Вторник, марта 19, 2024
Важное

Медицинань важодицянь профессиясь свал аштесь башка таркасо. Древней Грециянь ине философось Сократ кортыль: судьянтень, педагогонтень ды медицинань важодицянтень ёрокчись максови верде.

Бути кодамояк ломанесь иди лиянь эрямо, сонзэ ёвтыть героекс, тешкстыть казнесэ, ланганзо сёрмадыть. Медицинасо важодицянть туртов ломантнень идемась ашти эрьва чинь а шожда тевекс. Ды те роботасонть ильведевксэнть питнезэ пек покш – лиясто лия ломанень эрямосо онкстави!

Июнень 19-це чистэ тешкстави Медицинань важодицянь чись. Ды минек ули меленек содавтомс тынк «Республиканская клиническая больница № 5» Мордовия Республикань здравоохранениянь государственной бюджетной учреждениянь важодицятнень – алкуксонь врачтнень ды медицинской сестратнень марто, конат эрьва чистэ важодить ломантнень шумбрачист ванстомга ды идемга.

Течинь чине «Республиканская клиническая больница № 5» МР-нь ГБУЗ-сь сови Саранск ошонь лецямонь сехте покш учреждениятнень юткс, конасонть аравтозь медицинань неень шкань оборудования ды косо важодить эсь тевень содыця специалистт.

Республиканской 5-це № клинической больницясь ловови здравоохранениянь ламо профильной учреждениякс, конань юрсо улить 60 таркас стационар, 4 поликлиникат, 130 таркас чинь стационар, врачебной 5 амбулаторият, общей врачебной практикань 4 офист, фельдшерэнь-акушерэнь 21 пункт. Стационартнэнь отделениятнесэ максови медицинань лезкс кода Саранск ошонь, истя республикань эрицятненень. Целанек жо учреждениянь амбулаторно-поликлинической службась важоди 89 тёжадо ламо ломантнень марто, конатнень эйстэ 8 тёжатне – велень эрицят.

Неень шкане коллективсэнть важодить малав 800 ломанть, эйстэст ламотне – квалификационной категория марто специалистт. Учреждениянть прявтсо уш аволь вейке кементь иеть ашти Российской Федерациянь ды Мордовия Республикань заслуженной врачось, высшей квалификационной категориянь врачось, паро организаторось, эсь тевень педе-пес содыцясь Анатолий Николаевич Пинямаскин.

«Республиканская клиническая больница № 5» Мордовия Республикань ГБУЗ-нь прявт врачокс Анатолий Николаевич важоди 27 иеть. Те шканть перть здравоохранениянь учреждениясонть лиссть пек ламо эрявикс ды вадря полавтомат. Сферасонть стакачитнень лангс апак вано, сон ламо теи больницянть виевгавтомга ды эрицятнень ютксо сонзэ статусонть кепедемга. Пек ламо вийть максы коллективенть вейсэндявомантень ды сонзэ содамочитнень ламолгавтомантень. Ансяк тень коряс течинь чине медицинань учреждениянь коллективесь эри, важоди, кепедсти эсь ёрокчинть ды топавты икелензэ путозь весе аравтлувтнень.

Уледе содавиксэкс: Анатолий Николаевич Пинямаскин чачсь 1957 иестэ Мордовиянь Кочкуровань райононь Давыдвелесэ. Образованиязо высшей: прядызе Н. П. Огарёв лемсэ МГУ-нь медицинской факультетэнть. Университетсэ тонавтнема шкасто, 1980-1981 иетнестэ, важодсь средней медицинской роботникекс Саранск ошонь 4-це № клинической больницясо. Медицинань факультетэнть прядомадо мейле, 1981-1982 иетнестэ, ютась интернатура хирургиянь коряс Саранск ошонь 3-це № клинической больницянть юрсо. 1982 иестэ саезь 1986 иес – врач-травматолог-ортопед, прявт врачонь полавтыця Теньгушевань ЦРБ-сэ. 1986 иестэ саезь 1995 иес – «Резинотехника» медико-санитарной частень ортопедической центрань старшей ординатор. 1995 иестэ саезь неень шкас – Республиканской 5-це № клинической больницянь прявт врач. Теке марто 2013 иестэ саезь Анатолий Николаевич ашти Мордовия Республикань Врачтнень ассоциациянь прявтсо. Сон – МР-нь Государственной Собраниянь депутат, Социальной политикань коряс комитетэнь член, депутатонь этикань ды эрицятнень пшкадемаст марто важодемстэ законодательствань топавтомань кевкстематнень коряс председатель. Российской Федерациянь ды Мордовия Республикань заслуженной врач. Казезь ламо федеральной, региональной, ведомственной казнесэ, тешкссэ, медальсэ, почётной грамотасо ды Славань III-це степенень орденсэ.

