Вторник, марта 19, 2024
Важное



Декабрянь 7-це чистэ Покш Березникень муниципальной районсо ульнесь покштояк покш кенярксчи, кона совась аволь ансяк те ёнксонть, минек республиканть ды мик масторонть историяс. Эдь кавто покш объекттнэ – Культурань-досугонь центрась ды «Теремок» эйдень кужось – одкстомтовсть РФ-нь Президентэнть В.В.Путинэнь ушодксонзо коряс. Сынь теезь «Культура» ды «Демография» национальной проекттнэнь лезксэст вельде.

Нать, а стяко кенярксчистэнть те райононь эрицятнень марто мельспаронть явомо сакшность Мордовия Республикань Прявтось В.Д.Волков ды Российской Федерациянь Культурань министрань полавтыцясь, «Культура» национальной проектэнть координаторось О.С.Ярилова.

Тешкстасынек, 2019 иесь ламо пингес кадови ледстневицякс те райононь эрицятненень. Покш Березникень историясо эштё арасель истямо сюпав событиясо ды одкстомтозь объекттнэнь панжомасо тев. Ледстясынек, те иень кизна одкстомтозель Юткошкань ютавтомань ды оймсемань паркось. Ковдо икеле райононь куншкакуросо светязель ды панжозель Иневанькс Троицянть лемсэ од церьковась. Ды вана ней, теленть ушодовомсто, панжовсть кавто покш объектт, конатнень тесэ эрицятне учость пек умок. Неть: Культурань-досугонь центрась ды «Теремок» эйдень кужось.

Кавонест неть объекттнэ теезь неень шкань од технологиятнень мельс саезь, эйсэст ули весемесь покш ломантнень ды эйкакштнень эрямост паролгавтомга, ёжомарямост витемга, содамочист кастомга, оймсема шкаст седейшкава ютавтомга. Сынь парт ды мазыйть кода ушо ёндо, истя потстояк. Маласо шкасто эштё вейке покш казне учи те райононь эрицятнень. Покш Березниксэ малав анок од ды вадря эрямо кудось, ков ютыть ломантне эрямс а маштовикс кудотнестэ. Маласо шкасто алкуксонь Од иень казнекс сон карми улеме ламот уцяскав семиятненень.

ПАРОНТЬ ВАНСТОЗЬ, ВЕСЕ ОДОНТЬ ЭРЯМОС СОВАВТОЗЬ

Истямо лувсо топавтозельть тевтне Покш Березникень Культурань досуговой центранть одкстомтомсто. Те зданиясь теезель ютазь пингень 80-це иетнестэ, совамо таркань икельце стенатне мазылгавтозельть эрьва тюсонь кевнесэ (мозаикасо), конатнень, ламо ванкшноматнеде мейле, кадызь апак тока. Телень маней чистэнть сынь кенярдовтсть сельме весе тей кенярксчис сыцятнень.
Покш инжетнень – МР-нь Прявтонть В.Д.Волковонь ды РФ-нь Культурань министрань полавтыцянть, «Культура» национальной проектэнь координаторонть О.С.Яриловань – вастызь кши-сал марто.
Васенце этажсо выставкань арт-холлсонть неявикс таркасо Покш Березникень муниципальной райононь ды Культурань кудонь история марто стендэсь. Выставкасонть истя жо келейстэ невтезь декоративно-прикладной ды кедьчелькев ломантнень кедьсэ эрьва кодат теевкстнэ.
...Вана инжетне сыргасть Культурань-досугонь центранть ванкшномо. Ледстясынек, витнемань тевтне тесэ ушодовсть 2018 иестэ, весемезэ ютавтозельть 105313,4 тёжат целковойть. Васенцекс совасть хореографиянь покш, валдо залонтень. Се шкане тосо ютавтовсь «Вдохновение» киштемань коллективенть репетициясь.
Эйкакштне невтизь ёрокчист «Сюкоркат» киштемань программастонть саевкссэ, сынст пельде сюкпрянь валтнэнь ёвтынзе КДЦ-нь балетмейстерэсь Н.Д.Адлейба. Омбоце этажс куземстэ инжетнень вастсь волонтёрось, кона пачтясь те центранть панжома чистэ книгань акциянть ютавтомадо. Невтемакс, эрьвантень меревсь саемс вечкевикс книга, тарказонзо кадомс лия, конань сон уш кенерсь ловномонзо.
Седе тов инжетне содавтызь кавто мастерскойтнень. Вейкесэнть, косо анокставить сы шкань скульптортнэ ды сёвоньстэ эрьва кодат налкшкень теицятне, мастер-класс ветясь кедьчелькев ломанесь, эсь тевензэ парсте содыцясь В.А.Саранов. Омбоцесэнть тонавтсь стамо те тевенть коряс мастерэсь Ю.В.Аношкина.
Теке жо таркасонть, аволь васоло, ули эйкакшонь комната, се шкас, зярс тетятне-аватне тесэ кармить топавтомо вечкевикс тевест, вишкинетне вановттомо а кадовить.

