Июнень 17-це чистэ 100 иень юбилеензэ тешкстызе Ицялонь муниципальной райононь Селища велень эрицясь, тылэнь труженицась Елена Павловна Тюмкина. Те чистэнть сонензэ поздоровонь ёвтамо сакшность ламо раськензэ ды малавикс ломанензэ, кить эрить масторонть келес.
Те кенярксчистэнть Елена Павловнанень покш мель явсть масторонь ды республикань прявттнэ. Сонензэ кучсь поздоров марто телеграмма РФ-нь Президентэсь Владимир Владимирович Путин. Мазый цеця пусмо марто сакшнось Мордовия Республикань Государственной Собраниянь Председателесь Владимир Васильевич Чибиркин. Покш мель явсь Ицялонь муниципальной райононь администрациянь прявтось Валентина Григорьевна Дмитриева.
Те чистэнть, марявсь, сонсь пертьпельксэськак чачома чинь тешкстыцянтень казсь маней менель, экшеденть мейле аволь ансяк лембе, натой, алкуксонь кизэнь пек пси чи.
Селища кезэрень велентень минь пачкодинек обед малав. Тешкстаса, араселинь те таркасонть малав ниленьгемень иеть. Мельспаросо эсь пачкан тешкстыя, кода сон пек полавтовсь паро ёнов. Ледстневи, умонь кавксоньгеменце иетнестэ сёксень-тундонь рудазов шкане те велентень ансяк покш кемсэ ды виев тракторсо ломантне пачкодильть. Ней жо китне вельтязь паро асфальтсо, кудотнеяк допрок полавтовсть, ламо одт строязь, таштотне витнезь, стявтозь од церькова. Истя, советской ды неень шкатнеде арсезь, минь пачкодинек Тюмкинтнэнь кудонть ваксс. Сонзэ перька ульнесть ламо ломанть, весемева неявсь, кенярксчинтень, аваст-бабаст юбилеентень тесэ анокстасть алкукс: аволь ансяк кудонь, кузтембесэ апак арто лазтнэяк истя ваньксстэ шлязельть, прок ожо тюссо артозельть. Кудонть маласо путозель столь, конась пешксель тантей ярсамопельде.
Кодашкаль мельспаронь абунгадоманок, зярдо 100 иесэ Елена Павловна кши-сал марто эрязасто ютась минек вастомо. Сонзэ чевте мизолксось ды вастомань паро валтнэ сеске кепедизь ёжомарямонок. Тесэ вейке омбоце мельга кармасть само шабратне, юткстост эрьвась ютась эсь сад-пиресэ кастозь цеця пусмо марто. Эйкакштне ды нуцькатне истя жо кармасть тензэ казнень максомо. Елена Тюмкина эрьванть каршо ёвтась лембе валт. Ванат те эрзянь аванть лангс ды арсезеват, косто сон амольди зняро вийть ды эрямонь вечкема. Эдь эрямонь пингезэ ульнесь тунь а шождатнестэ.
Чачсь сон Селища велесэ умонь 1923 иестэ, ламо эйкакшонь триця семиясо (колмо сазорт, колмо ялакскеть ульнесть эйстэст). Войнадо икелень чачовт эйкакштне ламо нужачи несть, ламо стака робота топавтсть. Весементь цидярдызе Елена Павловна, одсто торфонь таргамо яксесь, тетянзо-аванзо туртов эрьва тевсэ лездыцяль. Ледстнеманзо коряс, марчонь кшиде ярсась, ламо вачо пеке цидярдсь. Пингень перть важодсь «Куйбышев» лемсэ эсест велень колхозсо, эрьва кодат тевть топавтсь, звенасояк паксянь тевтнень топавтомо лиснесь, ракша мельгаяк ламо якась. Колхозсо важодемстэ теевсь содавиксэкс эсест велень од цёранть Василий Тюмкин марто. Одтнэ аволь кувать вастневсть, Василий Михайловичень ёндо кучсть кудат ды сынь урьвакстсть-венчасть.
