, нать лия истят лавкат тесэ аламо? Каршо валось истямоль: «Сатышка, ансяк минь тонадынек тей сакшномо неень шкане кавто сехте эрявикс тувталонь коряс: алкинеть питнетне ды свал эрявиксэнть улемась.
Шкань ютазь теевинек содавиксэкс те лавкань азоронть Юрий Буерин марто. Сонзэ эйкакш пингезэ ютась теске, Ромодановань ёнкссо, школанть прядомадо мейле тонавтнесь Мордовиянь Н.П. Огарев лемсэ государственной университетэнь экономической факультетсэ. Важодемань кинзэ ушодызе пек парсте, сеске саизь важодеме Федеральной казначействань управленияв, тосо сон ульнесь доходонь отделэнь специалистэкс. Кие соды, кодамо тёкшос касоволь бу стакачиде а пелиця, ламос бажиця од цёрась.

Юрий Александрович жо кочкась эстензэ ков седе стака ки, лембе кабинетсэ сэтьместэ тевенть топавтоманть таркас, сон кундась предпринимателень а шожда тевс.
Юрий Буерин кармась домкасто тонавтнеме видьмекстнэстэ цецятнень, эмежтнень видестэ кастомань кевкстематнень. Тень туртов аволь весть якась содамочинь пурнамо «Тимирязевец» ООО АС-в.
Юрий Александрович самай тосто вастызе нинзэ, вейсэ важодемстэ теевсь содавиксэкс Московонь педагогической госуниверситетэнь студентканть, Мордовиясо чачозенть-касозенть Марина Бардина (тейтерьксэнь фамилиязо) марто.

Се шкане од тейтересь тонавтнесь вере ледстязь вузонь нилеце курссо «Русский язык и литература», «Русская православная культура» дополнительной специализация марто факультетсэнть.
Иеде седе ламо шкань перть одтнэ васня вастневсть Московсо. Венчамодо-урьвакстомадо мейле апак кавтолдо сайсть мель эрямс чачома ёнкссо ды кандомс лезэ тиринь республикантень. Эрямо таркакс кочкизь Ромоданова посёлканть. Куш эштё сестэ содасть, Московсо ков седе ламо сюпавчи пурнавольть ды эрямосткак лия лувсо туевель.

2001 иестэ Юрий Буерин «Лучший старт» од ломанень пелькстамосонть лиссь васенце таркас. Ламо иень перть предпринимателень тевсэ парсте важодеманть кисэ сон казезь Мордовия Республикань Торговлянь ды предпринимателень министерствань Почётонь грамотасо. Парсте важодемась ды седейшкава тевень вечкемась лезды тензэ изнямс стакачитнень.

Уцяскаст –эйкакштнесэ

Аволь умок, умарьковонь 20 -це чистэ, Буеринтнэнь семиясо ульнесь покш кенярксчи, Родион цёрынест туртов топодсть 3 иеть. Те ламо эйкакшонь триця семиясонть теевсь коекс, чачома чинь тешкстыцянтень поздоровонь ёвтамо сакшныть ансяк сехте малавикстнэ, покштятне-сырькайтне, крёстной тетясь ды авась. Тешкстасынек, Юрий Александрович ды Марина Владимировна Буеринтнэ трить кастыть вете эйкакшт.

Сехте покшонтень, Стёпанень – кевейкее ие, те иестэ сон ушоды тонавтнеме 5-це классо, школасо тонавтни парсте. Цёрынесь пек вечки хоккейсэ налксеме ды баянсо седямо, шказо эрьва ков саты. Музыкальной школав седейшкава яки ды спортонь секциявгак кенери. Тетянзо-аванзо туртов сон – васенце лездыця, ялакстнэнь ды сазортнэнь мельга ваныця. Омбоце эйкакшост, Варвара – вейке иеде седе вишкине лелянзо эйстэ, ансяк тевень коряс тунь а кадови эйстэнзэ. Школасо тонавтни ансяк «ветес», яки художественной школав ды киштемань кружоков. Патянть лангс ванозь, колмоце эйкакшост – Елизавета, истя жо тонавтни художественной школасо ды яки киштемань кружоков.

