Неть читнестэ Республикань Раськень творчествань кудось (РДНТ) ютавтсь пресс-конференция, косо кортавсь Ине Отечественной войнасо Изнямонь 78 иетненень алтазь мероприятиятнень анокстамодонть. Прявт кевкстемакс кармась «МордовияZAнаших! Шаг к Победе!» патриотической республиканской фестиваленть ютавтомась, конань арсицясь МР-нь Культурань, раськень политикань ды архивень тевень министерствась вейсэ «Республиканский дом народного творчества» ГБУК-нть марто.

Вастовомасонть ульнесть «МордовияZAнаших! Шаг к Победе!» патриотической фестивалень жюринь председателесь Владимир Шарапов, «Республиканский дом народного творчества» ГБУК-нь прявтонь полавтыцясь Людмила Пикаева, РДНТ-нь клубной ды культурно-досуговой тевтнень отделэнь прявтось Мария Костерина.

Мероприятиясонть тешкстазель, фестивалень аравтлувось – минек ломантнень героической икелень шкадонть ды Ине Отечественной войнань иетнестэ, Афганистансо интернациональной долгонть, специальной военной операциянь шкатнестэ воинтнэнь подвигтест ёвтнемась. 

Фестивалесь ютавтови кавто ёнксонь коряс: вокальной ды литературной, ды кавто этапсо. Васенце этапось – кочкамонь, конась юты апрелень 15-це чистэ саезь 30-це чис (творческой номертнэнь видеозапистнень коряс). Омбоце этапось – Гала-концертэсь, конась карми маень 9-це чистэ, 11:30 чассто Саранск ошонь Советской площадьсэ.

«МордовияZAнаших! Шаг к Победе!» фестивалень участникекс тердевить кода коллективтне, истя жо ськамост морыцятне. Иетнень коряс кодаткак амеремат арасть. Номинациятнеде зярыя: вокал (сольной морамо, ансамблятнень морамо, автор-морыця), вокально-инструментальной морамо, поэзия, проза, авторонь произведения.