Четверг, октября 28, 2021
Важное

ТЫНК СВАЛ УЛЬНЕСЬ МЕЛЕНК ЯВОМС МЕЛЬ СПОРТОНТЕНЬ ДЫ ВЕТЯМС ШУМБРА ЭРЯМО? ТЕКЕ МАРТО ЭРЬВА ЧИСТЭ АРАВТТАДО НЕТЬ МЕЛЬТНЕНЬ ВЕ ЁНОВ? ТЕЧИ ЭСЬ МАТЕРИАЛСОНТЬ МИНЬ ТЫНЕНК ЁВТНЕСЫНЕК, ЭРЯМС ШУМБРАСТО АВОЛЬ ИСТЯ СТАКА, КОДА МАРЯВИ. 

КОДА ЭСЬ ЭРЯМО ЛУВОНТЕНЬ СОВАВТОМС ШУМБРА ЁНКСТНЭНЬ, МЕЙСЭ ЧИЙНЕМАТНЕНЬ ЛЕЗЭВЧИСЬ ДЫ КОДА ТОНАВТОМС ЭСЬ ПРЯНТЬ СПОРТОНТЬ ВЕЧКЕМЕ, МИНЕК ЛОВНЫЦЯТНЕНЕНЬ НЕТЬ САЛАВАЧИТНЕНЬ ПАНЖИ МР-нь СПОРТОНЬ, ОД ЛОМАНЕНЬ ПОЛИТИКАНЬ ДЫ ТУРИЗМАНЬ МИНИСТРАНЬ ПОЛАВТЫЦЯСЬ, «SARANSKRUN» ЧИЙНИЦЯТНЕНЬ КЛУБОНЬ ВЕТИЦЯСЬ, ЭРЯМОНЬ ШУМБРА ЛУВОНЬ КИРДИЦЯСЬ АНДРЕЙ СОЛОМКИН.

– Андрей Викторович, мейстэ ушодома ломанентень, конась бажи кирдемс эрямонь шумбра лувонть?

– Ламот ломантне эрямонь шумбра лувонть (ЗОЖ-нть) кемекстыть ушодомс пондельникстэ. Ансяк те пондельникесь таргави зярыя иес ды лиясто овсе а сы. Апокшке эскелькст тенень теема эрьва чистэ. Парсте чарькодеви, сеске полавтомс эсь койтнень аволь эрьвантень виень коряс. Ды тень теемс а эрявияк. Илязо карма эрямонь шумбра лувонь кирдемась тенк стакачикс, ютама тенень аламонь-аламонь.

– Мекс ломантне яла седе сеедьстэ кочкить чийнеманть?

– Монь койсэ, чийнемась меельце шкастонть теевсь трендэкс. Веенст чийнить валске ланга, лиятне варчить эсь вийтнень пелькстамотнесэ, эштётне ловить тень неень шкань модакс. Ды те а берянь. Ломантне полавтыть эсь меленть спортонтень.

– Андрей Викторович, кода чийнемань спортось совась эрямозонк?

– Весемесь ушодовсь школасо. Миша лелянь марто минь кавтаськеть. Котоце классо тонавтнемстэ карминек невтеме чийнемань коряс эсь вийтнень эсенек Дубёнкань райононь пелькстамотнесэ. Мейле тердимизь Мордовия Республикань чемпионатов, кона ютавтовсь Инсарсо. Те ульнесь тельня. Сестэ васенцеде неинь спортонь манеж. Неть пелькстамотнесэ эсь дистанциясонть карминь омбоцекс. Теде мейле чийнемантень мелесь эштёяк кассь, карминек важодеме тренер марто.

Школанть прядомадо мейле Андрей тонавтнесь М.Е. Евсевьев лемсэ МГПИ-нь филологиянь факультетсэ. Ансяк те эзизе лепамовто цёранть спортонтень вечкеманзо. Студентэкс улема иетнень перть истя жо явсь мель чийнемантень, совиль педагогической институтонь сборноентень. Эсь команданть марто 2004 иестэ ульнесть Кисловодскойсэ ютавтозь сбортнэсэ. Истя, чийнемантень мелесь яла седе кассь. Покш невтематнес вийтне аламодо а сатыльть, вечкицянь уровенесь жо, кода тешксты Андрей Соломкин, ульнесь, ули ды карми свал.

