Вторник, марта 19, 2024
Важное

Саранскоень Светотехстрой эрямонь районсо Солнечной куронь од кудотне эрязасто вейке-омбоце мельга кармасть стявтовомо 2000-це иетнень ушодовомсто. Ледстневи, васень шкасто од районсонть эрицятне майсесть эйдень кужонь, школань ды аволь валаня китнень кувалма.

Шкань ютазь ламо тосо теезель ломантнень эрямост паролгавтомга: витневсть китне, панжовсь покш ды мазый школа ды истя седе тов. Чарькодеви, те таркасонть кармасть эрямо ламо од семият, косо трявить-кастовить эйкакшт. Самай сынст духовной питнейчитнень кастомга, нать, сонсь Пазось кучсь арсема минек священнослужительтненень теемс тосо Иоанн Кронштадтский лемсэ храмонть.

…Чейпулов таркасонть икеле кияк эзь снартне мезеяк строямс. 2015 иестэ нурька шкас жо теезель мазый, седеень эждиця, оймень ванськавтыця храмось. Сонзэ кепедеме чанстязель Ромодановань райононь благочинноесь, протоиереесь Владимир Кугушев.
Кавксо иеде икеле од иень омбоце чистэнть Иневанькс праведной Иоанн Кронштадтский лемсэ приходось вейсэ протоиереенть Владимир (Кугушев) ды Саранской епархиянь протоиереенть Виктор (Хохлов) марто те таркасонть ютавтызь престольной васенце кенярксчинть. Службась ютавтовсь строительной вагончиксэ, конань потмозо теезель храмокс. Солнечной ульцянь эрицятне, се шкастонть тов озномо сыцятне, те шкас ледстнить, кода лембестэ ютавтозель васенце службась, сонзэ прядовомадо мейле о. Владимир, те чинть а стувтомга, весенень казекшнесь Иневанькс Евангелият.

Ковонь ютазь те таркантень стявтозель храмонь сруб. Теде икеле тов пачтязель 30 тёжат тоннат сёвонь ды весе модась валакавтозель. Нама, сестэ тов озномо якицятнень ютксто аламот кемсть истя курок Пазонь кудонть тееманзо коряс. Седе, кода течи тосо служить священнослужительтне ды кодамо мелявкссо эри приходось, минь кортнинек Иневанькс праведной Иоанн Кронштадтский лемсэ храмонь настоятеленть Владимир КУГУШЕВ марто.

Эйкакш пинге

Протоиереенть Владимир Кугушевень эйкакш пингезэ ютась Теньгушевань райононь Стандрово посёлкасо, ламо эйкакшонь триця семиясо. Тетязо-авазо кастсть кото эйкакшт: колмо тейтерть ды колмо цёрат.

Эйкакшпингстэ кувать ледстнемакс кадовсь Мария сырькаезэ. Сон Пазнэнь кемицяль, весе посттнэнь кирдсь, ковгак кортнеме-аштеме эзь яксе. Каштомонть лангсо ульнесь удома таркинезэ, косо юткошкане секе-тев ознось. Содылинзе православиянь весе кенярксчитнень, путсь покш мель середатнес ды пецятнес. Неть читнестэ кирдсь пост.
Семияст покшоль, каштомосо, ямонь покш чугунонть вакссо, свал аштесь вишкине чугуннэ, косо сырькаезэ пидесь эстензэ постной ям. Сонзэ танстесь (Мария бабазо нуцькантькак яла каванилизе) те шкас эзь стувтово неень шкань священнослужителентень.

Васень варштавкс лангс, Владимир Кугушевень одсто эрямо кизэ аламо мейсэ явовсь се шкань ломантнеде. Школань прядомадо мейле тонавтнесь Н. П. Огарёв лемсэ МГУ-нь велень хозяйствань ды экономикань факультетсэ. Вузонть прядомадо мейле од специалистэнть кучизь важодеме эсест Теньгушевань райононь «Доброволец» колхозов, васень иетнестэ жо аравтызь главной экономистэкс. Шкань ютазь полавтызе эрямо тарканзо, тусь Чаунзань районов. Тосо кармась важодеме «Комсомольская» нармунень фабрикасонть, ульнесь экономистэкс, прорабокс ды лия тевсэ.
Владимир Кугушев свал бажась кастомс содамочинзэ, ды таго ушодокшнось тонавтнеме Н. П. Огарёв лемсэ МГУ-со, парсте максокшнызе кандидатской минимумонть, сонзэ статьянзо печатазельть масторсонок лисниця «Птицеводство» журналсонть.
Статьятнестэ вейкесэнть токазель неень шканеяк талновтыця темась – максомс модат нармунень кирдиця отраслянь ветицятненень. Кандидатской диссертациясь, ловт, аноколь, ансяк сонзэ идемс эзть максо вейксэньгеменце иетне, зярдо ломантненень эрявсь васняяк арсемс, кода трямс семиянть, мезде андомс эйкакштнень. Ламо эрьва кодамо профессиясо варчизе эсь прянзо стакачиде а пелиця, паро тевень топавтомо бажиця ломанесь.