Профессиясь – эрямонь смусть

Олеся Валериевна Чернышева – врач-терапевт, терапевтической отделениянь прявт. 5-це № РКБ-сэ важоди 2017 иестэ саезь.

Сонсь тейтерь-авась чачсь-кассь Кочкуровасо. Сиянь медаль марто школанть прядомадо мейле тонавтнеманзо поладызе Н. П. Огарёв лемсэ МГУ-нь медицинской факультетсэ, конань прядозь, велявтсь тиринь районов, косо ушодовсь врачокс важодемань кизэ. Ды кеветее иетнень перть важодсь тесэ участковой терапевтэкс. Олеся Валериевнань участканть юрс совильть Од Пурня, Вирь Тавла, Булгакова, Од Мурза покш велетне ды перькаст аштиця вишка велинетне. Кода тешксты сонсь врачось, велесэ важодемась макссь тензэ пек ламо. Ды, васняяк, эрявикс опыт.

– Неень шкане мон топавтан терапевтической отделениянь прявтонь тевенть Республиканской 5-це № клинической больницянь 1-це поликлиникасо, косо эсь шумбрачист вадрялгавтыть седеень-санонь, желудочно-кишечной трактонь, опорно-двигательной аппаратонь, лексемань системань орматнесэ сэредицятне. Покш робота ветяви сеть пациенттнэнь марто, кить сэредить коронавируссо. Ды те роботась пек эрявикс, эдь ломантнень шумбрачинтень те кезовось кандсь покш зыян, – тешксты Олеся Чернышева.

Врачось соды, мезде корты. Кезовонть шкасто, зярдо сынст лецямонь учреждениясонть меельце кавто иетнень перть нилексть панжозель ковидной госпиталь, О. В. Чернышева весе те шканть перть ульнесь вейке истямо отделениянть прявтсо. Тешксты, ульнесть стакачить, ансяк потамс ульнесь а ков.

– Васняяк а содавикс ормась тандавтсь, мейле кода-бути тонадовсь, муевсь лецямонь лувось ды «якстере зонас» совинек уш апак пеле, – ёвтни Олеся Валериевна. – Веенст сэредсть седе шождасто, лиятнень идинек реанимациясо. 2020 иень сёксня марявсь, минь изнинек. Ансяк тесэ ушодовсть кезовонь лия коволт, савсь одс полавтомс важодема лувонть, тагояк панжомс ковидной госпиталь, ды а весть.

Олеся Чернышева покш сюкпря ёвты эсь коллегатненень – врачтненень, медицинской сестратненень, лаборанттнэнень, санитартнэнень ды лецямонь учреждениянь лия специалисттнэнень, кинь марто сынь теить вейке покш тев – ванстыть ломантнень эрямост.

– Эрьва чистэ эсь важодема кабинетэнь кенкшень пекстамсто сюкпря марто ледстян тетянь-авань ды весе тонавтыцян, конат лездасть тень профессиясо изнявкстнэнь теемасо, ды, мезесь сехте кенярдовты, сэредицятнень ули кемемаст монь лангс.

Ирина Кузина: «Эрьва сэредицянть лемезэ кадовсь превс»

Ирина Васильевна Кузина «Республиканская клиническая больница № 5» Мордовия Республикань ГБУЗ-со важоди 23 иеть, эйстэст вейксэтнень – 1-це поликлиникань терапевтической отделениянь чинь стационаронь старшей медицинской сестракс.

Медицинасо важодема кизэ ушодовсь Орданьбуень районной больницясо, сеске тосконь медицинской училищанть прядомадо мейле. Седе тов важодсь Отяжелень районной больницясо. Ансяк вана тейтерь-аванть превс сехте пек кадовсь Отяжелень райононь Цёлпановань ФАП-со важодемань шкась. Ирина Кузина те шкас ледстни, кода овсе од тейтерькакс сась важодеме велень Фельдшерэнь-акушерэнь пунктс, косо малав мезеяк арасель, ульнесь зданиясь ды эрицятне, конатнень ютксо иеде седе вишкине кемень эйдеть ды аволь аламо сыре ломанть, эрьвась эсензэ орма марто.

