Вторник, марта 19, 2024
Важное

Репортаж «8-ое Марта» ООО-сто


Течинь чине сюротнень нуемась ушодовсь республикань весе районтнэсэ. Тедеде Мордовиянь аграрийтненень сонзэ эряви пурнамс 475 тёжат гектартнэнь лангсто. Неень шкасто сюродонть эрьва гектарсто саеви косо-бути 40,2 центнерт.
Кода ламот лиятнеяк, нуеманть шкастонзо ушодызь Покш Игнатовань райононь Ташто Чамза велень «8-ое Марта» ООО-сояк. Неть читнестэ минь ульнинек хозяйствасонть, ванынек, кода молить тевтне ды кода ламо вийть минек аграрийтне максыть сенень, штобу весе тевтнень теемс шкастонзо.

– Течи хозяйствасонть тевтне лаказь лакить. Моли сюротнень нуемась, – ёвтни «8-ое Марта» ООО-нь прявт агрономось Валерий Евгеньевич Левщанов. – Паксятнес лисинек августонь 1-це чистэ. Васняяк ушодынек озимой товзюронть нуеманзо. Сондензэ видезь 1,5 тёжат гектарт. Сюрось кенерсь вадрясто, секскак бажатано пурнамс сонзэ седе куроксто. Вейке гектарсто саеви 40-45 центнерт. Пивсэмань тевтнесэ важодить кемень комбайнат. Малав весе ACROS-т. Неть комбайнатне эсенек, Россиянь. Комбайнёртнэ сынст шныть. Истя жо нуезь сюронть усксить зярыя автомашинат. Пелешкаст эсенек, лиятне сиведезь. Сюронь урядамосонть весемезэ важодить малав 60 ломанть. Пивсэзь сюронть усктано эстенек ды Саранскоень элеваторов.
Зярдо ульнинек хозяйствасонть (ред. августонь 3-це чистэ), ванынек, кода моли нуемась Ташто Чамзанть эйстэ аволь васоло аштиця паксясонть. Теле лангс видезь товзюронть тесэ пивсэсть ниле ACROS комбайнат. Пивсэзь сюронть усксесть зярыя машинат.

– Сюрось кенерсь парсте, сон коське, натой шольни. Летькесь эйсэнзэ 14 %. Самай вадря ванстомань туртов, – корты Валерий Левщанов. – Ушосонть оно кодамо пси ашти, секскак шканть а таргсетяно, роботатано эрязасто. Арсетяно, зярыя чинь перть озимойтне нуевить. А тесэ уш яровой сюротнеяк кенерить. Бути пертьпельксэсь карми вадря, ковонь перть весемесь нуеви-пурнави.

Сюронь пивсэмань тевтнеде кортамсто, агрономось, нама, ледстинзе комбайнатнень ды сынст руль экшсэ важодицятнень.
– Тевтне эдь парсте молить сестэ, зярдо техникасонть важодить алкуксонь специалистт, – тешксты Валерий Левщанов. – Комбайнёртнэнь свал кочкатано весеме ёндо анокстазь. Улить истят комбайнёронок, конат эйкакш порасто саезь нуить сюро. Эдь сынь чачсть-кассть велесэ. Весемесь моли тосто!

Самай истятнэнь ютксо Евгений Мамаев. Хозяйствасонть сон важоди механизаторокс 2014 иестэ саезь. Сокамонь-видемань шкастонть сонзэ мельга кемекстазь «Фэндт» тракторось. А вана сюронь нуема шкасто сонзэ техникась – комбайнась. Ды меельце кото иетнень перть сюронь пивсэмань коряс цёрась хозяйствасонть васенце. Кода тешксты сонсь Евгений, те шканть перть сехте ламо пивсэвксэзэ – 320 тёжат центнерт.

– Сюронь нуема шкась – а стувтовикс. Сонзэ иень перть учат, – корты комбайнёрось. – Зярдо урожаесь паро, седееть кеци ды пурнамс сонзэ покш мельспаро. Ванат пивсэзь сюронть лангс, кенярдат, эдь тесэ тоньгак путовксот ули.

Ансяк пивсэзь сюрось комбайнатнестэ чамдови автомашинатнень ды трактортнэнь кузоватнес. Сюронь усксицятнень ютксо Григорий Гришин ды Николай Моисеев. Сынь шканть а таргсить. Ансяк кузоваст пештяви, эрязасто пачтить сонзэ эли тинге лангов, эли элеваторов. Машинатне мельга-мельцек, мерят, ливтнезь ливтнить. Весе капшить.
Хозяйствань тинге лангсо тевтеме аштицят истя жо арасть. Веенст ансяк ускозь сюронть ванськавтыть тикшенть ды лия касовкстнэнь эйстэ, лиятне усксить сонзэ колхозонь утомтнес. Седе вадрясь мейле туи видьмексэкс, лиясь жо – хозяйствань ракшатнень андоманть туртов.

Комбайнань жаткась – теке ёроков парикмахерэнь машинкась, саи тусто паксятнестэ товзюронь прятнень. Сюрось туи комбайнань бункерс, паксяс жо кадови ансяк олгось. Ды теяк а кувать, вант, паксятнес уш лиссть трактортнэ, конатне моданть анокстыть сёксень видемантень.

– Сеть паксятне, конатнесэ сюрось нуевсь, ней уш сокавить-анокставить телес. Веенстнэс сёксня видевить таго озимой сюрот, седе ламотнень жо кадсынек ламбамо якстерькаенть алов. Озимойтнеде мейле якстерькаесь неть модатнень лангсо чачи-касы седе вадря, – толкови Валерий Левщанов.
Вейке истямо паксясонть эсь тракторсонть важодсь Пётр Сундуков. Механизаторокс хозяйствасонть цёрась роботы уш аволь аламо – 37 иеть.

– Мон весе эрямон перть велень хозяйствасо, – ёвтни трактористэсь. – Ульнинь шофёрокскак, комбайнёрокскак. Савкшнось варчнемс лия техникаяк. А меельце зярыя иеть тракторсо важодян. Ней тракторонь руленть экшс озат покш мельсэ. Техникась од, вадря. Мелявкст мартонзо а лиснить. Тень кисэ покш сюкпря минек прявттнэнень, техникань парконть свал одкстомтыть. Икеле тракторонть савкшнось седе кувать витнемс, ней жо тевесь допрок лия. Од техникась важоди овсе лиякс. Таштотнень коряс сон теи ков седе ламо. Важодемань чинть перть эйсэнзэ сокави малав 30 гектарт мода. Те аволь аламо, – тешксты Пётр Иванович.

…«8-ое Марта» ООО-нь трудий ломантнень важодемань чист ушодови рана валске ды прядовкшны позда чокшне. Ансяк эдь шкатне ней истят. Зярс пертьпельксэсь ашти лембе ды сэтьме, эряви кенеремс нуемс сюронть. Туить пиземеть, весе тевесь лотки. А эдь кшись – минек прявт сюпавчинек!

Юлия Еремина
Фототне Эдуард Ретунскиень

«8-ое Марта» хозяйствасонть весемезэ видезь 5,5 тёжат гектарт сюрот, истя жо 300 гектарт зёрнакс кукуруза, 150 гектарт рапс, 2,3 тёжат гектарт ламбамо якстерькай, веиень ды ламо иень тикшеть.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».