– 2016 иестэ саезь карминь явомо мель чийнемань вечкицятнень туртов старттнэнень, конат ютавтовильть Россиясо. Чийнемань вечкицятне, эсь анокстамонь уровененть лангс апак вано, чиилизь дистанциянть, конань кемекстылизь пелькстамонь арсицятне-ютавтыцятне. Тесэ аравтовильть 2, 5 эли 10 вайгельпеть, пельмарафон (21,1 вайгельпе) эли марафон (42,2 вайгельпеть). Нама, чийнеме ушодынь седе икеле, штобу эсь прянть анокстамс старттнэнень. Теке шкастонть эсь ялгатнень марто максынь ГТО-нь норматнень. 7-це ступененть самс весемесь максозь, ули сырнень значоком, конань ванстан. Карми 8-це ступень, таго кемекстаса, што трудонтень ды оборонантень анокан.

– Мезе Тынк туртов чийнеме вечкицятненень алтазь пелькстамотне?

– Васняяк, те кармавтсь свал явомс мель тренировкатненень. Васня недлязонзо чийнинь кавксть, мейле – колмо-ниле чить. Зярдо жо анокстынь марафонтнэс, чийнилинь вете-кото чить недлязонзо. Покш каштанчисан эсень коряс: шумбран, улить виень.
Эрьва ломаненть туртов чийнемась канды мезе-бути. Веенстнэнень те эсь прянть марто кортамо, те чинтень аравтлувонь кемекстамо. Лиятненень – од ломантнень марто вастовомат, эсь шумбрачинь вадрялгавтома.

Монь туртов прявт мотивациякс кармасть эсь прянть марто кортамось ды путешествиятне. Пек вечкан ардтнеме лия оштнева, таркатнева. Эдь чийнемань коряс пелькстамотне ютавтневить Россиянь эрьва кодамо ошсо. Эрсить сынь яла субутасто эли недлячистэ. Секскак неть пелькстамотнень лангс алтан кавтошка чить, штобу эсь вийтненьгак невтемс ды ошонь мазый таркатненьгак ванномс.

Истя чийнинь-чийнинь ды чарькодинь: вийть улить, эряви арсемс мезеяк од. Ды 2016 иестэ панжинек республикань чийнеме вечкицятнень сообщества – «SaranskRAN» клубонть. Тосо кортнетяно мелявтовтыця кевкстематнеде: кие зяро чийсь, кода ладяма эсь графикенть, зярдо седе паро чийнемс: валске марто эли чокшне ды седе тов. Монсь жо эрьва чистэ чийнян 40 минутадо аволь седе аламо, косо-бути вейке час.
Спортсо ули истямо ёнкс – триатлон, ансяк аволь профессионалтнэнь, а вечкицятнень туртов. Триатлонось – спортонь ёнкс, зярдо участниктне ютыть колмо этапт: укшнома, велосипедсэ ардома ды чиема. Улить триатлононь зярыя дистанцият, сехте кувакась – 226 вайгельпеть, лемдеви: ironmen. Лиякс эштё сонензэ мерить «кшнинь» дистанция.
– 226 вайгельпетнестэ 3,86 вайгельпетнень уемат, 180 вайгельпетнень – ардомат велосипедсэ, 42,2 – чиемат. Эстень кочкия те сехте кувака дистанциянть, ансяк лиятненень ёвтаса, седе паро ушодомс вишкинестэнть.

Дистанциянь ютамонтень анокстынь пельиень перть. Бути чиемась ды велосипедсэ ардомась тень вадрясто содавикст, укшноманть коряс лиссть мелявкст. Се, кода велесэ тонавтымизь укшномо тетянок-покштянок, ковгак эзь маштово. Те лезды кирдевемс веденть лангсо, ды весе. А тесэ эрявсь техника. Ковонь перть тренер марто важодемась лездась техниканть кемекстамосо. Ды ютыя дистанциянть.
Эряви меремс, Мордовиясо айронментнэде весемезэ кавто. Ды вейкесь эйстэст – мон.

Зярдо цёрась ютызе те дистанциянть, чийнемантень толось аламодо лепамсь, эрявсь мезе-бути од, ды Андрей Соломкин кочкизе туризманть. Кармась тонавтнеме те тевенть. Минек республикасо важоди «Высота» туристэнь клубось. Теке марто цёрась важодськак те ёнкссонть, конась сонензэ чистэ чис яла седе вечкевсь. Ды 2019 иестэ Андрей Викторович сыргась категорийной походов прявтонь лездыцякс.

