Вторник, марта 19, 2024
Важное

Аволь умок Саранскойсэ, кеменде ламо иень ютазь, одс панжовсть спидвеень коряс официальной пелькстамотне – высшей лигань командатнень ютксо чемпионатонь ды кубоконь пелькстнэ. Мордовиясь свал ульнесь содавикс эй ланга мотогонкатнесэ – республикасонть сынст вечксть ды покш мельсэ учить нейгак.

Зярыя кемень иетнень перть Саранскоесь ульнесь спидвеень масторлангонь куншкакурокс. Республикась кастсь Россиянь, Европань ды масторлангонь чемпионт.

Эй ланга мотогонкатнень вечкемадонть, те спортонть эрямонь тевекс кочкамодонть, общественной важодемадонть ды эсь мельтнеде-арсематнеде минек кортамонок эй ланга мотогонкатнень коряс масторлангонь ды Россиянь чемпиононть, Европань кавксть чемпиононть, мотоспортонь коряс Мордовиянь сборной командань прявт тренерэнть, МР-ва Россиянь ДОСААФ-нь региональной отделениянь мотоспортонь куронь прявтонть, МР-нь Общественной палатань членэнть Максим ЗАХАРОВ марто.

– Спортонть марто сюлмавозь монь весе эрямом. Ансяк арсян, ули эштё мезес бажамс, – тешксты Максим Захаров. – Спортось тонавтымим стакачитнень изнямонтень. Нама, те а шожда, кинть лангсо лиснить эрьва мезть. Ансяк кода кортыть, стакачитне пачтятадызь изнямонтень.

Максим Захаров чачсь-кассь Саранскойсэ, спортонь вечкицятнень семиясо. Тетязо ды авазо покш мель явильть мотоспортонтень, секскак цёрынькась эйкакшокс парсте содыль, мезе те истямось мотоциклась.

– Авам тетянь ладсо пек вечкилизе мотоспортонть, кармась спортонь мастерэкс кандидатокс. Сон явсь мель мотокроссонтень – те зярдо ардтнить анокставт трекка, модань китнева. Авам ёвтнесь: ютавтовсть сезононь меельце пелькстамот, ульнесь сёксь, мольсь пиземе. Нама, трассась нолажаль, ды сон ламоксть пракшнось. Ансяк мезеяк лангс апак вано, поладынзе пелькстамотнень ды пачкодсь финишс. Кадык эзь сае изнямонь тарка, ансяк невтизе эсь ёрокчинзэ, изнямонтень бажиця обуцянзо. Неть пелькстамотнесэ сон эштё эзь сода, пешксесэль моньсэнь. Секскак, зярдо эйсэнь кевкстнить, зяро иесэ карминь ардтнеме мотоцикласо, свал мерян – эштё эмбрионокс улемстэ. Нама, те пейдемга, – корты Максим Захаров.

Шкась мольсь, цёрынькась кассь ды свал бажиль спортонтень. Школасо тонавтнемстэ налксесь тенниссэяк, баскетболсояк, чийнесь сокссо ды якиль спортонь лия секциятнес. Ды зярдо физкультурань тонавтыцянзо кортыльть кочкамс теннисэнть профессиональной спортокс, каршост свал мериль: теннисэсь мелезэнзэ тукшны, налксеме карми, ансяк профессиональной спортокс кочкасы мотоспортонть ды карми масторлангонь чемпионокс.

– Мон покш мель явилинь спортонтень, ансяк зярдояк эзия кадокшно тонавтнеманть. Секскак течи монь ниле высшей образованиян, – кемексты Максим Захаров. – Школадо мейле прядыя Кооперативной институтонть, косо макссть тень юридической содамочить. Мейле М. Е. Евсевьев лемсэ педагогической институтсо (ней – МГПУ) тонавтнинь физической культурань коряс специалистэкс, прядыя Сочисэ Раськеютконь олимпийской университетэнть ды аволь умок эсенек педагогической университетсэ макссть тень физической культурань коряс учителень диплом. Теке марто, арсян, те эштё аволь весе. Прясон чарыть од арсемат.