– Те ульнесь 1997 иесь. Мон однэлинь, арасель кодамояк опытэм. Эрицятнеде Цёлпановасо сестэ котосядт ульнесть. Пек ламольть эйкакштнеде. Кенерилинь эйдетнень патронажонтькак теемс, сэредицятнень мартояк важодемс. А эдь сестэ аволь сотовойть, стационарной телефонткак арасельть. Важодинь ськамон. Васень шкастонть пелинь, ансяк куроксто весементень тонадынь. Паряк, самай те опытэсь монень пек лездась мейле, эсь профессиянть кемекстамосо, – тешксты Ирина Кузина.

Ирина Васильевнанень, кода сынст лецямонь учреждениянь лия специалисттнэненьгак, савсь улемс коронавирусонть каршо бороцямонь передовойсэнть.

– Миненек сыль кармавтома Здравоохранениянь министерствасто ды малав суткань перть больницясь ютавтылизе эсь важодеманзо лия лувс, – ёвтни Ирина Кузина. – Монь лангсо ульнесь важодеманть весе ладямозо, коллективенть пурнамозо. Пек стакаль важодемс специальной оршамопельтнесэ. Ансяк врачтне, медицинской сестратне, сынст профессионализмаст, прявт врачось Анатолий Николаевич Пинямаскин, кона свал явиль мель эрьва важодицянтень, кевкстиль эрьва сэредицядонть, кона свал ульнесь мартонок, пек лездасть изнямс весе стакачитнень. Зяроксть больницянок юрсо панжовкшнось ковидной госпиталь, зняроксть ульнинь васенцетнень ютксо. Те шкас превсэнь эрьва сэредицянть лемезэ, фамилиязо.

Врачтнень васенце лездыцят

Нина Васильевна Фадеева весе эрямонзо перть важоди медицинской сестракс. Здравоохранениянь ёнкссо важодемань стажозо 39 иеть. 1982 иестэ прядызе Темниковань медицинской училищанть «Медицинская сестра» специальностень коряс ды теке жо иестэнть сась важодеме «Республиканская клиническая больница № 5» МР-нь ГБУЗ-с. Тесэ эсь вечкевикс тевенть топавты те шкас. Эряви меремс, Н. В. Фадеева – высшей квалификационной категориянь медицинской сестра.

– Ней важодян 3-це № отделениянь общей практикань врачонь медицинской сестракс, – ёвтни Нина Васильевна. – Минек важодеманок сюлмавозь эрицятненень амбулаторна медицинань васенце лезксэнь максоманть марто. Истя жо покш важодема ветяви шумбрачинь ванстомань кевкстематнесэ эрицятнень содамочист кастомга. Ютавтовить профилактической медицинской ванкшномат, эрицятнень диспансеризациясь.

Ды кода мерсь Нина Фадеева, меельце вете иетнень перть диспансеризация ютасть 46 тёжадо ламо ломанть. Башка мель явови ютавтовиця диспансеризациянь вадрячинтень. Истя, васенцеде ливтезь 13 тёжат ормат, 80 % конатнестэ редявсть ранаяк. Ламолгадсть I-II-це стадиянь онкологиянь сэредицятне, аламолгадсть сеть, кинь те ормась кадозель вановттомо.

– Пек ламо полавтомат лиссть пандемиянь шкасто. Ней уш минь весе аноктано ковидэнть марто вастовомантень, куроксто тонавтнинек одонтень, полавтынек важодема лувонть. Ды целанек полавтовсь весе системась. Ней покш робота ветятано эрицятнень вакцинациянть коряс. Тевс нолдавить «Гам Ковид Вак», «Эпивак корона», «Спутник Лайт» препараттнэ, – тешксты Нина Фадеева.

Зярдо медицинась – призвания

Игорь Андреевич Кирилов 2-це № поликлиникасо участковой терапевтэкс важоди кавто иеть. Сась сеске Н. П. Огарёв лемсэ МГУ-нь Медицинской институтонь «Лечебное дело» факультетэнть прядомадо мейле. Теке шкастонть од цёрась тонавтни ординатурасо, келейгавты эсь содамочитнень.

