Вторник, марта 19, 2024
Важное

Неть читнестэ Саранскоев концерт марто сакшнось рузонь содавикс морыцясь Марина Девятова. Мордовиянь государственной филармониясо невтизе «Русская! Народная!» од программанзо.
Сонзэ концертэсь – те свал кенярксчи, паро ёжо, вечкема! Ваныцятне лембестэ вастыть эрьва номерэнть. Те седеяк кецявты морыцянть, сон анок эрьванть кутмордамс, каземс эсь лембензэ.

Морыцясь аволь васенцеде минек ошсо, сон сакшнось тей икеле иетнестэяк. Коронавирусонть кувалма морыцянть декабрянь концертэсь ютавтозель ней. Кода печтить неть стака шкатнень артисттнэ? Теде Марина ёвтнесь минек газетанть туртов:

– Ормась зярс эзь туе ды тень кувалма концертэнь залтнэ аволь пешксеть. Улить ошт, конат пекстазь, тосо а ютавтыть концертт. Меельце кавто иетнень перть артисттнэнь эрямось пек полавтовсь. Концерттнэде аламо. Государственной лезкс кодамояк арась. Монь коллективстэ од ломантне тукшныть, кадыть творческой профессияст. Эрьванть ули семиязо ды сонзэ эряви трямс. Те шканть перть мон пелинь, мелявтынь, ризнынь. Чарькодинь, а эряви нолдамс кедтнень. Колмоксть сэрединь ковидсэ. Койсэнь, эрьва семиянть токизе те зыянось. Кемтяно, зярдояк те весе прядови! Саранскойсэ концерттнэсэ свал эрсесь аншлаг. Ней арась. Ансяк пек лембестэ вастымизь!

Эрьва ошонть коряс важодтяно башка. Эрьва косо лият вешематне. Косо-бути залтнэнь мереви пештямс ансяк 50 процентс, косо-бути вешить QR-кодт. Ваныцянок-кунсолыцянок свал сёрмадыть тень инстаграмс, кевкстнить, алкукс-аволь карми сынст ошсо концертэсь? Ломантнеяк сизесть полавтоматнеде ды вешематнеде. Кие-бути рамась вечкевикс нинзэ туртов концертс билет, концертэсь а ули эли каднызь лия ковс. Те весе ашти аволь мондень, истя тейсть организатортнэ, ансяк чумокс ловить монь.

Кодамояк онлайн-концерт а полавтсы алкуксонь концертэнть. Онлайн-лувось лади эрямонь аволь весе ёнкстнэс, сон кодаяк а искусстванть. Ломантне сакшныть ёжомарямотнень мельга. Раськень моротне токшить ойменть! Сынст кунсоломсто авардезеват, арсезеват, седееть ойми. Мон вечкан концертт ваныця марто, а ёвтавияк, кодамо покш мельспаро неемс ломантнень сельмест, сынст ёжост!

Ваныцятнень ды газетань ловныцятнень туртов арсян шумбрачи, уцяска, кадык теевить ламо од семият, чачить ламо эйкакшт! Кадык туи эйстэнек пандемиясь. Илядо ризнэ, кемеде, кемемась лезды тенек печтямс стакачитнень. Лембе, маней чить ды валдо менель!

Мордовияв самоськак Маринань туртов свал кенярксчи. «Тесэ эри монь умонь ялгам, конанть марто тонавтнинек Гнесинкасо, ды эштё вейке салавачи тенк ёвтан: рунгован аламошка чуди мокшэрзянь раськень верь. Тетянь Владимир Девятовонь покштянзо-сырькаензэ чачома таркаст Тамбов ёнксонь Алкужи ды Мутасьево эрзянь велетне. Покштям эсензэ раськедензэ книгаяк сёрмадокшнось. Неть велетнесэ Девятовтнеде пельвеле». Штобу Марина а стувтневлинзе мокшэрзянь ундоксонзо, тензэ казинек эрзянь оршамопельсэ някине вишка тейтерьканзо Ульянань туртов, кона учи аванзо кудосо. Марина весе юткошканзо ней ютавтни мирдензэ ды эйкакшонзо марто.

Э. РЕТУНСКИЙ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».