Наталья Савенкова вана уш ламо иень перть яви мель кодамонтень. Те тевенть сон кочкизе а стяко, семиясост авазояк, сырькаезэяк юткошкасто свал кодыльть.

Пенсияв лисезь, Наталья Савенковань кармась седеяк ламо юткошказо, конань пештямга авась кармась кодамо налкшкеть. Бути кой-кона кедьчелькевтне тейнить сынст Интернетстэ муевкстнэнь лангс ванозь, сон жо арси эйсэст ёжомарямонть мереманзо коряс. Невтемакс, «Черепашка по имени Наташка» авторонь налкшкесь пек тусь рамсицятнень мельс ды кармась кедьчелькевенть лиятнень ёнов а молиця тешксэкс. А эштё сонзэ мереви нолдамс тевс кода «антистресс» эли салмуксонь кирдемка.

Шкась мольсь, теевкстнэ ламолгадсть, ансяк вана рамсицятне эзть ламолгадо. Натальянь икелев стясь кевкстема: кода сынст миемс, кода седе тов улемс? Эдь вечкевикс тевенть кадомс мелезэ овсе арасель. Ды сон пшкадсь «Мой бизнес» центрав, конась важоди «Малое и среднее предпринимательство» национальной проектэнть лувсо. Тесэ эсь тевень ветицянтень макссть консультация ды ёвтнесть, кодамо лезкс явови сонзэ кондят ломантненень. Теде мейле Савенкова кочкизе микшнемань электронной площадканть. Теде башка, сон кармась яксеме «Мой бизнес» центрань мероприятиятнес – эсь тевень ветицятнень ярмункатнес, форумтнес.

«Васенце эскелькстнэнь теемстэ пек эряви ве ёндонь лезксэсь, эдь свал улить пелемат, секс мон покш мельспаросан, што минек республикасо ули истямо инфраструктура, конась лезды бизнесэнь ветицятненень», – тешкстась Наталья.

Истя вана кодамонь тевентень мелень явомась кассь бизнесэкс, конась кармась кандомо ярмакт. Наталья Савенковань тейтерезэяк, Ксения, ушодсь мартонзо вейсэ кодамо ды микшнеме налкшкетнень. Сонзэяк сёрмадызь эсь тевень ветицякс. Ней аванзо марто вейсэ виевгавтыть вечкевикс тевест.