Вторник, марта 19, 2024
Важное

Минь уш аволь весть сёрмалинек эрзянь вишка велинетнеде, конатне масторлангстонть ёмамо лангсот эли овсе уш кадовсть эрицявтомо. Кодашка апаро седейсэнть, зярдо тиринь кудось вельтявсь пиципалакссо ды суликавтомо вальматне ваныть лангозот покордавозь. Истямо уцясказо Покш Березникень Од Пермезь (Хониновка) эрзянь велинентькак, конасонть ней уш кияк а эри, ансяк кизна те мазый, чувто потс ваязь таркась пешкели ломанень вайгельтнеде.

Сакшныть тов оймсеме икелень эрицятне ды сынст марто нуцькинест, кие кирди тосо пире, кие усксынзе роднянзо-раськензэ ванькс коштто лексеме, пангонь ды кстыень кочкамо. 2013 иестэ саезь те велесэнть кизна, Троицядо икеле покштянь-бабань ледстнема чистэнть, ютавтневить тиринь ёнксонь ломантнень вейсэнь вастовомат. Ютавтомс истямо кенярксчи весень туртов мелесь сась тосонь чачозентень Вера Васильевна Дурнайкинанень. Сонзэ мельспаросо вастызь Хониновкань икелень эрицятне – МР-нь заслуженной артистэсь, Московонь опереттань хоронь солистэсь Валерий Исляйкин, МР-нь заслуженной артисткась, «Келу» фольклоронь ансамблянь морыцясь Елена Воронина (Исляйкина) ды весе сынст родняст-раськест. Аволь умок минь вастовинек мартост ды кевкстнинек те паро койденть.

Велень эрицятнень вастовома таркакс те кенярксчинть анокстыцятне арсизь кочкамс школань садпиренть. Те тарканть марто весень сюлмавозь паро арсемат-ледстнемат. Кода совавтынзе школав кедьпеде васенце тонавтыцяст Клавдия Петровна Дурнайкина, кода тесэ меельцеде гайгезевсь баягинесь ды ильтинзе покш килангов. Ансяк 90-це иетнестэ эйкакшонь арасьчинть кувалма школась пекстазель ды калавтозель. Чаво тарканть арсезель ванськавтомс, килейтне ды умаринатне керсезельть, лазсто-мейстэ стявтозель апокш сцена. Вастовома тарканть куншкас кадсть сэрей килей, конань тарадс ней весе сыцятне поволить эрьва кодамо тюсонь парсейнеть. Те паро тевенть теизь тосонь цёратне, конатне кирдсть Хониновкасо мекшень кудынеть.

Истя уш лиссь, Троицянь субутасто ламот сакшныть велень калмазырев ды вастовома чикс ладязельгак те чинь обедтэ мейлень шкась. Кавксо иень перть те покш вастовомадонть марясть ламот ды пуромозтнеде байтякольть.

«Васняяк кирвазтяно покш штатол ды ледстнетяно минек велень кулозтнень, роднянок-раськенек, тетянок-аванок, малавиксэнек лемтнень, – ёвтни Елена Лаврентьевна Воронина. – Те коенть коряс минь вештяно кедьстэст кенярксчинь ютавтоманть каршо амолема. Мейле ушодовить стихотворениянь ловномат, моронь морамот, киштемат, ледстнемат икелень эрямодонть… Покш мельспаросо васттано од ды васолдо сыцятнень: Камчаткасто, Красноярскойстэ, Коми Республикасто, Челябасто, Московсто... Седеяк кеняркс, зярдо сынст марто сыть эйкакшост ды нуцькаст, эдь сынь оймезэст совавтыть койтнень-кирдатнень ды кедьсэст сынст поладомась. Троицянь койтнень коряс минь кодатано цецясто, лия касовкссто каштазт, чокшне ёнов покш кедьгесэ пидетяно штюрьба эли сывелень ям. Весе пуромозтне сынсь ускить ярсамопельть, ледить тикшенть, кандыть стольть-стулт, пенчть-вакант, эрьванть те кенярксчисэнть эсензэ таликазо».

 



Свал капши вастовомантень Московсто Валерий Лаврентьевич Исляйкин, конанть лангсо музыкальной пельксэсь ды конань мазый, виев вайгелезэ те чистэнть куватьс гайги тиринь веленть велькска. «Монь туртов тиринь велесь, те вастовомась, кода кортыть, – виень пурнамо тарка, – ёвтни Исляйкин. – Минек арсеманок – совавтомс тиринь велентень, кадык аламошкас, эрямонь гайть. Кизна пурнавомась максы пек ламо: ули кинень ваномс велиненть мельга, ванськавтомс тантей ведь марто кельме лисьмапрятнень, чаво кудынетне таго одкстомить, качады прякань-ямонь тансть, гайгезевить пертьпельксканть моротне, конатне свал ульнесть Од Пермезень каштанчикс».

Вастовоманть ушодыцятне-анокстыцятне сюкпрянь валт ёвтыть лездыцятнень туртов: В.В. Дурнайкинанень, В.И. Денискиннэнь, Ромашкинтнэнь, Тумайкинтнэнь семиятненень, конатне пек вечксызь тиринь велест, свал анокт путомс оймест, ютавтомс шкаст, ярмакост сонзэ вельмевтемантень.

Од Пермезень эрицятне кемить – весемесь ашти эсест эйстэ, ды, паряк, шкань ютазь те велинень кудынетнень вальматнесэ толнэтне кармить паломо аволь ансяк кизна – иень перть.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».