Вторник, марта 19, 2024
Важное

2022 иень сентябрясто Саранск ошсо панжовсь Креативной индустриянь школась. Сон ушодызе важодеманзо Л. П. Кирюков лемсэ музыкальной училищанть юрсо. Креативной индустриянь школась – те «Придумано в России» федеральной проект, сон кармась «Культура» национальной проектэнь пельксэкс ды алтави ёроков эйкакштненень.

Сынст эйстэ эряви кастомс креативной профессиянь вадря специалистт. Эйкакштне тонадыть музыкань, дизайнэнь, анимациянь тееме. Седе тов – кастомс экономикасо креативной предпринимательстванть.

Кода важоди Школась ды кить тосо тонавтыть, миненек пачтясь сонзэ ветицясь Наталья БОГАТЫРЕВА.
– Васенце истямо Школась панжозель 2019 иестэ Кемеровасо. Сонзэ важодемась тусь мельс весенень: эйкакштненень ды од специалисттнэнень, кить тосо важодсть. Сынь нолдасть лия ёнов а молиця ды неень шкань эрьва кодат проектт. Теде мейле РФ-нь Правительствась кармавтсь тевс нолдамс проектэнть Россиянь весе регионтнэсэ. Ды уш сентябрясто Креативной индустриянь школатне панжовсть 32 регионтнэсэ. Сынст юткс понгсь Мордовияськак. Те ульнесь паро кулякс, алкуксонь изнявксокс. Эдь ютась покш кочкамо, ламо вешемат аштесть республиканть икеле. Школанть панжомга явозель федеральной субсидия, рамазель ламо техника ды эрявикс оборудования. Минек музыкальной училищасонть вадря материально-технической базась, ули дополнительной образованиянь коряс лицензия. Эряви меремс, весе 32 Школатне панжовсть вузтнэнь, ссузтнэнь юрсо. 2030 иенть самс истят школат арсеви панжомс Россиянь весе ёнкстнэсэ, – ёвтни Наталья Васильевна.

Креативной индустриянь школась – те кото студият: звукорежиссурань ды звуковой дизайнэнь (вети А. В. Антонов); электронной музыкань студия (А. Г. Галкин); фото- ды видеопроизводствань студия (О. В. Гущина); анимациянь ды 3D графикань (Н. А. Тюрина); интерактивной технологиянь (М. Д. Нестеренко); дизайнэнь студия (Д.Е. Нестеренко).
Проектэсь алтави 12-17 иесэтненень, конатне тонавтнить школасо, ды 1-2-це курсонь средней специальной учебной заведениянь студенттнэнень. Те, нама, васняяк, дополнительной образования. Эрьва студиясонть кармить тонавтнеме 20 ломанть. Студиятнес весемезэ пурнавсть 120 ломанть. Сынь саевсть экзаментэме. Тонавтнемань васенце иестэнть од ломантне содавтовить весе студиятнень марто. Занятиятне молить недлязонзо колмоксть. Ютась пельие ды уш ламот кочкасть эстест студия мелест коряс, сынь содыть, кона ёнксонтень кармить явомо мель. Неень шкань эйкакштне эрязасто тонавтнить од техниканть, чарькодить, кода мартонзо важодемс. Те иень сентябрясто саезь тонавтнемась поладови эрьванть эсензэ студиясо ды седе домкасто. Теде башка, эрявить анокстамс ды мейле идемс вейсэнь проектт. Школанть прядомадо мейле максови сертификат.

– Улить пек виев ды превей эйкакшт. Кой-кить тонавтнесть музыкальной эли художественной школасо, ютксост улить истят, кить уш сёрмадыть музыка. Техниканть ды тонавтыцятнень марто неть маштомачитне седеяк кемекставить. Мереви анокстамс индивидуальной проекткак. Минь кортнетяно бизнес-структуратнень марто сень коряс, кодат проектт эряви теемс эйкакштненень. Тагояк мерян, те аволь кружок. Миненек эряви анокстамс алкуксонь кадрат, конат седе тов кочкить эстест профессия. Неть ёнкстнэ, кода рекламась, дизайнэсь – сынь неень шкане эрявикст куш косо. Интерактивной технологиянь студиясонть покш мель явови программированиянтень. Тесэ максыть истят содамочить, конатне маштовить эрьва кодамо сферасо. Минь бажатано тонавтоманть ветямс мельстуезь, ютавтнетяно эрьва кодат мастер-класст, творческой вастовомат. Кияк а ашти тевтеме, кияк а нусмакали. Занятиятне аволь свал ютыть аудиториясо. Саемга, фото- ды видеопроизводствань студиянь тонавтницятне лиснить эрьва кодамо таркас, – корты Наталья Богатырева.

Эрьва студиясонть ули вейке педагог. Вешематнень коряс эрявсть од специалистт, кинень эзть топоде 35 иеть ды ули важодемань опытэст. Креативной индустриянь школасонть тонавтыцятне Мордовиянь. Малав весе прядызь Н. П. Огарёв лемсэ МГУ-нь Национальной культурань институтонть (тосо тонавтнесть дизайнэнь, рекламань коряс). Санкт-Петербургонь Культурань институтсо ютасть дополнительной образованиянь тонавтыцянь квалификациянь кастомань курсат. Весе сынь анокстасть кавто иес тонавтомань программа.
Эрьва студиясонть рамазь эрявикс техника ды музыкальной инструментт: гитарат, клавишнойть, графической планшетт, интерактивной панельть, квадрокоптер, микрофонт, 3D сканер, 3D принтер, моноблокт, мультстанокт, ноутбукт, цифровой камерат ды ламо лия мезе.

Ольга Владимировна Гущина важоди тонавтыцякс фото- ды видеопроизводствань студиясо. Сон ёвтни:

– Минек студиясь тонавты эйкакштнень фотографиянь ды видеонь тейнеме. Ушодтано сеньстэ, кода ладямс камеранть, мезе истямо композициясь. Стамбарнэ ютатано сенень, кода теемс съёмкатнень ломантнень, предметтнэнь, фононть марто. Теде башка, ладямс эрявикс валдонть. Эйкакштненень эряви неемс валдонть, композициянть. Иляст пеле важодемс ломантнень марто, зярдо икелест модельть. Минек ули техниканок, кемень фотоаппаратонок, эрьва кодамо съёмкас эрявикс объективть. Видеотнень теемстэ покш мель явома режиссурантень. Тесэ улить ламо ёнкст, конатнень эрявить содамс: кода важодить камератне, кода сынст ладямс, кодамо таркасо теемс (точка съёмки). Макснян тенст кудов заданият – снимамс телефонс. Мейле вейсэ толковасынек: мезесь а истя. Эрьвась ёвтасы мелензэ. Кортамонть вельде сатано кодамояк ве мельс. Бажан тонавтомс сынст арсеме.

Седе тов, кинь ули мелезэ, варчасы виензэ улемс ведущеекс, аштемс камератнень икеле. Эряви тонавтомс аволь ансяк операторонь тевентень, истя жо ветицянь эли корреспондентэнь. Тонавтомань эштё лия ёнкстнэ – гайтенть марто важодемась, монтажось. Весемеденть ёвтнетяно, невтнетяно. Теориядонть башка, минек тевсэ покш тарка саить практикась, мастер-класстнэ. Ансяк практикасо весемесь чарькодеви педе-пев. Ней вана вешан пельдест теемс социальной реклама. Эрьванть эсензэ арсеманзо, вановтозо ды те пек кецявты.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».