Неть оймсема читнестэ республикань зярыя районтнэ тешкстызь 95 иень чачома чист. Неть – Кочкуровань, Чаунзань, Ромодановань, Ташто Шайговань, Теньгушевань ды Ельникень районтнэ. Покш Игнатовань буентень топодсть 93 иеть. Кода свал, кенярксчитнес пурнавкшныть масторонь эрьва кодамо ёнкска эриця земляктне.
Кода эсь социальной сеттнень лопатнесэ сёрмадсь Мордовия Республикань Прявтось Артём Здунов, кадык истя карми свал!
«Эсь явовиксчинзэ улить эрьва райононть. Кочкуровасо касы-виевгады туризмась: тесэ юты «Зов Торамы» раськень маршрутось, содавикст «Этно-кудо» музеесь ды Сафари-паркось. Тавлань чувтонь лишминесь кармась минек брендэкс.
Ташто Шайговань райононть весе Россиянть келес содасызь Раськень культурань куншкакуронть кувалма, косо кеместэ ванстыть раськень койтнень-кирдатнень. Теньгушевань кедьчелькев аватне кодыть весенень содавикс варьгатнень-семицветкатнень. Шокшасо сеянь ловсосто теить тантей сыр.
Чаунзань районось невтизе эсь прянзо кода региононь индустриально-аграрной куншкакуро. Ромодановасо важоди Равчиресэ сехте покш сахаронь теема заводось. Паксятнесэ жо кастови весенень содавикс ды вечкевикс пиже кснавось. Ельникень районсо теить клинкерной кирьпець. Сонзэ нолдыть тевс исторической зданиятнень витнемстэ-вадрялгавтомсто.
Прявт сюпавчись жо – ломантне, конатнень коряс минь аштетяно каштанчисэ. Весенень вадря эрямо ды уцяска!» – сёрмадсь Артём Алексеевич.
Июлень 14-це чистэ 95 иетнень топодеманть тешкстынзе Кочкуровань районось. Юбилеентень казнекс кармась Вирь ало Тавласо велень клубонть допрок витнеманзо прядомась. Тень лангс ютавтозь 4,8 миллионт целковойть. Роботатне ветявсть «Культура» национальной проектэнть лувсо. Юбилеень прявт мероприятиятне ульнесть райононь Культурань центрасонть.
Пурнавозтненень поздоровт ёвтась региононь Правительствань Председателесь Дмитрий Поздняков ды пшкадсь эрицятненень Мордовиянь Прявтонть Артём Здуновонь пельде. «Кочкуровань районось эрязасто топавты национальной проекттнэнь, конатнень яволявтынзе Россиянь Президентэсь Владимир Путин, республикань программатнень. Виевгады агропромышленной секторось, строявить од эрямо таркат ды кить, одкстомтовить культурань ды спортонь учреждениятне, вадрялгавтовить общественной таркатне. Покш мель муниципалитетсэнть явови раськень культурань ванстомантень», – тешкстась Дмитрий Поздняков.
Премьер-министрась мерсь, муниципалитетэнь прявт сюпавчись – сонзэ эрицятне: Ине Отечественной войнань Геройтне, неень шкань Геройтне – специальной военной операциянь участниктне, велень хозяйствань, промышленностень важодицятне, районсо чачозетне, кить тейсть редявикс путовкс экономикань эрьва кодат ёнкстнэсэ республикань виевгавтомантень.
Государственной Собраниянь депутатось, «Норов» агрохолдингень прявтось Александр Поздняков тешкстась: «Мон аштян каштанчисэ эсь райононть кувалма: минек пек ламо вадря, важодеме вечкиця эрицянок. Ламо тееви экономикань весе ёнкстнэнь виевгавтоманть туртов. Нама, минь кирдтяно каштанчи ды учотано изнямо марто райононь эрицятнень, конат примить участия специальной военной операциясонть».
Кенярксчинтень пурнавозтненень поздоровт ёвтась муниципалитетэнь прявтось Светлана Герасимова. Сон тешкстась, Кочкуровань райононть пек виев агропромышленной ёнксось. Мелят муниципалитетэсь нолдась валовой продукция 2,7 миллиард целковойтнень питнесэ, пурназь 60 тёжат тоннат сюро, нолдазь 18,8 тёжат тоннат ловсо, 7,7 тёжат тоннат сывель. Аграрной производствасонть васенцеть – «Норов» агрофирмась, «Тавла», «Родной край» предприятиятне, Александра Парваткинань крестьянско-фермерской хозяйствась ды лиятне. Мелят строязь 14,7 тёжат кавонзазь метрат эрямо таркат – те 120 ламо кудот. Вейке эрицянть лангс строязь эрямо таркань покшолматнень коряс Кочкуровань районось саи васенце тарка Мордовиясо.