Эйкакш шкасто саезь Максим эстензэ кемекстась бажамо ды мольсь эйзэнзэ. Тетязо свал кортыль: «Цёрам, минь мотоспортонтень макстано ламо вийть ды те спортсонть кармить невтевксэнек». Неть валтнэ пек совасть вишка спортсменэнть пряс, ульнесь кемемазо, ютыть зярыя иеть ды сон карми чемпионокс. Истя лисськак.

– Кудосо те шкас ванстовсь газетасо сёрмадовкс монь кортамон марто. Монень ульнесть косо-бути сисем иеть. Саранскойсэ ютавтовсть эй ланга спидвеень пелькстамот, конатнесэ эсь ёрокчинзэ невтсь тетямгак. Мон аштилинь озадо трибунасонть ды малазон сась цёра. Кода мейле карминь содамо – журналист. Кармась эйсэнь кевкстнеме ардтнемадонть, мотоциклатнеде. Мон тензэ толковинь весе технической ёнкстнэнь, спортсментнэнь те эли тона шкастонть эскельксэст. Ёвтнинь сень, мезенть аволь эрьва покш ломанесь содасы. Содылинь весемеденть, эдь кудосо весе кортамотне ульнесть мотоциклатнеде ды ардтнематнеде. Те кортамодонть мейле лиссь «Мон карман седе виев» статья. Мон уш сестэ эсень туртов те спортонть кочкакшныя эрямонь тевекс, – ёвтни Максим Захаров.
Зярдо Максимнень ульнесть ансяк 15 иеть, цёранть тердизь «Мордовия» мотоклубонь одс пурназь командас, косо сон совась профессиональной спортсментнэнь юткс. Ды самай те шкастонть ушодовськак эсь бажамонтень молемась. Те ульнесь 1996 иесь. Зярыя иень ютазь, 2003 иестэ, Максим Захаров изнясь сырнень васенце медаль.

Теке марто прявт изнямокс спортсменэсь лови аволь те сырнень васенце медаленть.

– Монь туртов седе питнеекс кармась Россиянь чемпионатсо омбоце таркась. Те ульнесь 2002 иестэ. Мон эштё овсе од цёрынькакс саинь сиянь медаль. Ды те изнямодонть мейле сыргасть лиятнеяк, – корты спортсменэсь. – Питней се изнямось сеньсэяк, полавтовсь спортсментнэнь поколениясь. Тона чемпионатсонть ульнесть истят содавикс спортсментнэ, кода, саемга, Александр Балашов, Кирилл Дрогалин, Владимир Фадеев – эй ланга спидвеень сехте виевтне. А вана васенце тарканть сестэ саизе Каменск-Уральскойстэ монь иесэ цёрась Виталий Хамицевич, омбоценть – мон, колмоцекс кармась Сергей Казаков (Башкириясто). Чемпионатось ютавтовсь Уфасо. Ульнесть истят ёжомарямот – а ёвтавикст! Сестэ минськак чарькодинек, теинек а топавтовиксэнть, эскельдинек эсь вийтнень ды маштомачитнень верев. Теде мейле уш ламот спортсментнэ одс эзть лисне старттнэс, сынь маризь пряст изнязекс.

Ансяк, кода мерсь Максим, те изнямось кандсь апарояк. Коень коряс, Россиянь чемпионатсо изницятне молильть масторлангонь чемпионатов эсь команданть кисэ аштеме. Россиянь сборноень тренертнэ жо сестэ эзизь кучо од изницятнень, чемпионатов якасть седе содавикс спортсментнэ. Ды васенцеде историясонть Россиянь командась кармась колмоцекс, теде икеле жо омбоце таркадонть седе алов эзть валгокшно. Тренертнэ тейсть покш ильведевкс.
Седе тов ульнесть изнямот Россиянь, Европань ды масторлангонь чемпионаттнэсэ. Максим Захаровонь кудосо ули эсь наградатнень цела коллекция – эрьва кодамо питнень медальть, кубокт. Эрьвась эйстэст – а стувтовикс шкат, мельть-арсемат, эрьвасонть эрямо.

