Вторник, марта 19, 2024
Важное

Февралень 21-це чистэ тешкставсь Тиринь келень раськеютконь чись. Тень коряс лембе кенярксчи ютась Эрзянь ды мокшонь раськень драмань театрасо. Сонзэ пурнызь Равчирень финнэнь-угрань раськетнень культурань центрась ды МР-нь Культурань, раськень политикань ды архивень тевень министерствась. Ветясь концертэнть Е. О. Модина.



Театрань фойесэ панжозель кедьчелькев ломантнень выставка. Тесэ невтевсть минек викшневкстнэ, чувтосто керсезь теевкстнэ ды ламо лия мезе. Промксонтень сакшность Н. П. Огарёв лемсэ МГУ-нь ды М. Е. Евсевьев лемсэ МГПУ-нь филологиянь факультетэнь студенттнэ, Саранскоень школатнень эрзянь ды мокшонь келень тонавтыцятне.
МР-нь Культурань, раськень политикань ды архивень тевень министранть С. Н. Баулинань пельде лембе валтнэнь ловнынзе А. М. Кочеваткин.
Вал сайнесь Эрзянь ды мокшонь раськень регионъютконь общественной вейсэндявксонь прявтось Ю. А. Мишанин:
– Кельтнень, кода шумбрачинть, кода ялгаксчинть, эрявить ванстомс. Ламо кельть масторлангсонть, ламо истят кельть, конат аштить ёмамо лангсо. Течинь покш чись ладязь а стяко. Те чавовозь студенттнэнь ледстнемань чи, сынь лиснесть демонстрацияс эсест бенгальской келень ванстомга ды ледезельть. Минек масторсо тееви ламо кельтнень а ёмамга. Малав сядо кельть тевс нолдавить образованиянь системасо. Тонавтома ветяви 24 кельсэ. Нама, улить стакачитькак. Койсэнь, весень ули мелест, кадык минек кельтне виевстэ гайгевельть аволь ансяк тонавтомань системасо, гайгевельть культурань учреждениятнесэ, ушосо, кудосо-семиясо. Секскак, меленек-арсеманок коряс МР-нь Прявтось кемекстызе кельтнень, раськень культурань ванстомань коряс государственной программанть. Кувать ютынек тенень. Сюкпря весенень, кие яви покш мель тиринь кельтнень ванстомантень. Те: тонавтыцятне, студенттнэ, СМИ-тне, культурасо важодицятне. Кадык минек кельтне свал виевстэ гайгить!
Тиринь келенть, культуранть, койтнень-кирдатнень ванстомаст кисэ Эрзянь ды мокшонь раськень регионъютконь общественной вейсэндявксонть пельде Благодарностьсэ казевсть Равчирень финнэнь-угрань раськетнень культурань центрань этнокультурной отделэнь ветицясь Т. Т. Чекушова, С. Д. Эрьзя лемсэ музеень декоративно-прикладной искусствань отделэнь ветицясь Н. Н. Челмакина, Саранскоень 3 № эйкакшонь художественной школань тонавтыцясь О. А. Малаева, Рузаевкань райононь мокшонь келень тонавтыцясь А. В. Дивеев.

– Мордовиясо эрить 119 раськеть. Умонь шкасто саезь минек модатнесэ эрясть эрьва кодамо раськень ломанть. Эрицятнень васенце сёрмадстоманть коряс, кона ульнесь 1897 иестэ, эрзя-мокшонь ёнкссо муевсть поляконь, латышень, немецень, евреень келень содыцят. Сынь тешкстызь неть кельтнень тиринь келекс. Бути варштамс 2010 иень сёрмадстоманть (2021 иень ловоматне зярс апак яволявто), минек вакссо эрить испанонь, англань, арабонь, французонь ды ламо лия келень содыцят. Тиринь келень содыцятнень туртов течи – алкуксонь покш чи, – кортась историянь наукань докторось, профессорось, «Россиянь раськетнень Ассамблея» региононь отделениянь почётной председателесь Л. И. Никонова.

Истя жо паро валт ёвтасть «Чулпан» татаронь аватнень республикань общественной вейсэндявксонь ветицясь Н. Н. Азисова, Саранскоень украинецтнэнь местной национально-культурной автономиянь прявтось Н. Г. Дудко. Тердезельть лия автономиянь ветицятнеяк, ансяк ламот эзть саво шумбрачист кувалма.

Кодамо покш чи моровтомо? Сцена лангсо невтезель пародояк паро концерт. Инжетнень туртов киштсть ды морасть Н. П. Огарёв лемсэ МГУ-нь ИНК-нь «Масторава» фольклорной ансамблясь, «Инелей» киштемань коллективесь, Саранск ошонь Культурань кудонь «Морама», «SkyDance» раськень киштемань ансамблятне, В. И. Ромашкин лемсэ «Торама» ансамблясь, татаронь моро морась Руслан Карабанов, армянонь киштемасо кецявтсь Тамара Папоян, туркменэнь раськень моро морась Сердар Бахтияров.

Татьяна Маторкина
Фототне: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».