Вторник, марта 19, 2024
Важное
«Мордовское агропромышленное объединение «Ардатов» ООО-сь кандови республикань велень хозяйствань вадрясто важодиця предприятиятнень юткс.
Сон теезель 2007 иестэ Орданьбуень ды Отяжелень районтнэнь велень хозяйствань зярыя предприятиятнень юрсо, конатне ёвтазельть банкротокс. Важодемань прявт ёнксокс кочказь сюротнень кастомась ды ракшатнень трямось. Предприятиянть прявтсо ашти эсь тевень содыця аграрникесь
Юрий Александрович Евдокимов. Важодицятнеде лововить малав 240 ломанть.
Неень шкантень МАПО-нть весемезэ 12 440 гектарт моданзо. Тедеде сынст лангс видевсть 1200 гектарт товзюро, 2150 гектарт шуж, 250 гектарт сюрокс кукуруза ды 950 гектарт силосокс кукуруза, истя жо 500 гектарт кснав, 350 гектарт соя, 250 гектарт рапс, 100 гектарт ликша. Теке марто 2000 гектарт видевсь ламбамо якстерькай, 1700 гектарт
– озимой товзюро. 1450 гектарт максозь ламо иень тикшетнень алов, 400 гектартнэ – лугат ды 1140 гектартнэ тедеде кадозь оймсеме.

Агропромышленной холдингенть юрс совить кавксо хозяйстват,
конатне аштить Орданьбуень Пиксяси, Жаренки, Чукало, Низовка, Куцянвеле, Мурза велетнесэ ды Отяжелень Селищасо ды Сосуновкасо.
Эрьвасонть ули ловсонь-товарной ферма. Сынст важодемадонть миненек ёвтнесь «МАПО «Ардатов» ООО-нь животноводствань коряс
прявтонь полавтыцясь Евгений Дмитриевич Кондрашкин. Евгений
Дмитриевич пачтясь, течинь чинтень холдингень хозяйстватнесэ
трявить-кирдевить 3,5 тёжат сюракшов ракшат, сынст эйстэ 1250
– потявтовиця скалт.
– Меельце шкастонть предприятиясонть теевсть редявикс
полавтомат. Васняяк тесэ ёвтама производствань одкстомтоманть.
Важодемасо келейстэ тевс нолдавить неень шкань технологиятне,
конатне тевентькак седе шождалгавтыть, ёмавкстнэньгак аламолгавтыть. Неень шкасто тентеме кодаяк, – корты Евгений Дмитриевич. – Тень эйстэ ашти целанек предприятиянть роботазо.
Ды бути ломантненень теемс важодемань вадря условият,
тевесь эдь овсе лиякс туи, седе парсте.


Евгений Кондрашкинэнь валонзо коряс, меельце иетнестэ ферматнесэ одкстомтозель потявтомань ды ловсонь ванстомань оборудованиясь, теевсть кардот, витневсть кизэнь шкасто ракшатнень кирдема калдатне.
– Весементь коряс кассть невтематнеяк. Эрьва чистэ весемезэ потявтови 30 тёжат килограммат ловсо. Вейке скалонть эйстэ саевить кособути 20 литрат, – тешксты прявт зоотехникесь. – Ловсонть минек кедьстэ рамить Ицялонь сырань теема комбинатось ды Саранск ошонь Консервной заводось.
Ансяк улить мелявтовтыця кевкстематкак. Васняяк Евгений
Дмитриевич тешксты специалисттнэнь асатоманть.
– Хозяйстватнесэ эрявить потявтыцяткак, ваз мельга якицяткак,
механизаторткак. А сатныть ветврачт, зоотехникть, осеменаторт, –
корты Евгений Кондрашкин. – Кавксо хозяйстватнес минек ансяк кавто
ветеринарной врачонок. Неть: Андрей Васильевич Ботенков ды Сергей Николаевич Куликов. Истя жо весемезэ колмо осеменаторт – Михаил Николаевич Лияськин (сонзэ мельга кемекстазь Чукало ды Пиксяси велень хозяйстватне ды «Сосуновская Нива» ООО-сь), Сергей Алексеевич Суюшов (Низовкань ды Жарёнкань хозяйстватне), Любовь
Ивановна Лычагина (Куцянвелень ды Мурзань хозяйстватне). Нама,
потявтыцятнень асатноманть кувалма ламолгадсть тевтне сынст
туртовгак. Эрьва потявтыцянть лангс савить косо-бути 70 скалт.
Ды важодицятнеяк иень коряс пачколить пенсиянь шкантень. Весе
отделениятнесэ пек эрявить од специалистт. Ансяк вана од ломантне овсе а капшить само велев. Кадык зарплататнеяк минек тесэ
а берянть ды пандовитькак шкастонзо. Весе хозяйстватне, нама,
кирдевить эсь тевень содыця ды важодемань вечкиця ломантнень
лангсо.
Сонсь Евгений Кондрашкин велень хозяйствасо малав весе эря-монзо перть, 1987 иестэ саезь. Сась сеске Краснослободскоень зооветтехникумонть прядомадо мейле.
Важодемань кизэ ушодовсь Отяжелень райононь Отяжеле велень
Советэнь КПСС-нь 22 съездэнть лемсэ колхозсонть. Мейле сонзэ
лемезэ, азоронзо полавтневсть, ансяк важодемась ветявсь теке лувсонть. Хозяйствасонть Евгений Кондрашкин роботась 2018 иес, зярс эзь юта «Ардатов» МАПО-в.
– Тесэяк уш вете иеть роботан. Шкась ливтясь, эзь марявояк. Эдь свал тевсат, – тешкстась Евгений Дмитриевич.