Пазонтень эрьванть эсензэ кизэ

Виде, сеть кемемань видьмекстнэ, конатне эйкакшпингстэ каязельть о. Владимирэнь оймес, ковгак эзть ёма. Зярдо сонензэ топодсть 32 иеть, сон ушодсь храмов ды иневанькс таркатнева яксеме. Ниленьгемень иетнень топодемадо мейле Саранскоень ды Мордовской се шкань митрополитэсь Варсонофий баславизе священникень санс. Служамонь васенце таркась, косо ванкшновсь цидярдомачизэ, ульнесь Чаунзань районсо Сабур-Мачкасы велень Иневанькс Колмо святительтнень лемсэ храмось, сонзэ вельмевтемась-одкстомтомась.
Зяро ды кодат стакачи марто се шкане сон вастовкшнось, теде о. Владимир тенек эзь ёвтне. Эрямонть лангс пеняцямс – те аволь сонзэ обуцясо. Сонзэ кись – теемс истя, кода мери седеесь: алкукс ды вечкезь.

Самай истя сон важодсь Иневанькс Иоанн Кронштадтский лемсэ храмонть путомсто ды сонзэ перька тарканть мазылгавтомсто. Тесэ ули духовной центра, омбоце этажсо – недлячинь школа. Васенцесэнть пидить-панить ды эрьва кодамо шкасто пурнавкшныть те храмонтень якицятне. Лемдемадо-венчамодо икеле кортамо, стака шкасто лезксэнь максомо.

Ярсамопельтеме тесэ киньгак а кадыть

Духовно-просветительской центрасо улемстэ теевинек содавиксэкс тесэ умонь пидицянть-паницянть марто. Те – Лидия Фёдоровна Рузова.
Сон тантейстэ анды аволь ансяк недлячинь школав якиця эйкакштнень, истя жо сатышка ярсамопель пиди ломантненень, кить эрямонь кодамо-бути тувталонь кувалма кадовсть кудовтомо. Сынь эрить Саранск ошонь Пушкин лемсэ ульцясонть аштиця Вень удомань кудосонть. Эрьва чистэ седеймариця ломантне тов пачтить ямт-кашат ды лия ярсамопель, конань кандыть храмов сакшныцятне.
Теде башка, те тейтерь-авась ялганзо марто пани прякат мобилизованной боецтнэнень.

– Икелень чистэнть анокстынек пряка потмонть, рестынек капстанть ды чурьканть, – мерсь тенек Лидия Фёдоровна. – Боецтнэнень анокстазь прякатнень панинек ильтямо чистэнть. Сындест теинек тёжадо ламо. Кадык боецтнэ ледстясызь кудосо паневть тантей прякатнень танстест, – тешкстась авась.

Владимир батюшканть пачтямонзо коряс, специальной военной операциянть ушодовомсто саезь сынь кармасть боецтнэнень лездамо. Васня лезксэнть ильтясть Саранск ошонь гуманитарной складтнэс. Мейле кармасть тееме штатолт эсест территориясонть. Ульнесь истямо тевгак, кавто чинь перть анокстакшность колмосядт штатолт.
Нама, васень шкасто эзь сатокшно штась. Кода мерсь батюшкась, масторось аволь паро ломантеме. Лездасть предпринимательтне, невтемакс, Кирилл макссь 300 кг парафин, Владислав – 100 кг, лия седеймариця ломантне истя жо лездыть тенст: кить ярмаксо, кить кедьвийсэ.

Январень меельце читнестэ сынь ильтясть 15 тёжат штатолт, февраленть ушодовомстояк таго анокстасть посылкат, ды сынст ильтизь минек боецтнэнень.

Лезкс мобилизованнойтненень

Иоанн Кронштадтский лемсэ храмонтень сеедьстэ сакшныть лездыцят мобилизованной воинтнэнень штатолонь тееме. Тосо минь вастовинек эрзянь аватнень марто, кить ёвтнесть эрьва чинь лезксэст коряс.
Галина Вишнякова, пенсионерка:

– Тетям Георгий Сидорович Ине Отечественной войнань участникель, Изнямонь чинть вастызе Берлинсэ. Ниле ялаксонзо кадовсть тюремань паксятнес, сонензэ жо прась уцяска велявтомс кудов. Сон пек ламо ёвтнесь войнань стака шкадонть, кода сыненст савсь тюремс ятонть каршо.
Мирдем марто кастынек кавто цёрат. Лован, тей самосонть куш кодамояк лезкс макстано минек боецтнэнень.

Татьяна Куркова, пенсионерка:
– Иневанькс Иоанн Кронштадтский лемсэ храмонтень свал сакшны Галина сазором, сон монень ламо ёвтнесь приходтост. Сонзэ пельде карминь содамо те храмсонть штатолтнэнь теемадо. Саинь мель самс лездамо тенст. Важодемась а стака, эрьва кинень топавтовикс. Койсэнь, истя минь малавгавтсынек изнямонть.

Анастасия Елисеева, стыця:
– Аволь умок Иоанн Кронштадтский лемсэ храмонь настоятелесь о. Владимир сакшнось кудопотмонок светямо, мартонзо кортамсто карминь содамо те приходонть эрямодо. Саинь мель, кода кортыть, эсь сельмесэ неемс, кода тесэ ютыть тевтне.
Штатолонь теиця аватнень лангс ванозь, монгак сыненст вейсэндявинь. Койсэнь, те тевесь а стака ды весенень топавтовикс.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».