Вторник, марта 19, 2024
Важное
Аштемковонь 27-це чистэ Татарстанонь Эрзянь Кармалка велесэ ютась «Балтай» эрзянь культурань республикань кенярксчись. Мекс сонзэ лемдизь «Балтаекс» ды кода чачсь те покшчись, ловнодо минек сермадовкссонть.

«Балтай» – эрзянь раськень кезэрень кенярксчитнестэ вейкесь. Улить кенярксчить, конат теке лисьмапрясто кельме ванькс ведте симдить весе пурнавозтнень. Самай истямо «Балтай» эрзянь культурань кенярксчись – раськень коень, вечкемань, эрьгелемань кенярксчись. Сон – вальма эрзянь раськень масторонтень.

Балтаенть чачома тарказо

Татарстансо Балтаенть тиринь ёнксокс ловови Лениногорской райононь Эрзянь Кармалка велесь, кона ашти Уралонь пандтнэнь ало виев лисьмапрянть вакссо. Те коень-кирдань кужонтень кезэрень шкасто саезь пурнавильть эрзятне. Сынь парсте содыть: эсь раськень ойменть ванстомга эряви ванстомс эсь койтнень-кирдатнень. Кенярксчинтень уш 100 иеде ламо. Те чистэнть эрзятне ледстнить эсь покштяст-бабаст, конат васенцекс састь те моданть лангс, вирень азораванть Вирьаванть ди вирень азоронть Овтонть.
Раськестэ раськес евтневи кенярксчинть теевемадо легендась. Седе, кода зярыя сядот иеде икеле састь тей эрямо эрзятне. Тесэ ульнесть идем, а ютавиця вирть, лей, модасто чавсь ванькcстэяк ванькс лисьмапря.
Ушодсть кезэрень чувттнэнь керямо, моданть ванськавтомо эмеж пире алов, кармасть кудонь путомо. Ды весе улевель бу паро, бути аволь овттнэ. Ацирьгавтызь эрзятне вирень кезэрень азортнэнь. Ды ушодовсь алкуксонь война вирень инязоронть каршо. Овтотне сезнесть ракшатнень, каявкшность ломань лангс. Эйстэст ульнесть пек ламо. Ялатеке ломанесь изнизе идем ракшанть. Самай те изнямонть тешкстамга теевськак «Балтай» кезэрень кенярксчись. Сон лиссь пек валдо ды эряза.

Кода тешкстыть

Валске марто велесэнть ютавтовить эрьва кодат койть. Тевесь ушодови вирень кужосо. Велень эрицятнестэ жребиень коряс кочкить колмо од церат – овтонь семия – «овто», «ава овто» ды «овто левкс», конатнень перька тапардыть укштор лопат зняро, мик чамасткак а неявить, ансяк кадыть сельмтнень туртов варинеть. Теке шкастонть морыть эрзянь кезэрень морот, косо ёвтневи сокицятнень-видицятнень стака важодемадост, од тейтертнень сыре ды сюпав а вечкевикс цера экшс максомань койтнеде. Овтотнень «оршавтыть» укштор лопасо весе, кинь ули мелезэ.
«Овтотнень» оршамодо мейле, раськень инструментсэ седямонь гайттнень мельга весе «вирень семиясь» лиси покш кужонтень, весе стить «овтотнень» перька хороводс. Истя ёвтыть сюкпря вирень сюпавчинть кис. Тесэ жо ушодовить эряза налксемат, сехте содавиксэсь конатнестэ сюлмазь сельмсэ кикерькань пурнамось.
Коень хороводтонть мейле «овтотне» «Балтай» кенярксчинтень пурнавозтнень марто эрзянь кезэрень моротнень мельга велявтыть велев ды ютыть весе куротнева. «Овтотне» арсить парочи эрьва кудонтень. Весе коесь поладови фольклоронь моросо ди киштемасо, ютамось прядови веленть куншкакуросо, лисьма вакссо, тосо ютавтови вирень ракшань кайсевтемань коесь.
А ёвтавикс кеняркс ды уцяска эйкакштнень туртов, бути овтонь оршамопельстэнть удалы саемс укшторонь тарадке. Те тарадкесь самай улияк ломаненть идем ракшанть лангсо изнямонь тешксэкс. Весе пурнавозетне кенярксчистэнть бажить таргамс «шубастонть» укштор тарадке ды ахолямс вейке-вейкень. Ды ков седе пек берякадыть «овтотне», тов седе пек кенярдыть ломантне. Кортамотнень коряс, ков седе ламоксть ахолдат тарадсонть, тов седе ламо паро саты эрьвантень. Бути жо тарадонть начтомс лисьма ведьсэ, сестэ – седеяк ламо. Теке жо шкастонть од ломантне ды эйкакштне валныть вейкест-вейкест ведьсэ, вешить Пазонть кедьстэ пиземе. Бути кармить пиземеть – карми паро урожай.
«Балтай» кенярксчинтень сакшныть ломанть весе эрзянь велетнестэ. Тесэ эрсить вастовомат, содавиксэкс теевемат. Ломантне вейсэ ютыть велеванть «овтонь киванть», молить эрьва кудонть ваксс, морыть, кудонь азортнэ ливтить каванямопельть. Мейле весе вейсэ озыть кенярксчинь столенть экшс, кона сравтови веленть куншкакуросо, каванямопельтнень кандыть велень эрицятне. Кияк, паряк евтнесы Балтай покштядонть легенданть.
Евтнематнень коряс, 1902 иестэ, вирьсэ Эрзянь Кармалка веленть маласо лисьмапрянть ваксс сась эрямо ведун Балтай-покштясь. Тосонь эрицятнень валост коряс, те лисьмапрянь ведесь те шкас вити шумбрачи. Лия таркатнесэ Балтай чинть лемдясть «Овтонь чи» эли «Медень чи».
Ней те кенярксчись аламодо полавтовсь, ансяк смустезэ, вирень эрицятне кандыть ломантненень шумбрачи ды парочи – ванстовсь. Сонзэ юрсо аштить вирень азоронтень-овтонтень алтазь языческой озномат. Вана уш зярыя иень перть «Балтай» кенярксчись Татарстансо ловови республиканскойкс.

Неень читне

Кенярксчинть башка енксозо сеньсэ, што Татарстансо сон ютавтови ансяк Эрзянь Кармалкасо, велень эрицятне аштить каштанчисэ покштятнень-бабатнень койтнень а стувтоманть кувалма. Коень коряс, те кенярксчись тешкстави Троицядо мейле васенце недлячистэнть. Эрьва иестэ Балтаесь пурны Татарстанонь районтнэстэ ды Равчирень регионтнэстэ эрзянь фольклоронь коллективтнень. Кенярксчинь шалтось а оймакшны чоподас, ды кувать Эрзянь Кармалканть велькссэ гайгить эрзянь моротне. Весе коллективтнень вейсэнди эрзянь культурась, теке шкастонть жо сынь явовить вейкест-вйкест эйстэ мазый оршамопельсэст. Секс самай «Балтай» кенярксчись явови лиятнеде мазычисэнзэ.

Анокстазь «Ватаным Татарстан» газетанть марто вейсэ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».