Те чистэнть «За любовь и верность» медальтне явшезь Алексей ды Анна Лабушкинтнэнь, Николай ды Нина Малышевтнень семиятненень, сынь эрить вейсэ 25 иетнеде седе ламо, истя жо тешкстазь ламо эйкакшонь триця-кастыця семиятне.
Ледстнемань казнесэ тешкстазь Кочкуровань райононь сехте од эрицясь – вейке иесэ Артём Тимошкин, «За особые успехи в учении» медальсэ казезь Кочкуровань средней общеобразовательной школань прядыцятне Кристина Бурнайкина ды Никита Петякшев.
Райононь депутаттнэнь советэнь решениянть коряс «Почетный гражданин Кочкуровского района» лемесь максозь Николай Сульдяйкиннэнь, сон Кочкуровань райононь ледстнемань книгань ды «Бессмертная рота из Красной Зорьки» нолдавксонь автор-пурныця ды редактор.
Покш казнеть истя жо максозь специальной военной операциясо маштовозтнень тетяст-аваст туртов.
Июлень 15-це чистэ покш кенярксчить ульнесть Чаунзань ды Покш Игнатовань районтнэсэ. Чаунзань райононтень, кода ламот лиятнененьгак, топодсть 95 иеть. Райононь прявт площадьсэнть ютавтовсть мельстуиця мероприятият. Эрицятненень ды инжетненень лембе поздоровт ёвтасть РФ-нь Федерациянь Советэнь сенаторось Пётр Тултаев, МР-нь Правительствань Председателень полавтыцясь Инсаф Хайруллин, Чаунзань муниципальной райононь прявтось Руслан Батеряков ды лиятне.
Теке жо чистэнть 93 иетнень топодеманть тешкстызе Покш Игнатовань районось. Истя жо тесэ ютавтовсь «Велень озкс» раськень покш чись. Кезэрень шкатнестэ озкстнэсэ ломантне пшкадильть Инешкипазонтень ды покштяст-бабаст туртов. Сокицятне-видицятне учильть ламо сюронь чачома (озность-вешсть сэтьме пиземеть), эрзятне энялдсть апаро вийде ванстома, шумбрачи, уцяскав эрямо. Те паро коесь ванстови неень шкастояк. Пурнавозтне аволь ансяк озность, истя жо морсесть, киштсть, налксесть. Теке марто покш казнесэ тешкстазельть райононь эрицятне. Веенст – вадря важодеманть кисэ, лиятне – раськень койтнень-кирдатнень ванстоманть кисэ. Казнетнень явшизь МР-нь Культурань, раськень политикань ды архивень тевень министрась Светлана Баулина, Эрзянь-мокшонь раськень регионъютконь общественной вейсэндявксонь председателесь Юрий Мишанин, Покш Игнатовань муниципальной райононь прявтось Татьяна Полозова, Орданьбуень ды Отяжелень епископось Вениамин ды лиятне.
Эрицятнень ды инжетнень туртов анокстазель сюпав культурной программа. Эрзянь морот, койтнень-кирдатнень невтемат, вейсэнь ояксчинь хоровод. Буень эрьва велесь жо инжетнень каванясь раськень ярсамо- ды симемапельтнеде. Мезе тесэ ансяк арасель. Эдь эрьва велесэ седикеле пидильть-панильть мезеяк истямо, мезесь сынст явиль лиятнень эйстэ. Арсеви, позась ули весень, ансяк вана теезь сон эрьва велесэнть эсь лувсо, секс танстеськак явови.
А кодамо мазычи невтсть райононь кедьчелькев ломантне! Тесэ – тейтерь-аватнень туртов мазылгавтомапельть, кудоютконь кедьёнкст, чакшт-вакант, эйкакштненень налкшкеть. Кочкак, мезе мелеть. Истямо костояк лиясто а муят. Эдь тесэ эрьва теевксэнть улить явовтыця ёнксонзо, сонзэ эйс путозь мастерэнть оймезэ ды седейлембезэ.
Кода истямо кенярксчистэ туят эсь салава бажамотнеде апак арсе. Секскак эрьва инжесь меельцекс мелень-бажамонь чувтонть тарадтнэс содызе эсь парсейнензэ ды тошкизе салавань мелензэ.
Июлень 16-це чистэ 95 иетнень тешкстынзе Ромодановань районось. Кенярксчинь мероприятиятне ютасть В. П. Филатов лемсэ Культурань ды оймсемань парконь прявт площадьсэнть.
Райононть, прявттнэнь ды эрицятнень лемс ёвтазельть ламо лембе валт. Явшезельть покш казнетькак. Мордовиянь филармониянь артисттнэ ды Московонь «Садко» группась весень кенярдовтызь мельстуиця концертсэ.
Анокстызе Юлия Еремина