Холдингсэнть улемстэ минь содавтынек Низовка велесэ аштиця МТФ-нть. Сонзэ прявтсо ашти ёроков авась Елена Александровна
Ермолаева. Фермасо важоди колмо иеть. Теде башка, вана уш кемень иеть топавты завскладонь тевенть. Эряза авась кенери кавто
таркава.
Фермасо Ермолаевань вановт ало роботыть весемезэ кемнилее
ломанть, колмотне эйстэст – скалонь потявтыцят. Истя жо тесэ
улить вишка ваз мельга якицят, слесарть, ракшатнень мельга якицят, трактористт.
– Неень шкантень минек фермасо трявить-кирдевить 340 сюракшов ракшат. Юткстост 190 – потявтовиця скалт, 70 – тёлкат, 50 – вазт,
– ёвтни Елена Ермолаева.
Елена Александровнань валонзо коряс, эрьва скалсто потявтови
16 литрат ловсо, конась ильтяви Саранскоень Консервной заводов.
Е. А. Ермолаевань туртов васень лездыцясь (кода ловсонь-
товарной фермасо, истя утомтнесэяк) – Елена Викторовна
Клементьева учётчицась. Хозяйствасонть авась роботы кото иеть.
Сон тескень, Низовкань.
– Школадо мейле тонавтнинь профессиональной училищасо
бухгалтерэнь тевентень. Профессиянть коряс жо роботамс эзь саво,
– корты Елена Викторовна. – Зярсыя ульнинь лавкасо микшницякс.
Мейле тердимизь тей. Сынь ды а янксян. Роботась тень вечкеви.
Елена Клементьева пштистэ ваны сень мельга, зяро потявтови
ловсодонть, ильти сонзэ заводов. Истя жо сон лови ды лади тесэнь
важодицятненень зарплатанть. Бухгалтерэнь содамочитнень марто весементь теемс тензэ а стака.
Низовкасо скалонь комплекссэ осеменаторокс важоди Сергей
Алексеевич Суюшов. Сон чачсь ды эри Мурзасо. Тей жо ардтни роботамо. Велень хозяйствасо весе эрямонзо перть. Школадо мейле
прядызе Краснослободскоень зооветеринарной техникумонть, максовсь тензэ зоотехникень профессия. Важодемань кизэ ушодовсь тиринь велень «Дружба» колхозсонть.
– Тосо профессиянтень совавтыцякс ды весементень тонавтыцякс монь туртов ульнесь Николай Князькин, кона се шкане роботыль
осеменаторокс, – ёвтни Сергей Суюшов. – Нама, од тевенть свал
ушодомс а шожда. Теке марто техникумсо максозь содамочитне пек
лездасть, ламось ульнесь содавикс ды чарькодевикс.
Колмо иеде икеле Сергей Алексеевич кармась роботамо МАПО-со.
– Тесэ монь мельга кемекстазь кавто хозяйстват – Низовкасо ды
Жарёнкасо, – тешксты осеменаторось. – Сюракшов ракшатнень породась минек хозяйстватнесэ икеле ульнесь якстере-ашо голштинской, меельце шкасто аламонь-аламонь ютынек раужо-ашо голштинизированноентень. Ды семенной материалоськак, нама, тевс нолдави истямо.
Эсь важодемадост Низовка велень МТФ-нь важодицятне ёвтнесть покш мельспаросо. Лангозост ванозь, мереват, ломантне алкукс эсь тевсэть.

Юлия ЕРЕМИНА
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».