– Мон шабра Нижегородской областьстэ, чачинь Арзамас ошсо. Врачонь профессиянть марто содавтомам ушодовсь 2008 иестэ, зярдо молинь тонавтнеме Арзамасонь медицинской колледжев, – корты Игорь Кирилов. – Тонавтнеманть прядыя 2013 иестэ, кода медицинань куроксто лезксэнь максомань службань фельдшер. Мейле служинь армиясо. Тосто велявтомадо мейле поладыя эсь тонавтнеманть Н. П. Огарёв лемсэ МГУ-нь Медицинской институтсо, конань прядыя 2020 иестэ 4,6 средней балл марто. Ней важодян ды тонавтнян ординатурасо.

Эряви меремс, университетсэ тонавтнема иетнень пертькак Игорь Кирилов эзь ёмавтне шканть, сон бажась аволь ансяк лекциятнень вельде пурнамс содамочить, теке марто маштомс нолдамс неть содамочитнень тевсэ. Секскак ушодсь важодеме медицинань куроксто лезксэнь максомань службасо реанимационной бригадань фельдшерэкс. Те тевсэнть ульнесь Республиканской 5-це № клинической больницяв самс. Ды тесэ эсь важодемань васенце чинть ледстни те шкас. Кода тешксты Игорь Андреевич, те ульнесь важодемань сэтьме чи. Сон приминзе сыцятнень, мейле ютынзе эсь участкань кудова аштиця сэредицятнень. Теевсь весе марто содавиксэкс. Пациенттнэде кортамсто жо мерсь, весе сынь а вейкеть. Бути сыненст пшкадят мизолкс марто, сэтьместэ, сыньгак полавтовить, чевтемить.

– Васенце шкастонть, монь, од ломаненть, неезь, кода-бути весе талакадыльть, а кемильть. Зярдо жо кортазеват мартост, кевкстнесыть пеняцямост, толковасак весементь, овсе полавтовить. Ды туемстэ ёвтыть сюкпря, – тешксты Игорь Андреевич.

Кириловонь участказо – Саранск ошонь Октябрьской райононь Гагарина посёлкась. Тосо ули общей практикань врачонь офискак, косо истя жо кемекстазь графикень коряс ветяви сэредицятнень примамось.

Игорь Андреевич ледстни, кодамо а шожда ульнесь пандемиянь шкась. Сынст поликлиникань важодицятне эрьва чистэ ютыльть 300 ламо адрест. Паро, неть шкатне ютасть, коронавируссо сэредицятне аламолгадсть, ансяк ормась ковгак эзь туе.

– Ней важодемась моли свалшкань лувсо, ансяк зярыя полавтома марто, – тешксты Игорь Кирилов. – Покш тарка саи коронавирусонь кезовонь профилактикась, эрицятнень вакцинациясь ды ревакцинациясь. Истя жо башка тарка саить эрьва иень профилактикань ванкшноматне, диспансеризациясь ды келейгавтозь диспансеризациясь сетнень туртов, кить сэредсть коронавируссо кавто ды седе ламо ковдо икеле. Ламот эрицятненень, кить бажить ютамс диспансеризациянть, ансяк арась шкаст важодеманть кувалма, мереви тень теемс субутастояк.

Важоди врачокс-онкологокс

2020 иень июлень 15-це чистэ «Мордовская республиканская клиническая больница № 5» Мордовия Республикань ГБУЗ-нь 3-це № поликлиниканть юрсо панжозель Онкологиянь лезксэнь максомань Центрась (ЦАОП). Центрань панжомань прявт аравтлувось – онкологиясо сэредицятненень медицинань лезксэнь максомась, орматнень шкастонзо ливтемась ды лецямось. Тесэ эрявикс лезкс максови кода амбулаторна, истя важоди чинь стационар. ЦАОП-сь весемезэ важоди 213 622 ломань марто, те сеть эрицятне, конат кандовить 5-це № РКБ-нь, 1-це № РКБ-нь ды «Поликлиника № 2» МР-нь ГБУЗ-нь участкатнес.

Врачокс-онкологокс весе те шканть перть тесэ важоди Ирина Анатольевна Путяйкина.

– Мон прядыя Н. П. Огарёв лемсэ МГУ-нь Медицинской институтонть, ушодынь врачокс-терапевтэкс, – ёвтни Ирина Путяйкина. – Мейле, зярдо поликлиниканть юрсо панжовсь ЦАОП-сь, одс тонавтнинь ды карминь важодеме врачокс-онкологокс те Центрасонть. Онкологтнеде тесэ важодить кавто, мон ды Владимир Алексеевич Дружинин, кона профессиясонть малав ведьгемень иеть. Амбулаториядо башка минек тесэ ули кемень таркас чинь стационар, косо ютазь иенть перть медицинань лезкс максовсь 265 ломаннень. Целанек жо вановтонок ало ютазь иестэ ульнесть 4305 ломанть. Те иестэ диспансерной учётсо лововить 445 ломанть.