Нама, эрямось истямо, уцясканть лиясто апаркстомтыть кажов тевть. Захаровтнень сэтьме ды уцяскав эрямост колазель апаросо – овсе вишкинестэ эрямосто тусь сынст цёрынест Артём. Максим Ирина нинзэ марто те шканть печтизь пек стакасто. Захаров овсе кадокшнызе спортонтькак. Ансяк вейке-вейкенень лездазь, сынь тонадсть эрямо те ризксэнть марто.

– Те ризксэсь миненек зярдояк а стувтови. Ды а эряви стувтомскак. Течи минек кавто эйкакшонок – Яна ды Владислав. Ды мон апак кавтолдо мерян – семиянок уцяскав, – кемексты Максим Захаров.
2010 иестэ Максим Захаров кадызе профессиональной спортонть, ансяк те шкас сови республикань мотоспортонь команданть юрс – сон старшей тренер, од ломантнень тонавтыця, спортонть марто содавтыця. Теке марто Захаровтнень семиясь течияк истя жо кеместэ сюлмавозь спортонть марто. Мотоспортсонть Максим Захаровонь цёразо Владислав. Сон полады тетянзо кинть. А сонсь чемпионось вейсэ Ирина нинзэ марто ютавтнить оймсема чинь зарядкат ошонь эрицятнень туртов. Те проектэнть сынст семиясь арсизе сень туртов, штобу каземс ломантненень од мельть-арсемат, содавтомс сынст вейке-вейкень марто, теемс аламодо седе уцяскавокс. Ды сынст весемесь лисни вадрясто.

– Яна тейтерем истя жо машты мотоцикласо ардтнеме. Сюлмавомс те спортонть марто мелезэ арась, корты, келя, машты ардтнеме ды саты. Влад жо те спортсонть ашти кеместэ, – ёвтни мотоспортонь чемпионось. – Парсте содатадо, ней минек республикасо одс вельмевтеви спидвеесь. Ды цёрам а беряньстэ невти прянзо пелькстамотнесэ. Эряви ёвтамс, сон течи ардтни монь мотоцикласонть. Мон ванстынь эсь кавто мотоциклан, конатнесэ ардтнинь масторлангонь чемпионаттнэсэ. Ламот энялдсть сынст миемс, ансяк тень эзия тее, ванстынь сынст. Эдь сынь монь туртов теке ялгат. Ульнесть шкат, зярдо ульнинь профессиональной спортсменэкс, покш пелькстамотнес анокстамсто кадовилинь клубсонть пелевес ды кортнилинь мотоцикланть марто. Мон сонзэ ловинь ялгакс ды вешилинь пельдензэ лезкс изнямосо. Ней ванан цёрам лангс, сонгак теи истя жо. Сон – монь тевень поладыця!

Неень шкасто Максим Захаров вети общественной покш важодема. Сон – Мордовиянь Общественной палатань член, сови «Отцы России» общественной вейсэндявксонь региональной отделениянть юрс, ламо важоди од ломантнесэ тиринь масторонтень вечкеманть виевгавтомга – сеедьстэ ютавтни вастовомат школасо, техникумтнесэ ды вузтнэсэ тонавтницятнень марто. Ды ёвтни тенст эрямонь ки лангс стямонь эсь историядонть. Максим Захаров

Эй ланга спидвеенть арсизь шведтнэ. Масторлангонь васенце чемпионатось ульнесь косо-бути 1956 иестэ. Изницякс тосо ульнесь Уфань спортсменэсь Габдрахман Кадыров. Сон мельцек кото иеть ульнесь масторлангонь чемпионокс ды ансяк 35 иень ютазь рекордозо изнязель. Рекордсменэкс кармась Россиянь спортсменэсь Николай Красников. Сонзэ кавксо сырнень медалензэ масторлангонь чемпионатонь личной зачётсо ды эштё кемгавтово – команднойсэ. Ды эсь спортивной карьеранть прядызе изницякс. Зярдо жо ютави те рекордось, кияк а соды.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».