Вторник, марта 19, 2024
Важное

Мольсь 1970 иень сундерьковось. Паксятнесэ ды пиретнесэ прядовсть роботатне. Кода икелень шкатнестэ ульнесь: сёксесь – свадьбань шка.
Покш Березникень райононь Шугурова велень эрицятнень Пётр Исаевич ды Татьяна Ивановна Дудниковтнень семияс сась кенярксов куля: сынст васенце цёраст, Володя, пачтясь тетянстэнь-аванстэнь урьвакстомадо. Кинь саят никс кевкстеманть лангс мерсь: «Велень сехте мазый ды ёроков тейтеренть», ды кучинзе Судуткина Анянь чиявтомо.

Володя армиясо служамодо мейле велявтсь тиринь велев. Н.В. Камаев, колхозонь сестэнь прявтось, саизе шофёрокс. Од цёрась кармась усксеме председателенть.

Аня, Ардатовань культпросветучилищанть прядомадо мейле, истя жо велявтсь тиринь велев ды кармась важодеме клубсо художественной руководителекс. Сестэ велетнесэ ульнесть пек ламо од ломанть ды клубсо тевтнеде ламольть.

Володя парсте седиль гармониясо, Аня жо пек вадрясто морыль. Истя музыкань вечкиця кавто од ломантнень ютксо кирвазсь вечкема, ды сундерьковонь 22-це чистэ сынь налксесть свадьба. Свадьбась мольсь недляютко.

Васенце кавто иетнень перть одтнэ эрясть Дудниковтнень покш семиясонть. Володянь, сондензэ башка, ульнесть эштё ниле ялаксонзо ды кавто сазоронзо. Тень лангс апак вано, весе эрясть ояксчисэ, апак сёвно. Аня урьвась кедьчелькев. Сон машты эрьва мезень стамо, тантейстэ пидеме-панеме, салтомо... А кода моры мазыйстэ, теке Зыкина! Куш кодамо кенярксчистэ весень мель вити. Гармониясо жо седи тензэ вечкевикс мирдезэ.

Иень ютазь чачсь Галина васенце тейтерест. Те ульнесь пек покш кенярксокс аволь ансяк Володя марто Анянень, истя жо весе малавикстнэнень. Галянь чачомадо мейле сынь арсезевсть эсест пизынень пурнамодо. Рамасть а покш кудыне ды тусть эрямо тов, эдь те шкастонть Владимирэнь омбоце ялаксозояк уш урьвакстсь ды тетянь-авань кудопотмось седеяк пештявсь.

Шкань ютазь чачсь Алена омбоце тейтерест. Семиясь покшолгадсь, ды сынь путсть эстест покш кудо.
Шкась ве таркасо а ашти. Анна Алексеевна кармась важодеме школань библиотекасо библиотекарекс ды пионервожатоекс. Эйкакштнень марто анокстась концерттнэс киштемат, морот, сценкат ды истя седе тов. Владимир Петрович усксесь ветеринарной врач.

Важодемадо башка, ульнесь кудоютконь хозяйстваст. Кирдсть эрьва кодат ракшат, нармунть. Садпиресткак покшоль. Сынь эрьва ков кенерильть. Теилизь эсест тевест ды эштё лездыльть тетяст-аваст туртовгак.

Эйкакштне кассть, пурнасть эстест семият. Галя семиянзо марто эри Тольятти ошсо, Алёна – Московсо. Владимир Петровичень ды Анна Алексеевнань колмо нуцькаст: Володя, Маша ды Юля. Сынь аштить мельспаросо кувалмаст. Нуцькатнеяк пек вечксызь покштяст-бабаст. Эйкакштне ды нуцькатне сеедьстэ сакшныть инжекс. Лездыть эрьва мейсэ.

Течияк Владимир Петрович ды Анна Алексеевна тевтеме а аштить. Сынст ули аволь покш хозяйстваст. Трить тувот ды саразт. Кизна котьмить эмеж- ды садпиресэ, якить ягодас ды пангос, сёксня теить эрьва кодат таштавкст. Анна Алексеевна пек вечки цецят. Сынст кудо вальмалксост пешксе эрьва кодамо цецядо. Ютыцятнень сельмест кенярдовтыть.

Анна Алексеевна – ёроков кудазорава. Дудниковтне вечкить инжень вастомо, кенкшест свал панжадот родняст-раськест, ояст туртов. Кода иля сова тенст, столест лангсо свал тантей прякат, буто свал учить инжеть.
Анна Алексеевна – мелень ваныця ни, вечкиця ава ды сырькай, паро ялга. Владимир Петрович истя жо паро мирде, тетя ды покштя.
Ведьгемень иеть – те покш шка. Кода кортыть, эрямонть эрямс – аволь пакся ютамс. Те семиясонтькак ульнесь эрьва мезе. Ансяк мезеяк лангс апак вано, сынь кадовсть вейке-вейкень вечкиця ды эрьва мейсэ лездыця ломанекс.

Сырнень свадьба марто тынк, вечкевикс леляй ды уряж! Минь арсетяно тенк кеме шумбрачи, кувака эрямо ды уцяска.

Паронь арсезь, Дудниковтнень, Пятайкинтнэнь ды Яксяргинтнэнь семиятне.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».