Истя жо Ирина Анатольевна тешкстызе, Центранть юрсо важоди онкологиянь орматнесэ сэредицятненень психологической лезксэнь максомань кабинет. Кабинетсэнть ули весе эрявиксэсь, ули музыкотерапиянь ды арттерапиянь комната. Психолог марто кортамотне эрсить кода ськамонь-ськамонь, истя группанек.

Эрицятнень шумбрачист ванстомась – прявт тев

Ольга Владимировна Ярочкина – «Республиканская клиническая больница № 5» МР-нь ГБУЗ-нь рентгенологической отделениянь прявт, высшей квалификационной категориянь врач-рентгенолог. Тесэ важоди кавто иеть. Медицинань сферасонть жо 2002 иестэ саезь. Врачокс важодема кизэ ушодовсь Ковылкинань межрайонной больницясонть, ков сась врачокс-фтизиатракс. Мейле ламолгавтынзе эсь содамочитнень ды тонавтнесь рентгенологокс. 2019 иенть прядовомсто, самай коронавирусонь кезовдонть икеле, семиянек састь эрямо Саранскоев, ды Ольга Владимировна ушодсь важодеме 5-це № РКБ-сэ.

– Неень шкане отделениянок ловови рентгенологической сехте покш отделениякс Мордовиясо. Сонзэ юрсо ниле филиалт. Неть: 5-це № Республиканской клинической больницянь колмо поликлиникатне ды Кочкуровань больницясь, – корты Ольга Ярочкина. – Весе кабинеттнэсэ аравтозь рентгенодиагностической неень шкань эрявикс оборудования, теевить весе ванкшноматне: рентгенография, рентгеноскопия, ГСГ-э, КТ-э, МРТ-э, ТМГ-э, неень шкань цифровой компьютерной рентгенсэ-аппаратсо ды цифровой компьютерной флюорографсо ванноматне. Истя жо минек ули флюорографиянь ардтниця комплекс, штобу сон пачкодевель эрьва эрицянтень. Эрьва ие ютавтовить 50 тёжадо ламо рентгенологической ванкшномат, конат лездыть муемс орматнень икелепелев.

Кода мерсь Ольга Владимировна, сынст отделениясонть важодить малав колоньгемень ломанть, конатнень ютксо врачт-рентгенологт ды рентгенолаборантт. Весе сынь эсь тевень содыця специалистт, конат свалшкане тонавтнить ды келейгавтыть эсь содамочитнень.

– Коронавирусонь кезовонть шкасто минек важодемась эштёяк келейгавтозель, – корты Ольга Ярочкина. – Эрьва чистэ минь ванкшнылинек 200-220 ломанть. Те малав 80 ломанть часос. Тынсь чарькодтядо, кодамо стакачи специалисттнэнь ды аппараттнэнь лангскак. Эрьва врачось те шкасто тейсь героической тев. Покш сюкпря больницянь администрациянтень ды минек прявт врачонтень Анатолий Николаевичнень. Сон мелявтсь эрьвадонть, весементь тейсь важодеманть аламодо седе шождалгавтомга. Зярдо важодеманть прядылинек позда чокшне, эрьва медроботникесь больницянь машинасо пачтявсь видьстэ кудос. Истямо мелень явомась миненек макссь вийть ды арсема, весемесь изняви!

 

Мельвановикс ялгат, республикань здравоохранениянь важодицят ды ветерант! Седейшкава ёвтан тенк лембе валт профессиональной кенярксчинк кувалма – Медицинасо важодицянь чинть марто!

Тынк эйстэ ашти минек шумбрачись ды лиясто эрямоськак. Тынь цидярдынк пандемиянь весе стакачитнень, кить нейгак поладыть важодеме якстере зонасо сэредицятнень марто.

Вечкевикс ялгат! Сюкпря тенк идезь эрямотнень ды цидярдоманть кисэ.

Шумбрачи тенк ды весе сехте паронть! Покш чи марто!

А. Н. Пинямаскин,

«Республиканская клиническаябольница № 5» МР-нь ГБУЗ-нь прявт врач.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».