Вторник, марта 19, 2024
Важное

Неть читнестэ МР-ва Россиянь Пенсиянь фондонь отделениясь ютавтсь пресс-тур. Отделениянь управляющеесь Владимир Василькин вейсэ республикань журналисттнэнь марто содавтызе Ельникень райононть. Пресс-туронь васенце пунктокс кармась Ельникень «Лицей» МОУ-сь. Тесэ Пенсиянь фондонь управляющеесь вастовсь тонавтницятнень ды тонавтыцятнень марто. Од ломантнень туртов ютавтозель пенсионной грамотностень урок.

– Течинь чине Мордовиясо лововить 258 тыщат пенсионерт. Сынст эйстэ седе покш пельксэнтень максовить страховой пенсият. Истямо пенсиясь явови колмо пельксэс: сыречинь коряс (максови сеть ломантненень, кить пачкодсть пенсиянь иетнес, эли жо сетненень, кить пенсияс лиссть шкадо икеле); инвалидностень коряс (истямо пенсиясь максови лавшо шумбрачи марто ломантненень); трицянь-кастыцянь ёмавтомань коряс (сонзэ получить кулозь ломаненть семиясо аважодицятне).

Теке марто течинь чине страховой пенсиясь пандови ансяк сестэ, зярдо топавтовить колмо эрявикс ёнкстнэ. Васняяк ломанентень пачкодема пенсиянь иетнес. Неень шкане аватненень эрявить 55 иеть ды 6 ковт, цёратненень – 60 иеть ды 6 ковт. Тынь уш содатадо, 2019 иень якшамковонь 1-це чистэ пенсиянь системасонть теевсть полавтомат ды пенсияс лисема иетне полавтовсть. Страховой пенсиянь ладямонь эштё вейке ёнксось – страховой стажонь улемась. Тедеде страховамонь сехте аламо стажось – кемень иеть. Эрьва ие те цифрась покшолгавтови вейке иес, зярс сон а карми 15 иеть (2024 иенть самс). Истя жо пенсияс лисемга эряви таштамс зярыя пенсионной баллт. Те иестэнть истятнэде улест 16,2.

А эряви стувтнемс, страховой пенсиясь пандови ансяк весе неть ёнкстнэнь топавтозь. Секскак свал ванома эсь таштазь баллтнэнь мельга, конатне максовить ансяк «ашо» зарплатанть кис, лиякс меремс, бути важодицянть кисэ Пенсиянь фондс теевить страховой пандоматне. Арасть пандомат – баллткак арасть.

Бути жо пенсиянь иетнес эрявикс баллтнэ а пурнавить, ломанентень пенсиясь а пандови семс, зярс сон сынст а пурнасынзе. Эли жо вете иень ютазь пенсияс лисема иетнень топодемадонть мейле максови социальной пенсиясь, – ёвтнесь Владимир Василькин.

Истя жо вастовоманть лувсо тонавтницятненень ёвтневсь ЕГИССО-нть (социальной обеспечениянь вейкине государственной информационной система) важодемадо. Те системась ушодсь важодеме 2018 иень якшамковсто ды сонзэ вельде неяви, кодамо социальной лезкс максови ломанентень. Истя жо ёвтневсь электронной сервистнэде. Течинь чине Интернет вельде максовить Пенсиянь фондонь 25 услугатне.
Седе тов пресс-туронь члентнэ ульнесть инжекс Макейкинтнэнь семиянть кедьсэ. Семиясь неть читнестэ совась од кудос, конань теемасо пек лездасть авань капиталонь ярмактне ды велесэ эриця од семиятненень явовиця субсидиятне. Олеся Александровна ды Владимир Васильевич Макейкинтнэ трить-кастыть кавто тейтерькат: Аринань ды Ульянань. Арина те иестэ мольсь васенце классос, Ульянанень жо ансяк ниле иеть. Сон аламодо лездаськак топавтомс тетянзо-аванзо меленть: стявтомс покш ды мазый кудо. Ульянань чачомадо мейле семиянтень максовсь авань капиталонть лангс сертификат. Сонзэ вельде пандозель кредитэсь, кона саезель кудонть строямс.

Седе тов пресс-туронть юрсо ульнесь вастовома Стародевичье велень эрицятнень марто. Велесь, эряви меремс, аволь вишкинетнестэ. Тесэ ули средней школа, почта, медпункт, Культурань кудо, ули велень хозяйствань предприятия («Имени Ильича» ООО-сь), конась ашти велень эрицятнень туртов важодема таркань максыцякс.
Эрицятнень марто вастовомасонть Пенсиянь фондонь прявтось Владимир Василькин кортась пенсиянь од законодательствадонть. Ламо кортавсь велень хозяйствасо ламо иетнень перть важодеманть кисэ пандоматнеде.

– Кода тынь уш содатадо, од законсонть башка льгота арсевсь сетнень туртов, кить пенсияс арсесть лисемс 2019 ды 2020 иетнестэ. Сынст туртов шкась кувалгавтови ансяк пельиес, – тешкстызе Владимир Василькин. – Пенсияс мереви лисемс пенсиянь иетнень топодемадонть икелеяк, бути ломаненть ули важодемань покш стажозо. Истя, бути аванть важодемань стажозо 37 иеть, цёранть – 42, пенсияс сынь лисить 60 ды 65 иетнень топодеманть апак учо.

Истя жо шкадо икеле пенсияс лисемась ванстови сетнень туртов, кинь ули льготной стажост (25-30 иеть). Тезэ совить тонавтыцятне ды медицинасо важодицятне. Ансяк вана шкась шаштови 5 иес (аволь сеске) стажонть пурнамодо мейле. Мертяно, бути тонавтыцясь велень школас важодеме сась 20 иесэ, роботась 25 иень перть ды 2021 иентень пурнась льготной стаж (сыречинь коряс пенсиянь иетнес жо эзь пачкоде), пенсияс сон лиси 2022 иестэ.

Вастовоманть лувсо кортавсть пенсиятнень коряс лия кевкстематнеяк, конат талновтыть ломантнень. Ульнесть ламо кевкстематкак. Эрьванть лангс максозель домка ды чарькодевикс каршо вал.

Пресс-туронть лувсо Владимир Василькин истя жо вастовсь райононь эрицятнень марто, конат сонензэ пшкадсть башка кевкстема марто. Ды ульнесь инжекс Ине Отечественной войнань участницанть Елена Петровна Вязовань кедьсэ. (Сонзэ ланга ловнодо газетань сы номертнэсэ).

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».