Кодат стакачить арасельть сынст эрямосо, весе шканть эризь вечкезь ды вейке-вейкень чарькодезь. Елена Павловнань валонзо коряс, Пазось макссь тензэ аволь нузякс, эрьва тевень тееме маштыця ды вечкиця мирде. Мирдензэ, Василиень, кедензэ ульнесть «сырнень», кодамо тевс а кундыль, весемесь тензэ топавтовиль, теевиль. Ды пек парсте.
Сонсь ды велень ломантнень лезксэст вельде путсть покш, вадря кудо, косо таркась сатотсь весенень. Сыненст свал сакшность ламо инжеть. Весень лембестэ вастылизь ды мезест ульнесь, сеньсэ яла каванилизь. Текенень поладсынек, Василий Михайлович паро плотникель, сон аволь ансяк эстензэ, Селища велень ламо эрицятненень лездась стявтомс кудот-мезть.
Нать, а стяко сынст семиясо чачсть-кассть кемень эйкакшт, ней эйстэдест кадовсть ансяк вете. Теде кортамсто Елена Павловна салавине нардынзе сельведензэ.
Васенце цёраст Михаил тетянзо ладсо маштсь срубонь чапомо, чувтосто эрьва мезень тейнеме. Апак учо кулось 1982 иестэ, Василий Михайлович (тетязо) 1986 иестэ.
Омбоце тейтерест Вера Васильевна туекшнесь эрямо Самарань областев, шкань ютазь велявтсь тиринь велев. Сонзэ марто кортамсто седеезэнь сардокс пезнась эрямонь кизэ-янозо. Сон лиссь мирденень эсест велень цёра экшс, кинь арасть кавонест пильгензэ. Од цёракс, Саранскойсэ эрямсто понгсь чугункань ки лангсо аварияс… Видькстатано, аволь эрьва ломаненть сатыть виензэ ды нардевчизэ истямо уцяска эстензэ кочкамс. Текенень поладса, Вера Васильевна эри тиринь велесэ ды ютко шкасто свал аванзо вакссо. Сонсь Елена Павловна эри Геннадий цёранзо марто, конась апак урьваксто.
Ламо седейризкст савсь кирдемс те эрзянь авантень: кавто иесэ кулось кавксоце цёрынезэ Николай, одсто тусь эрямосто Анна колмоце эйкакшост, мельганзо Александр цёраст, 52 иесэ ветеце эйкакшост Ольга. Тень лангс апак вано, лия эйкакштне сонзэ ськамонзо а кадныть Татьяна эри Воронежсэ, Антонина – Саранскойсэ. Сехте вишкинесь, Юрий Тюмкин истя жо эри Мордовиясо. Неть покш стакачитнень лангс апак вано, Елена Павловна эрямонть лангс а пеняци.
Превс путомат кувака пингень эрямга Елена Тюмкинань пельде
Улемс седеймарицякс, лиятненень паронь арсицякс, киньгак а покордыцякс, весенень лездамо бажицякс, морамо вечкицякс ды паро ёжосо улицякс. Васень таркас аравтома Пазнэнь озноманть, кинь лангскак кежень а кирдеманть!
Мельвановикс авай, сырькай!
Ёвтатано теть поздоровт 100 иень юбилееть кувалма. Тон минек кастыцянок, превс путыцянок, эрьва тевсэ васенце лездыцянок ды свал чарькодицянок. Ламо веть эзить удо минек кастомсто, пек стака тевть топавтыть минек трямсто. Кадык Пазось вансттанзат ды максы эште ламо иеть эрямс минек ютксо, каземс тенек кеняркст мастор лангсо улемасот, свал лембестэ минек вастомасот.
Сюконятано тонеть модас, вечкевикс авай!
Вете эйкакшот, 11 нуцькат,12 правнуцькат
Валентина ЮДИНА