– Те ульнесь Архызэсь, стакачинь коряс 1-це категориянь пандо прява походось. Сестэ ютынек кото перевалт ды малав 120 вайгельпеть. Те походонтень якинек эйкакштнень-спортсментнэнь марто. Весемесь лиссь ды эстень кемекстыя: те маршрутонть ютаса покштнень мартояк. Ды тедеде те мелесь топавтовсь. 21 ломань ютынек стакачинь коряс 1-це категориянь пандо прява походонть. Тесэ истят мазычить! Сехте сэрей таркась, козо минь пачколинек, – 2 вайгельпеть 800 метрат иневедтенть вере. Нама, сетнень туртов, кить истямо походсо васенцеде, те – а стувтовикс ёжомарямот ды мельть-арсемат: менелесь маласо, тештетне алот, коштось кельме. Зярдо жо лиси чись, весе ёжосот марят эрямонть.

Седе мейле ульнесь Эльбрусось. Минь пурнавинек группанек ды ютынек стакачинь коряс 3-це категориянь походонть Приэльбрусьяв. Ютынек перевалтнэнь, изнинек пандотнень, якинек эйсэ ды кевсэ вельтязь таркатнева. Валсо весемесь а пачтяви.
Те походось прядовсь Эльбрусонть пряс куземасонть. Изнинек 5640 вайгельпеть. Нама, удалась те аволь весенень. Пандонть изнинек ансяк колмонек. Эльбрусось нолды аволь весень.

«SaranskRAN» клубонть марто вейсэ ютавтозельть эштё ламо лия мероприятият, конат лездыть массовой спортонть виевгавтомасо.
Теде башка, Андрей Соломкин спортонь кевкстемантень покш мель яви эсь важодема тевтнень топавтомстояк. Кода тешкставсь икеле, сон – МР-нь Спортонь, од ломанень политикань ды туризмань министрань полавтыця. Меельце шкастонть министерствась ламо важоди эрицятнень ютксо спортонь пропаганданть коряс: ютавтовить массовой мероприятият, вастовомат. Нама, неень шкане, эпидемиологиянь тевтнень кувалма, те роботась ветяви аламодо лия лувсо, весе вешематнень кирдезь.

Республикасонть ламо тееви ГТО-нть тевс нолдамонзо коряскак. Течинь чине весе муниципалитеттнэсэ важодить тестированиянь 27 куншкакурот. ГТО-нь норматнень максыть 6 иестэ саезь ды проектэнтень эрицятнень совавтоманть коряс ПФО-со минь сисемеце таркасо. «Спорт – норма жизни» федеральной проектэнть юрсо республикань районтнэсэ панжовить ГТО-нь площадкат весе эрявикс оборудованиянть марто, конат лездыть аволь ансяк нормативтнень максомасо, истя жо эсь прянть анокстамосояк.

Кода тешкстызе Андрей Соломкин, весе неть мероприятиятне, программатне арсевить-ютавтовить эрицятнень физической спортонтень совавтомга ды эсь шумбрачинть кемекстамга.

Андрей Викторович Соломкин чачсь-кассь Дубёнка велесэ. 2005 иестэ прядызе М.Е. Евсевьев лемсэ МГПИ-нь филологиянь факультетэнть. 2009 иестэ тензэ максовсь диплом «Организация работы с молодёжью» специальностенть коряс (Н.П. Огарёв лемсэ МГУ-сь).

2001 иень аштемковсто саезь умарьковс «МеГаПолИс» студентэнь строительной отрядонть юрсо важодсь 12-це гимназиянть теемасо. 2002 иестэ важодсь «Од вий» студентэнь строительной отрядонть юрсо. Теке шкане ульнесь педагогической институтонь сводной отрядонь командирэкс. 2003 иестэ роботась педагогокс-организаторокс «Артек» эйкакшонь раськеютконь центрасонть. 2005-2010 иетнестэ методистэль, мейле отделэнь прявтоль ды 2009 иестэ МР-нь Од ломанень центрасонть прявтонь полавтыцяль. Теке жо шкастонть топавтсь МР-нь Студентэнь отрядтнэнь штабонь командирэнь тевтнень.

Мейле зярыя шкань перть важодсь коммерческой сферасо. 2014 иестэ аравтовсь МР-нь Од ломанень тевтнень коряс Государственной комитетэнь председателень васенце полавтыцякс. 2019 иестэ ладявсь МР-нь Спортонь, од ломанень политикань ды туризмань министрань полавтыцякс, косо роботы течинь чис.

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».