Вторник, марта 19, 2024
Важное

Ютазь пингень 70-80-це иетнестэ, зярдо государствась башка мель кармась явомо эсь эрицятнень вадря ды лезэв ярсамопельсэ топавтомантень весе иенть перть, теке марто эмежсэяк, ламот республикатнесэ ды областтнесэ, покш оштнень маласо ушодсть тееме телень теплицат. 

Истя, 1980 иень сёксня Саранскоенть маласо панжозель эмежень кастомань теплицань васенце цехесь. Шкась мольсь, предприятиясь виевгадсь, ламолгадсть цехтне ды, од технологиятнень тевс нолдазь, кассть производствань покшолматне. Течи, ниленьгемень иетнень ютазь, «Тепличное» АО-сь – те неень шкань агропромышленной виев ды кеме предприятия, косо важодить эсь тевень содыця ды ёроков специалистт, конатненень виень коряс топавтомс куш кодамо производственной тев.

«Вадря коллективенть невтевкстнэяк вадрят»

Людмила Николаевна Крыскина «Тепличное» АО-со важоди уш 38 ламо иеть. Весе те шканть перть сон топавты тепличницань тевенть.
– Мон монсь Нижегородской областень Починка ёнксонь Василевка велестэ, – ёвтни Людмила Николаевна. – Школанть прядомадо мейле заочна тонавтнинь Горькоень велень хозяйствань институтсо (ней академия) «бухгалтер-экономист» специальностенть коряс. Тонавтнема шкастонть лисинь мирденень ды сынь эрямо Саранскоев. Истя понгиньгак Мордовияв.

Сеть шкатнестэ, кода тешксты Людмила Крыскина, рамамс эрямо тарка а шождаль, кадык ярмакоткак ульнесть. Тепличнойсэ жо эсь важодицятнеде мелявтыльть ды максыльть квартират.
– Мон маринь теде ды арсезевинь, мекс бу а варчамс, – корты Людмила Николаевна. – Кандынь документэнь ды карминь роботамо тепличницакс. Сестэ теплицатне аштесть ТЭЦ-сэ, теезельть плёнкасто. Ды, нама, важодемаськак ветявсь лия лувсо. Зярдо теизь неть теплицатнень, сынь тей. Важодеманть поладыя теке коллективсэнть. Аламонь-аламонь весементень тонадовсь ды натой вечкевсь тень.
Людмила Крыскина кармась роботамо 1-це цехсэнть. Кода икелеяк, истя течияк, тесэ кастыть помидорт ды куярт. Ансяк важодема лувось лиякстомсь ды седе шождалгадсь.

– Меельце шкастонть предприятиясонть весемесь пек полавтовсь: технологиятнеяк, важодемань условиятнеяк. Ды неть полавтоматне – ансяк вадря ёнов. Ёвтавлинь коллективенть лангаяк. Сон тесэ пек вадря. Важодтяно весе ояксчисэ, вейке-вейкенень лездазь. Миненек свалшкане сыть од важодицят ды сынст мартояк кодаткак стакачить а лиснить. Минь тенст весть-кавксть весементь невтьсынек-толковасынек ды уш зярыя чинь ютазь роботыть, мерят, ламо иеть уш тесэть. Паряк, те ояксчись ды вейке-вейкень чарькодемась лездыяк минек предприятиянтень свал улемс васенцетнень ютксо. Эдь вадря коллективенть невтевксэнзэяк вадрят, – кемекстызе Людмила Крыскина.

Ламо иень перть вадря важодеманть кисэ Л.Н. Крыскина аволь весть казевсь дипломсо ды шнамонь конёвсо, кода предприятиянть, истя Велень хозяйствань министерстванть пельде. Аволь умок Людмила Николаевнанень максозь «Мордовия Республикань велень хозяйствань заслуженной роботник» лемесь.

«Тесэ важодемась – покш уцяска»


Галина Петровна Волкова эмежень кастома теплицатнес важодеме сась 24 иеде икеле. Авась чачсь-кассь Отяжелень райононь Алова велесэ. Тесэнь школанть прядомадо мейле тонавтнесь Инсаронь аграрной техникумсо, косо получизе мекш марто важодицянь профессиянть. Зярыя шкань перть озясь те тевсэнть, ансяк чарькодсь – те аволь авань тевесь.


– Ульнесь 96-це иесь. Важодема таркат арасть, зарплатат малав косояк а пандыльть. Ялган пельде карминь содамо эмежень кастома теплицатнеде ды молинь тов роботань коряс кевкстеме. Сеске эзь кемевеяк тень, саимизь. Теплицасо важодемань стакачитнеде овсе эзинь тандадо. Велень ломаненть туртов истямо тевесь стакакс а маряви.

Теплицатне эштё ульнесть ТЭЦ-сэ. Нейгак превсэнь, важодеме лисинь эйзюрковонь 20-це чистэ, теинек капстань росадань пикировканть. Мейле, уш чадыковонь 27-це чистэ, ливтимизь паксяв, кочкинек зыянов тикшенть, – ёвтни Галина Волкова.
Зярыя шкань ютазь од теплицатнень 1-це цехсэнть олякстомсь тарка ды Галина Петровнань саизь тов, кармась роботамо помидоронь ды куяронь кастома теплицасонть, косо покш мельсэ эсь тевенть топавты течинь чис. Тесэ сынь озавтыть эмежтнень, якить мельгаст, кастыть ды пурныть кенерезь помидортнэнь ды куяртнэнь.


– Сюкпря минек прявтонтень Александр Михайлович Живаевнень, – тешксты Г.П. Волкова. – Сон содасы эрьва важодицянть, соды, кие козо чачсь-кассь, кие кода роботы. Сон пек чарькодиця, видечинь вечкиця. Ды тесэ весе истят: цехень прявттнэяк, технологтнеяк, звеньевойтнеяк. Эрямосонть эдь эрьва кодат тевть лиснить, лиясто савкшны ковгак туемс. Ды ансяк пшкадят, толковасак весементь, кияк каршо вал а ёвты, нолдатадызь. А эдь истямо ломань марто важодемась – покш уцяска.
Галина Волкова ёвты сюкпря Пазонтень, понгсь тей роботамо. Сон тешксты, весемесь, мезе сонзэ ули, добовизе теплицасо эмежень кастыцякс важодезь.

Юлия Еремина
Фототне Э.Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».