Родион зярс эйдень кужосо ды свал бажи налксемс веженць эйкакшост, Устиния марто, зярс сонензэ ансяк вейксэ ковт.
Кевкстеманок лангс, кода сась мельс неень шкане чуросто вастневиця Устиния лементь путомась, Марина Буерина пачтясь: веженць тейтерензэ марто пешксесэ улемстэ аштесь храмсо ды апак учне сельмензэ икелев понгсь Киприанонь ды Иустиниянь пазавась. Самай сестэ истямо арсемась аволь ансяк сась, сеске кемекставсь.

Марина Владимировнань валонзо коряс, сынь Юрий Александрович марто икелепелев эзть арсе истямо покш семиядо. Сонсь Марина Буерина чачсь-кассь аволь покш семиясо, косо ульнесть ансяк кавто эйкакшт. Сондензэ башка ули лелязо. Чачома тарказо – Краснослободской райононь Чукало велесь. Тетязо-авазо важодсть колхозсо, тетясь ульнесь электрикекс, авазо – эйдень кужосо воспитателекс. Велесэ ламо тевтнень топавтомантень сон тонадсь эште вишка пингстэ.

– Васенце эйкакшонть чачомадо мейле минь покш кенярксчисэ ульнинек, – ёвтни Марина Владимировна. – Те вечкемась кармась максовомо лия эйкакштнень чачомстояк. Истя семиянок кассь иень, кавтонь ютазь. Виде, ламо эйкакшонь трямось-кастомась, эрьва мезес сынст тонавтомась – те аволь шожда ки, ансяк минь эзинек бажа эйстэнзэ велявтомс. Стакачитне эзть тандавто эйсэнек. Койсэнек, мекевланк, зярдо ломанесь мартост вастови, тееви седе виевекс ды ламонь тееме кенерицякс, семиянтькак сынь седе вейсэндить ды теить седеяк кемекс.

Кевкстеманок лангс: кода весементь кенертядо тееме (сон эште мирдензэ туртов лезды ветямс бизнес), Марина Владимировна мерсь: «Те эдь васенце эйкакшонть марто мон аламо мезес кенеринь, эйкакштне жо тонавтыть эйсэнек ды пек полавтыть. Шкань ютазь тонадынь видестэ ютавтомо вийтнень ды шканть, лиякс ванан стакачитнень ды мелявкстнэнь лангс. Куроксто редявсь, кодат лездыцят касттано. Ламо эйкакшонь триця семиясо сехте эрявиксэсь – вейке-вейкенень лездамо сынст тонавтомась, сонстемензэ а кода».
Кудазорось Юрий Александрович теи весементь, штобу семияст эряволь уцяскавсто. Ламо шка ютавты важодема таркасо. Эсензэ вийсэ кепеди кудо, эрямонь лувсонзо тонавты эйкакштнень улемс тевень вечкицякс, стакачиде а пелицякс, содамочитнень свал кастыцякс. Марина Владимировна кирди кудоютксо ваньксчи, пиди-пани ды весе оймень виензэ кази эйкакштненень.
Буеринтнэ уцяскаст муизь ламо эйкакшонь трямосо-кастомасо, эйстэст алкуксонь ломанень ливтемасо.

Ромодановань муниципальной райононь орготделэнь прявтось Людмила Андреевна Гусева:

– Буеринтнэнь семиясь минек каштанчинек. Васняяк сон ламо эйкакшонь триця, косо эйкакштне кастовить вечкемасо ды эрьва кодамо тевс тонавтомасо. Юрий Александрович ды Марина Владимировна ояксчисэ трить-кастыть вете эйкакшт. Кудазоронть ули эсензэ тевезэ ды максы важодема минек ёнкссо эрицятненень, теньсэ ули путовксозо райононь социально-экономической невтевкстнэнь кепедемасо.
Ков сатыть виензэ сон бажи лездамс весе тензэ пшкадицятненень. Седе ламо бу улест истят предпринимательть минек Ромодановань ёнкссонть.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».