ЛАМО ФУНКЦИЯНЬ БИБЛИОТЕКАСОНТЬ УЛИ ВЕСЕМЕСЬ

Покш Березникень Культурань центрасо теезь библиотекась васень варштавкс лангс марявсь, аволь ансяк лади неень шкантень, сон мик икельди. ЦБС-нь прявтось Ю.В.Тюрюшкина истя ламо ёвтнесь сонзэ эрьва кодат функциядонзо, мик марявсь, минь совинек вандынь чинтень. Залс совицятнень тонавтсть «Консультант–плюс» системас совамо, интерактивной лаз лангсо (доскасо) важодеме. Неть неень шкантень ладиця ды мик икельдиця таркатнева ветнимизь ды ютавтсь тенек экскурсия Ю.В.Тюрюшкина. Юлия Владимировна фотографиятнень вельде теимизь содавиксэкс выставканть марто, косо парсте неявсь, кодамокс ульнесь библиотекась витнемадо икеле ды кода сон полавтовсь тевтнень прядовомадо мейле. Тесэ улить ловнома таркат покштненень ды вишкинетненень. Инжетненень невтезель, кода электронной ресурсонть вельде совамс Россиянь национальной электронной библиотекантень.
Васенце этажсонть ули покш тарка, конанень рузтнэ мерить холл. Эйсэнзэ кармить ютавтовомо эрьва кодат мероприятият ды выставкат. Те чистэнть сон алтавсь Ф.В.Сычков артыцянть чачома чистэ 150 иетнень тешкстамонтень. Сондензэ инжетненень ёвтнесь Покш Березникень муниципальной райадминистрациянь культурань отделэнь прявтось А.Е.Губанищев.
Спортзалонть невтизе ды спортсо изнявкстнэде ёвтнесь ДЮСШ-нь прявтось П.С.Прокин.
…Торжественной промксось ютавтовсь покш залсонть. Васенцекс пурнавозтненень поздоров ды паронь арсема марто пшкадсь МР-нь Прявтось В.Д.Волков.
МР-нь Прявтось ёвтась сюкпрянь валт Покш Березникень ды весе Мордовиянь эрицятнень пельде РФ-нь Культурань министерстванть ды РФ-нь Президентэнть лемс, кие путсь ушодкс «Культура» национальной проектэнтень.
В.Д.Волков ёвтась кемема, те зданиясь свал карми пешксе.


– Эдь Покш Березникень районсо улить ламо ёроков коллективть, покштятнень-бабатнень тевест поладыцят, – мерсь МР-нь Прявтось. – Минек республиканть туртов культурань эрьва кодат койтне-кирдатне – аволь ансяк покш питнейчи, те минек сюпавчинек. Россиянь Президентэсь В.В.Путин аволь весть тешкстась: раськетнень культурась весень вейсэнди, лезды ломантненень улемс малавиксэкс ды седе парсте чарькодемс вейкест-вейкест.
– Варштавксонь коряс Покш Березниксэ Культурань-досугонь центранть теемась лиятнень ёнов а молиця. Тень коряс ули мелем ёвтамс поздоровт аволь ансяк тыненк, эстеньгак, – мерсь РФ-нь Культурань министрань полавтыцясь О.С.Ярилова. – Ютась ие «Культура» национальной проектэнть тевс нолдамсто. Сась шка теемс васенце итогтнень. Сень, мезе мон течи рединь Мордовиясто – те лиятнень ёнов а молиця тев. Бути истя улевель весе регионтнэсэ, мон бу меревлинь, миненек удалась теемс весементь, – мерсь Ольга Сергеевна.
О.С.Яриловань валонзо коряс, Мордовиянь опытэсь карми кучовомо масторонь весе субъекттнэс. Сон мельспаросо тешкстызе модельной библиотекасо важодицятнень ютксто ламо од ломантнень.
– Мон умок важодян культурасо. Икеле истямо арасель, – мерсь Ольга Сергеевна. – Бути истя ней ютыть тевтне, лисни, весементь минь тейтяно видестэ.
Истя жо сюкпрянь валт масторонь ды республикань прявттнэнень ёвтась «Эрзяночка» фольклорной ансамбляс совицясь, Шугурова велень поселениянь прявтось А.В.Николаева.

