Ноябрянь 4-це чистэ, Раськетнень вейсэндявомань чистэнть, Московонь ВДНХ-со панжовсь «Россия» раськеютконь выставкась-форумось. Эйсэнзэ невтить пряст масторонь весе субъекттнэ. Выставкась карми важодеме апрелень 12-це чис, тосо невтевить минек тиринь масторонь весе сюпавчись, историясь, койтне-кирдатне ды изнявкстнэ.

Выставкань-форумонь панжомань церемониясь ушодовсь покш флешмобсонть, мейле поладовсь ушонь прявт сценасонть «1000 первых» спектаклясонть.

Мордовиянь Прявтось Артём Здунов выставкасонть панжизе минек республикань стендэнть. Сонзэ куншкасо – Ине чувто, республикань тешкс. Ине чувтонть ундоксонзо – те историясь ды койтне-кирдатне. Недьксэсь – те минек ломантне, конатнень кувалма аштетяно покш каштанчисэ. Лётчикесь, Советской Союзонь Героесь Михаил Девятаев, а изнявиця адмиралось Фёдор Ушаков, Патриархось Никон, масторлангонь келес содавикс скульпторось Степан Эрьзя, артыцясь Федот Сычков. Тесэ мереви «совамс» эрзянь-мокшонь раськень масторонтень, оршамс раськень оршамопельтнень эли ванномс республикань содавикс таркатнень.

Республикань стендэнть панжомасо ульнесь Мордовиянь «Варма» этно-арт-театрась. «Вармань» арт-коллекциясь тееви мокшотнень ды эрзятнень раськень оршамопельтнень лангс нежедезь, те модельертнэнь, визажисттнэнь, хореографтнень, режиссёртнэнь вейсэнь важодема.

Стендсэнть эрьва чистэ карми ламо мельстуиця – ёвтневи региононь изнявкстнэде ды эрзянь-мокшонь лия ёнов а молиця культурадонть: сон музыкасо, кельтнесэ, эрзятнень ды мокшотнень раськень оршамопельтнесэ, кедьчелькев ломантнень важодевкстнэсэ; масторонть келес содавикс Тавлань чувтонь налкшкетне, Орозбиень понань кемтне, Теньгушевань сисем тюсонь кодавкстнэ...

Мордовиясь содавикс тантей ды лезэв ярсамопельтнесэ. Минь сайтяно васенце тарка масторсонть алтнэнь производстванть коряс, колмоце тарка – ловсонь производстванть, нилеце – сывелень производстванть коряс.

Мордовиясь – масторсонть васенце органической сокамонть-видеманть коряс. Республикась топавты масторонь лекарствань безопасностенть – нолды субстанцият од антибиотиктнень, противовирусной средстватнень, пек эрявикс лекарстватнень туртов. Советской шкатнестэ саезь Мордовиясь ульнесь ды кадови светотехнической промышленностень, силовой электроникань куншкакурокс. Минь – васенце таркасо промышленной вагоностроениясонть, ЕврАзЭС-сэ оптической волокнань вейкине производительть. Ули лия ёнов а молиця производстванок – мореной тумонь таргамось ды обработкась.

«Минь вадрясто яволявтынек эседенек «Россия» выставкасонть, – мерсь стендэнть панжомсто Артём Здунов. – Ёвтан сюкпря весенень тей самонть кисэ. Карматано важодеме вете ковт, арсеме мезеяк  од, ансяк тыненк туевель мельс. Садо минек павильононть ваномо ды туинк ялганк».

Мордовиянь Прявтось башка тешкстызе, выставкась-форумось анокстазь Россиянь Президентэнть ушодксонзо коряс, ды алкукс лия ёнов а молиця.

«Тезэнь эряви самс школасо тонавтницятненень – вейке самось ёвтни седе ламо историянь, географиянь, экономикань учебниктнень коряс», – мерсь Артём Здунов.

ВДНХ-со выставкась карми важодеме эрьва чистэ, пондельникте башка. Совамось – питневтеме.