Вторник, марта 19, 2024
Важное

Аволь умок миненек сась пек паро куля – эрзянь сёрмадыцясь Людмила Рябова нолдась «Липалей» («Божья коровка») од пусмо, конась алтави вишка ловныцятненень – эйкакштненень.

Книгасонть пурназь эрзянь кельсэ 38 валморынеть ялгаксчиде, пертьпелькстэнть ды минек малавикс оятнеде – ракшинетнеде-унжинетнеде, ули апокшке валкс. Эряви меремс, валморонь пусмось лиссь пек вадря ды мазый, эрьва стихесь максови мельстуиця артовкс марто. Сон алкукс теезь вишка ловныцятнень туртов.

Ёвтасынек, валморонь сёрмадомо Людмила Рябова ушодсь школасо тонавтнемстэ. Ветеце классо тонавтыцязо мерсь терявтомс сёрмадомс стих. Сестэ Люданень лездась тетязо. Васень валморонзо ульнесть пертьпелькстэнть, ялгадо. Шкань ютазь тейтересь кармась сёрмадомо вечкемадо, эрямодо.

Людмила тонавтнесь Н.П. Огарёв лемсэ МГУ-нь филологиянь факультетсэ, финнэнь-угрань отделениясо. Ды ней, «Сятко» журналсо важодемстэ (сон – прявт редакторонь полавтыця), те максы тензэ покш лезэ.


Аволь свал эрси истя, зярдо важодемась тукшны мельс, канды кеняркс. Людань эрямосо жо весе лиссь истя, кода эряви. Ули вечкевикс тевезэ, конась касты аволь ансяк мельёжонть, сон максы вийть шкинемантень. Те весемесь тензэ лездась нолдамс валморонь зярыя пусмот, ютксост – «Сиянь байгинеть», «Ливтясь нармунь…», «Кие тон?», истя жо сонзэ стихензэ лиссть «Монь вайгелем» ды «Эскелькс» вейсэнь пусмотнесэ. Теке марто Людмила Рябовань ульнесь покш мелезэ нолдамс книга эйкакштнень туртов. Валморотне пурнавсть уш умок, ансяк неень шкане книгань нолдамось – тевесь аволь шожда (ярмаконь коряс), лездыцявтомо кодаяк. Ды вана ней те бажамось топавтовсь.

– Окойники, топавтовсь умонь мелем – лиссь «Липалей» валморонь пусмом, кона алтазь эйкакштненень. Сон аволь покш, ансяк монь туртов пек питней, – тешксты Людмила Рябова. – Ёвтан сюкпря весенень, кить лездасть тень те тевсэнть: Российской Федерациянь Культурань министерствантень ды Россиянь Литераторонь союзонтень, конат явсть ярмакт. Истя жо покш сюкпря артыцянтень – Елена Лошакованень, редакторонтень – Мария Левщанованень, вёрсткань теицянтень – Елена Барцаеванень. Сюконян малавиксэнь туртов, конатнень марто эрямсто оймесэнь чачсть неть валморотне.
Мекс пусмонть лемезэ «Липалей»? Содылиде, што те унжинентень истя мерить? Мон арсян, аламот кить содасть. Кода тешкстызе авторось, валось тензэ маряви мазыекс ды гайгицякс.


– Мон кувать арсинь, кодамо лем максомс пусмонтень, – ёвтни Людмила. – Ды мелезэнь сась пусмосонть улиця валморонь лемесь – «Липалей». Мон содан, малав эрьва эрзянь велесэ те унжиненть (рузкс – божья коровка) эсензэ лемезэ. Кода ансяк а мерить – «доро баба», «пазонь скалнэ»... Минек Дубёнкань Поводелесэ мерить «липалей». Валкссояк те лементь вастния. Васня кавтолдынь, валось асодавикс. А бути лия ёндо ваномс, содамонзо кармить. Ды валоськак тень маряви эйкакшонь, чевте, мазыйстэ гайгиця.

Липалей
Кува ливтнить,
липалей?
Кодат паксят неить,
лейть?
Озак аламос сурпрязон.
Вай, кодамо тон эрязат!
Таго капшат та-ков
верев –
Тов, косо чипаесь эри.
(«Липалей» пусмостонть)

«Липалей» эйкакштненень валморонь пусмось весемезэ нолдазь 300 экземплярсо. Авторось ламотнень уш казинзе эсь ялгатненень, содавикс ды малавикс ломантненень. Зярыя экземплярт арси максомс «Масторава» книгань лавкантень. Секскак, бути ули меленк ловномс эсь эйкакштненень тиринь эрзянь кельсэ гайгиця валморот ды неемс пусмонть мазычинзэ, кевкстнеде книганть «Масторавасто».
Минь жо кемтяно, эйкакштнень туртов истямо пусмось карми аволь меельце ды эрзятнень эйкакшост кармить ловномо ды кортамо тиринь кельсэст.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».