ЭЙДЕНЬ КУЖОСЬ – АЛКУКСОНЬ КАЗНЕ!

Теке жо чистэнть МР-нь Прявтось В.Д.Волков Покш Березниксэ улемстэ содавтызе «Теремок» эйдень кужонть, косо нурька шкас «Демография» нацпроектэнть вельде теезель эштё вейке од корпус. Ней тей кармить сакшномо кавксть седе ламо эйкакшт, весемезэ кодгемень, ютксост кармить улеме таркат сетнененьгак, кинень топодсть кавто ковт.
Эйдень кужонь од корпусонть ванкшномсто МР-нь Прявтось ушодсь медицинань кабинетстэ, косо ульнесь весемесь эйкакштненень васенце лезксэнь максомс ды сынст шумбрачист ванстомс.
Седе тов ульнесь вастовома вишкинетнень марто, ванкшновсть сынст налксемань-оймсемань таркатне. Вейке группасо улемстэ редязель, кода эйкакштне вейсэ воспитателест марто тейсть эрзянь ды мокшонь оршамопельсэ някат. Самай неть раськень налксематнесэ эйкакштне тонавтовить тиринь таркаст, келест содамо ды вечкеме. Теде кортамось поладовсь «Теремок» эйкакшонь кужов якицятнень тетяст-аваст марто вастовомасонть. Сынь эсь ёндо ёвтасть сюкпрянь валт Мордовиянь Прявтонтень эйкакшост туртов истямо валдо, лембе ды мазый кудонть кисэ.
В.Д.Волков тешкстась, тедеде Покш Березниксэ панжовсть колмо социально-эрявикс объектт, вейкесь юткстост – эйдень кужось.
– Тесэ ули весемесь эйкакштнень школав анокстамга, эдь эйдень кужотне ней совавтовить образовательной учреждениятнень юткс, тееви весемесь вишкинетнень парсте кастомга-тонавтневтемга. Истя минь аламонь-аламонь республикань образованиянь системанть ютавттано неень шкань вешематненень, – мерсь В.Д.Волков.
МР-нь Прявтось те вастовомасонть ёвтась сюкпрянь валт неть од объекттнэнь теицятненень ды макссь тенст республикань Правительстванть пельде казнеть. МР-нь Прявтонь Благодарностть максозь «Проектно-строительная компания «Техноком» ООО-нь прявтонтень В.И.Петрушкиннэнь, инженерэнтень-энергетикентень В.В.Гадаевнень, главной инженерэнтень О.Н.Никитиннэнь, те обществасонть важодицянтень В.П.Трушкиннэнь, «ТехстройСоюз С» ООО-нь прявтонтень ды ламо лиятненень неть зданиятнень шкастонзо ды парсте теемасо покш путовксост кисэ.
* * *
Теке жо чистэнть МР-нь Прявтось ульнесь Иневанькс Троицянть лемсэ од храмсонть, кона светявсь тесэ ковдо икеле. Вастневсь тесэ эрицятнень ды общественностенть марто.
Сынь ёвтасть МР-нь Прявтонтень сюкпрянь валт кисэст мелявксонть ды райононь эрицятнень лезэс паро тевтнень кисэ. Теке шкасто энялдсть культурань неть од объекттнэнень китнень одкстомтомадо. Кемеви, сонгак маласо шкасто топавтови, кода топавтовсть ламо лия вешематне те райононь эрицятнень лезэс.

Валентина ЮДИНА.
Покш Березникень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».